دیسانەوە سێكوچكەی لەعنەتی! (تەكفیر، تەخوین، تەجویع)

 

لە ڕۆژانی كۆتایی مانگی حوزەیرانی ساڵی (2009) و لە سەروبەندی هەڵبژاردنی ئەندامانی پەرلەمانی هەرێمی كوردستاندا، بەڕێز مامۆستا سەڵاحەدین موحەممەد ئەمینداری گشتی یەكگرتووی ئیسلامی كوردستان لە دیمانەیەكی (تەلەفزیۆنی یەكگرتوو ـ كەناڵی هەڵەبجە)دا باسی لە چەند پرس و تەوەرەیەكی گرنگ كرد، هەر لەو دیمانەیەدا چەمك و دەستەواژەیەكی زۆر گرنگیان بەكارهێنا و هەڵوێستەیان لەسەر كرد، لەبەر زەرورەتی بار‌ودۆخ و قۆناغەكە، بەلامەوە پێویست بوو كەمێك لەسەر ئەو چەمك و دەستەواژەیە بووەستین و شرۆڤەیەكی كورتی بۆ بكەین، ئەڵبەتە وەنەبێ‌ ئەمە یەكەمجاربێ‌ بەڕێزیان ئەو بۆچوونەی خستبێتە ڕوو، بەڵكو پۆلێنكردنەكەیی و ناوزەدكردنی بە (سێكوچكەی لەعنەتی)‌و شرۆڤەكردنەوەیەكی سەرلەنوێ‌ بۆ بۆچوونەكەی لەو هەل و مەرجەدا نوێ‌ بوو، كە بۆ ئەمڕۆش گرنگی خۆی هەیە.
ئەمینداری گشتی یەكگرتوو باسی سێ‌ دەردی كوشندەی كرد كە دژن بە كۆمەڵگە و هەنگاونان بەرەو مەدەنییەت و دژن بە ئایین و بنەماكانی مافی مرۆڤ و پرنسیپەكانی دیموكراسی و بەرژەوەندی تاك و كۆمەڵگەكان، بەڕێزیان وتیان ئە سێ‌ دەردەم ناو ناوە بە (سێكوچكەی لەعنەتی) كە بریتین لە: (تەكفیر، تەخوین، تەجویع)‌و پێویستە خۆمانی لێ‌ دوور بگرین و لە خەمی ڕووبەڕووبوونەوە و چارەسەركردنیاندا بین.
ئێمە لە خوارەوە هەوڵ دەدەین زۆر بە كورتی ئاماژەیەكی خێرا بۆ هەر یەكە لەو سێ‌ دەردە كوشندەیە بكەین و شرۆڤەیەكی كورتیان بۆ بكەین.
یەكەم/ تەكفیر: واتە بە كافركردن یان بە كافر زانینی خەڵكی، كە ئەم جۆرە بیركردنەوەیە ئیسلامییە توندڕەوەكان پەیڕەوی دەكەن، بەمەش نەك هەر خزمەتیان بە ئایین و خەڵك نەكردووە، بەڵكو زەرەر‌و زیانێكی زۆریشیان پێ‌ گەیاندووە، كە لە چەند ساڵی ڕابردوودا نموونە و ئەزموونی شكستخواردووی ئەم جۆرە بیركردنەوەیەشمان لە هەرێمی كوردستاندا بینی، كە دوایین نموونەیان دەركەوتەی (داعش) بوو، دەركەوت كە ئەم بیركردنەوە تەكفیرییە چەنێك دژ‌و پێچەوانەیە لەگەڵ ڕۆح و مەغزای ئاین و بووەتە هۆی شێواندن و ناشیرینكردنی سیمای جوانی ئاینی ئیسلام و لەكەداركردنی سومعەی هەڵگرانی و دروستكردنی چەندین گرفت بۆ هەڵگرانی، هەر وەك چۆن ئەم بیركردنەوە خێچ و سەقەتە دژە لەگەڵ هەموو بەها و بەرژەوەندییەكانی مرۆڤدا، لە كاتێكدا كە خودی ئایین بۆ دابینكردنی بەرژەوەندی مرۆڤەكان هاتووە.
دووەم/ تەخوین: واتە بە خائین كردن و بە خائین دانانی خەڵكی، ئەم بیركردنەوە چەوت و نەسازەش ڕەوتی عەلمانی توندڕەو پەیڕەوی دەكات و كردوویەتی بە چەكوشی دەست و قەڵەمی بڕیاری دادگای ناعادیلانەی دەستی دژ بە نەیار‌و ڕكەبەرەكانی، كە مەخابن هەندێك لە عەلمانییەكانی كوردستانیش ئەم ئاراستەیان گرتووەتەبەر‌و نموونەیەكی ناشیرین و شكستخواردوویان نیشان داوە، تا ئەو ئاستەی كە هەركەس شتێك بكات پێچەوانەی ئایدۆلۆژیا و بەرژەوەندی خۆیان بێت ـ ئەگەرچی بەرژەوەندییەكەشیان ناڕەوا بێت ـ ئەوا بە خائین و خۆفرۆشی دەزانن و چەندین تۆمەتی ناڕەوای دەدەنە پاڵ.
سێهەم/ تەجویع: واتە برسی كردن، سیاسەتی برسی كردن سیاسەتێكی دژ بە مرۆڤانەی دەسەڵاتە تۆتالیتار‌و پاوانخوازەكانە، ئەو دەسەڵاتدارانەی كە بە توندی قەپیان كردووە بە كورسی دەسەڵاتدا و بە خوێن و ئێسكی خەڵكی هەژار و چەوساوە كۆشك و تەلارەكانی دەسەڵاتی قۆرخكارانەیان بەرز دەكەنەوە و بە ڕەنگی خوێنی ئەوان دەیانڕازێننەوە، بەمەش دەیانەوێ‌ بەم سیاسەتی برسی كردنە خەڵكی دەستەمۆ‌و چاوبرسی و گوێڕایەڵی سیاسەتە چەوتەكانی خۆیان بكەن.
دەبینین كە دەسەڵاتی حوكمڕان و (حكومەتی حیزبی!) هەرێمی كوردستانیش چۆن چنگی خستووەتە گەرووی ژیان و بژێوی ئەم گەلە بەش مەینەتییەی هەرێم، بازاڕ‌و بازرگانی بە تەواوی لە لایەن ئەوانەوە قۆرخ كراوە و چین و توێژی مامناوەند نەماوە و تەنها توێژی زۆر هەژار‌و توێژی سەرمایەدار هەیە، بۆشاییەكی زۆریش كەوتووەتە نێوان پێكهاتە و جومگە جیاوازەكانی كۆمەڵگەوە، بۆیە بەشێكی زۆر لە هاووڵاتیان ئەم حكوتە بە هی خۆیان نازانن و حكومەتیش وەك پێویست خۆی زۆر بە بەرپرسیار نازانێ‌ لە بەرامبەر ئەم بێ‌ ئینتیما بوونە و بێ‌ باكی و مافەكانی هاووڵاتیانەوە.
بە خوێندنەوە و چاو خشاندنێكی خێرا بۆ واقیعی هەرێمی كوردستان، زیاتر قوڵی و پڕ مانایی و ڕاستییەتی گوتەزاكەی ئەمینداری گشتی یەكگرتووی ئیسلامی كوردستانمان بۆ دەردەكەوێت بەناوی (سێكوچكەی لەعنەتی تەكفیر و تەخوین و تەجویع)، هەروەها ئەو بوێری و جورئەت و بڕوا‌و قەناعەتەش كە لە پشت ئەم قسەیەوەیە ڕەنگە وامان لێ‌ بكات كە بگەڕێین بە شوێن خاوەنەكەیدا و بزانین كێیە كە لە یەك كاتدا باس لە هەڵەی (ڕەوتی ئیسلامی ناساز) و (عەلمانی توندڕەو) و (دەسەڵاتی پاوانخواز) و خۆپەرست لە سێ‌ ووشەی پڕ مانادا كۆ دەكاتەوە؟!
ئەوێك لەگەڵ ئەوەی كە خۆی ئەمینداری گشتی گەورەترین حیزبی ئیسلامییە، خۆی نابوێری لە ڕەخنە گرتن لە ئیسلامییەكی دیكەی خاوەن یەك پەیامی ئاسمانی، مادام ئاراستەكەی دژ بێت لە گەڵ ڕۆحی دین و ناوەڕۆكی ئیسلام و بەرژەوەندی گەلەكەیدا، ئەوێك ڕەخنە لە سیاسەتێك دەگرێت لە هەرێمەكەیدا ـ كە باڵا دەستە ـ مادام دەزانێت ئەم سیاسەتە زەرەر و زیان بە میللەت و ئەزموونەكەمان دەگەیەنێ‌، هەروەها مامۆستا سەڵاحەدین ڕەخنە لەو سیاسەتی برسی كردنەش دەگرێت كە حكومەتی هەرێم و دەسەڵاتدارەكان لە ماوەی چەند ساڵی ڕابردوودا گرتوویانەتەبەر بۆ بێدەنگ كردن و ژێربارخستنی جەماوەر و ڕازی كردنیان و بڕوا پێكردنیان بەوەی كە ئەم سیاسەت و حوكمڕانییەی هەرێمی كوردستان باشترین و دیموكراسیترین حوكمڕانییە و عەیارە بیست و چوارە.
ئەم پۆلێنكردن و گوتەزایەی سەرەوە (سێكوچكەی لەعنەتی تەكفیر و تەخوین و تەجویع) قسەی بیریارێكی خۆرئاوا یان قسەی سیاسەتووان و پرۆفیسۆرێكی ئەوروپی نییە كە هاوردە كرابێت، هەروەها قسەی زانا و فەقیهێكی جیهانی عەرەبیش نییە كە لەگەڵ كتێبە زەردەكاندا هێنرابێت، بەڵكو قسەی سەركردەیەكی سیاسی حەكیم و ئیسڵاحخوازێكی ئیسلامی و میانەڕەوێكی خۆرهەڵاتی ناوەراست و هەرێمی كوردستانە، قسەی سیاسەتمەدارێكی ووردبین و ئاشتیخوازێكی پەرۆشی گەل و نیشتیمانە، تێز‌و بیركردنەوەی كەسێكە كە لە وڵات و هەرێمێكی پڕ لە چەك و میلیشیا و خوێنڕشتن و شەڕی براكوژیدا باسی ئاشتی و پێكەوەژیان و كۆبوونەوە لەسەر خاڵە هاوبەشەكان و خوێندنەوە و ڕێزگرتن لە یەكتری دەكرد و بەو ئاراستەیەشدا هەنگاوی هەڵدەگرت و هیچ كۆسپ و هەوراز‌و نشێوی و كورسی و نانێكی چەور هەنگاوە هێور‌و حەكیمانە و ئامانجدارەكانی لە خۆیی و حیزبەكەی نەشێواند و پەشیمانی نەكردەوە لە قەناعەتە نەگۆڕ و ستراتیژی و ڕەوتە دیموكراسیخوازانەكەی.
* تێبینی: ئەم نووسینە بەشێكە لە وتارێكمان بە كەمێك دەستكاری و گۆڕانكارییەوە كە لە ژمارە (748)ی ڕۆژنامەی (یەكگرتوو) لە (9/7/2009) و لە لاپەڕە (6)دا بڵاوكراوەتەوە.
*****