بۆ؟

  چوار شەممە, 27 ئەیلول 2017 12:11

لە چەند مانگی رابردوودا پرسی ریفراندۆم و ئەنجامدان و ئەنجام نەدانی، زۆرترین قسە و باسی لە میدیا كوردی و عەرەبی جیهانیەكان لەسەر كرا، دوای دەرچوونی بڕیاری ڕیفراندم لە مانگی حوزەیران و، پێكهێنانی ئەنجومەنی باڵای ریفراندۆم، ئیتر ئەو حیزب لایەنانەی كە نوێنەری خۆیان نارد بۆ ئەنجومەنەكە، بەجۆرێ‌ سوكایەتی و بێ‌ حورمەتیان پێكرا، كە بڕواناكەم لەناو هیچ گەلێكی تر لە جیهاندا گەلێك هەبێ‌ وەك كورد هێندە تینووی شكاندن و تەنانەت خۆین رشتی یەكتر بن!!!.


مانگ و رۆژ رۆیشت و سوكایەتی بەردەوام بوو، تا دواجار كاتی ئەنجامدانی ریفراندۆم هات،ئەوە بوو لە دوا ساتەكاتی كاتی گەیشتنی پڕۆسەكە هەر یەك لە (گۆڕان و كۆمەڵ) بەهەر هۆكارێك بێ‌ بەڵام دەنگیاندا بە (بەڵێ‌) بۆ؟.


بەڵێ‌ راستی زۆر سەیرە!!! ئاخر هەرچی فەیلەسوفی دنیا هەیە لێینان بپرسە، ئەرێ‌ جیاوازی و حیكمەتی ئەم (بەڵێ‌) درەنگ وەختە لەگەڵ (بەڵێ‌) ی پێشوەختە چیە؟!
باشە بۆ ئەوانەی زوو وتیان بەڵێ‌، هاوبیر و هاوئاوازی پارتیتن و ئیرادەی سیاسیان نیە و دەستەمۆی پارتین، بەڵان ئەوانەی لەكۆتایدا وتیان (بەڵێ‌) پیاوی مەردن و ئیرادەی گۆڕانخوازیان هەیە و هیوای میللەتن!!!بۆ؟


بەداخەوە شەڕی حیزبی و موزایەدەی سیاسی تەنگی بەم خەڵكە داماوە هەڵچنیوە!ئەگەر نا ئەوانەی ئێستا ئەڵێن (بەڵێ‌) ئەگەر دوێنێ‌ بیان وتیایە،بە دڵنییایەوە بەشێكی زۆر لە كێشە ناوخۆییەكان چارەسەر ئەبوون و، بۆ مێژووش ئەیان توانی بڵێن ئێمە لە كاتێكدا كە لەگەڵ لایەن و كەسانێكی دیاریكرا و خیلافی سیاسیمان بوو،بەڵام دۆسیەی نەتەوە و دۆسیەی كێشە ناوخۆییەكان و شەڕی هەژموون و باڵادەستیمان تێكەڵ بەیەكتری نەكرد.


ئەم هەنگاوە سەرەتا ئەبوو بە خاڵێكی درەوشاوە و پڕشنگدار بۆ ژیانی سیاسی خۆیان و،لای جەماوەری خۆیان و غەیری خۆشیان گەورەتر ئەبوون،بەڵام بەداخەوە ئێستا كە (بەڵێ‌) ئەكەن، ئەم بەڵێیە درەنگ وەختە كاریگەریەكانی زۆر نابێ‌ و ئەوان خاوەنداریەتی ناكەن!، ئەوانەشیان كە لەسەر بنەمای قسەكانی ئەوان لە رابردوودا، قەناعەتیان بە (نەخێر) بۆ دروست بووە، ئەوە نەخێرەكەیان ئەچێتە گیرفانی (گروپی شاسوار) و دووبارە ئەوان هیچ سودێك لەم دەنگانە نابینن!.


بەرەی نەخێرەكەی (شاسوار )یش كە پێی وایە زۆر مەنتیقی و واقیعیانە مامەڵە ئەكەن و، بەردەوام لەكاتی قسەكانیان، تەواوی حیزبەكان سفر ئەكەنەوە، دەی ئەم برادەرانە با باش بزانن ئەوەی حیزبەكان ئەیكەن، باشەكانیان باشە و خراپەكانیشیان خراپە، بەڵام یەك جیاوازی زۆر گەورە هەیە لە نێوان ئەوان حیزبەكان، ئەویش ئەوەیە حیزبەكان بە باش و خراپیانەوە بە رۆژی رووناك خەڵكیان بەناوی حیزب كۆكردۆتەوە و، بەناوی حیزبیش قسە ئەكەن. بەڵام (گروپی شاسوار) چەندین ساڵە بە شێوەیەكی بەرنامە داڕیٍَژرا و لە رێگای میدیای ئەهلی و بەناوی بێ‌ لایەن هاتنە نا و خەڵك، بەڵام دواجار تەواوی مەسەلەكە سیاسی دەرچوو!!!.


دەی باشە تخوا بە ویژدانەوە حوكم بكەن،ئاخۆ كامیان زیاتر دەستبڕین و فێڵكردنە لە خەڵك؟ ئەوەی حیزبەكان ئەیكەین بەئاشكرا، یان ئەوی گروپی شاسوار ئەیكەن بە نهێنێ‌ و بەگەوجاندن ؟!


وەك رۆژنامەنووسێك بەڕاستی تا ئەم دواییانە زۆر خۆشحاڵ بووم بە بوونی ئەم كەناڵە و، زۆر بەبێ‌ لایەنم ئەزانی، پێم وابوو بێ‌ خاتر گرتن باش و خراپی هەموو لایەنەكان باس ئەكات، بەڵام راستی لەماوەی یەك ساڵی رابردوودا چەندین جار هەڵوێستی زۆر خراپیان بووە و، هۆكاری زۆر كێشە و گرفتی ناوخۆیی بووین،بۆنمونە شەوی ریفراندۆم كاتژمێر 11ی شەو خەڵكیان تۆقاند و لە هەموو شارەكان ئەزمەی بەنزینیان دروستكرد و،ترس و دڵە راوكێیان بڵاوكردوە و ماركێتەكانیان بەتاڵ كرد و، قیامەتیان هەڵستاند بۆ؟
بۆئەوەی بەرەی نەخێر 2 دەنگ زیاتر بێنێ‌ و، ئەوانیش وەك حیزبێكی تازە، پۆزی پێ لێدەن و لە داهاتوودا سەرەی ئەوان بێ‌ و ئەوانیش توزێ‌ میللەت بخولێنەوە!


زۆرباش لە بیرمە، هەر ئەم كەناڵە بوو لەدوای نەورۆزی ئەم ساڵ، راپۆرتێكی دابەزاند لەسەر كاسبكار و عەرەبانچی و دەستگیرەكانی بازاڕی سلێمانی، ئیتر لەم راپۆرتەدا،حكومەت و لایەنە پەیوەندارەكانیان بە لاواز و بێ‌ بەرنامە و بێ‌ دەسەڵات وەسف كرد لەسەر دۆخی بازاڕ،ئەوە بوو دوای ئەم راپۆرتەی ئەوان بەهەزاران كاسبكار لە بازاڕی سلێمانی بێ‌ ئیش و كاربوون و قوڕیانكرد بەسەر ئەم خەڵكە داماوە، ئیستا بازاڕ بە جۆرێكە تەنانەت وەستانی پیادەش تیایە قەدەغەیە.


بەداخەوە شەڕی ئیرادەشكاندن و موزایەدەی سیاسی و سفركردنی ئەوانی تر، بۆ گەورەبوون و خۆكردن بە ژمارەیەكی قورس، سیفەتێكی بۆماوەیی ئەم میللەتەیە و، نەوە بە نەوە دەستاو دەست ئەكات و ئەم خووە ناشیرین و ئەم كارە نائەخلاقیە لە ناومانا نابڕێ‌!!! .

 

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.