ماڵ وێران!!!

  چوار شەممە, 18 تشرینی یەکەم 2017 11:35

ماڵ وێرانی دەردێكی قورس، بێ‌ ناونیشانی و نەبوونی خانە و لانە، هەر بەقسەی بە ئاگری زستان ئاسانە،بە ڵام لە واقیعدا گڵپەی ئاگرێكە لەناخی جەرگ و دڵی مرۆڤ هەڵدەستێ‌ و، هەموو جەستە ئەكات بە خەڵوز و قەرەبرووت.

ئەزانن لە ماڵ وێرانیش ناخۆشتر چیە؟ ئەوەیە بەدەستی كەس و كارت ماڵت وێران بكرێ‌. ئەم نمونەیە ئەگەر بۆ هەر گەلێك ئەفسانە و قسەی خەیاڵاوی بێ‌ ، ئەوە بۆ ئێمەی كورد واقیعە و بەردەوام دووبارە و سەد بارە ئەبێتەوە.
بەڵی كورد سەد ساڵە دابەشكراوە و، تاڵاوی عەرەب و تورك و عەجەمی بە قوڕگا ئەكرێ‌، بەتایبەت باشوری كوردستان كە خۆمان كاركتەری رووداوەكانین و ئاگاداری ورد و درشتی مەسەلەكانین.
دیارە بەدبەختیەكانی ئەم وڵاتەی ئێمە ئەوەنە زۆرن، نەك بە بابەتی رۆژنامەوانی وابزانم بكرێن بە رۆمانیش هەر تەواو نابن. حەرەس قەومی و جاش و ئەنفال و كیماباران و شەڕی ناوخۆ و، داعش و حەشدی شەعبی بەشێكن لە نەهامەتیەكانی ئەم میللەتە.
بەڵام ئەوەی جێگای داخە لەهەریەك لەم قۆناغە تاڵ و ناخۆشانە، دەستی كورد خۆی سەرەكی ترین رۆڵی بینیوە لە سڕینەوە و لەناوبردنی ئەوانی تر! بۆ كێ‌ هەیە نەزانێ‌ ئەنفاڵ چۆن كرا؟ لادێكان چۆن سووتان؟كیماباران بۆكرا؟
نازانم ئێمەی كورد چ قەومێكین؟ئاخر لە شەڕی چاڵدێرانەوە 500 ساڵ پێش ئێستا بگرە، تا ئەم لەحزیە كوردەكان دژ و ناكۆكن!
لەهەر سەردەمێكدا باوی چی بووە هەر بەم شێوەیە دژایەتی یەكتر كراوە. لە سەردەمی خێڵ میرنشین و پاشا،تا ئەمڕۆی سەردەمی حیزب و لایەن، ئاخر بۆیە كە سەیری مێژوو ئەكەین وەك (پەشێو)ئەڵێ‌ پێویستە بەهەردوو دەست چاومان بگرین!
ئاخر هەر ئەو بەیەكتر كردنەیە كە تا ئێستا نەبوین بەهیچ،عەرەب زەلیل ترین نەتەوەن، بەڵام 22 دەوڵەتیان هەیە، توركەكان جگە لە بەربڵاوی كلتور و زمانەكەیان لە ئاسیای ناوەڕاست، خاوەنی دەوڵەتێكی دیار و كاریگەری ناوچەكەن،فارسەكان بە خۆبەستنەوەیان بە مەزهەب و دینی شیعە، خەریكە بەشێكی دنیا كۆنترۆل ئەكەن و ئێستا لە 5 وڵات حوكم ئەكەن.بەڵام كورد لە دوای 100 ساڵ، 10 مەتر خاك و دوو بەرمیل نەوتی كەوتە دەست، كەچی بە یەك فوو دەستی لەبنی هەمانەی بەتاڵەوە دەرچوو!.
رووداوەكانی (كەركوك)چی بوون؟كێ‌ كردی؟بۆ بە هەناسەیەك كورد پاڕو باڵی هەڵكڕوزا؟ نازانم!!! تەنها ئەزانم ئەوەی رویدا كەس دڵی پێخۆش نەكات و نەڵێ‌ خۆ من نەم كردوە! چونكە شكاندی شكۆی میللەتێك بوو، سەماو هەڵپەڕین و پێكەنینی شۆفێنیە عەرەب و تورك و فارسەكان بوو.
ئاخرئەوان تەنها بۆگرتنی كەركوك نەخرۆشابوون، نا بەڵكو شاگەشكە بوون بە شكاندنی شكۆی كورد و داڕمانی یەك جارەكی ماڵە لەرزۆكەكەی كورد.
سەیر ئەوەیە تەنها كورد زۆرینەی هەرە زۆری جگە لە هاونەتەوەیی، هاودین و تەنانەت هاو مەزهەبیشە.بەڵام لەهەموو میللەتێك عەجایب تر لە ئێستا و رابردوودا كەوتۆتە وێزەی یەكتری!
ئاخر كورد كە تا ئێستا بە ئامامج نەگەیشتوە بێ‌ حیكمەت نیە، پێرەمێر ئەڵێ‌(كاكە خوا كاری نابەجێ‌ ناكات، تا كێو نەبینی بەفری تێناكات)
مێژو پڕە لە رووداوی پەند ئامێز، بەڵام خۆ كورد هەرگیز پەند وەرناگرێ‌! (شەرەفخان) لە (شەرەفنامە) باسی زۆر شتی سەیر و سەمەرە ئەكات لەسەر كورد، باس لەوە ئەكات ئەڵێ‌ جارێك یەكێك لە خەلیفەی عوسمانیەكان كەسێك وەك والی بۆ كوردەكان دیاری ئەكات و، كوردەكانیش رەتی ئەكەنەوە، خەلیفە كە ئەزانی قسەكەی رەتكراوەتەوە، تووشی شۆك ئەبێ‌ و بڕیاری هێرش كردنە سەركوردەكان ئەدات،بەڵام راوێژكارەكەی ئەڵێ‌ قوربان شەڕی ناوێ‌، بڵێ‌ كوردەكان لەناوخۆیان كەسێك بكەن بەوالی و ناوەكەی بنێرن. ئیتر دوای یەك ساڵ لە مشت ومڕو چەلەحانێ‌،لەبەر خزم خزمێنەو حەقی فڵا ئاغایە و حەقی فڵان ئاغا نیە ناگەن بە هیچ ئەنجامێك، دواجار هەر خۆیان جواب ئەنێرن بۆ خەلیفە و ئەڵێن قوربان جەنابت كێ‌ بە باش ئەزانی كێشە نیە!!!
لە دوو ساڵی رابردوودا زۆرینەی حیزبە كوردیەكان چیان بەیەكتری نەكرد و نەوت،لە دوای شكستەكەی كەركوكیش تەوایانكرد و ئەوەی مابوو كردیان و وتیان.
باشە ئەڵێن ریفراندۆم سەرەكی ترین هۆكاری ئەم دۆخەیە،تازە ریفراندۆم كرا، كێ‌ كرد و رابەرایەتی كرد و، نیازی چی بوو؟ئەم پرسە نابێ‌ بێ‌ وەڵام بمێنێتەوە گەل وەڵامی ئەوێ‌. بەڵام لە پاڵ ئەوەدا ئەی باشە ئەم شكستە لەناكاوە چی بوو؟بۆ بەیەك شەو هیوای گەلێك بوو بە خۆڵەمێش و بەبا چوو! ئەمەش پێوستی بەوەڵامە و لە ئەستۆی كێیە ئەبێ‌ وەڵامی قەناعەتپێكەری هەبێ‌.
ئێستا بەوێنەی شكستەكەی ساڵی 1974 میللەت دڵشكاو و بریندارە،ئەگەر لایەنێك بەنزینی هێنابێ‌،ئەوە لایەنەكەی تر چەرخی لێداوە،كەواتە هەردوو بەرەكە یەقەد یەك بەرپرسیارن و پێوست ناكات بەرەیەك بكرێ‌ بە فریشتە و بەرەكی تریش بكرێ‌ بە شەیتان، چونكە دواجار هەموو خەڵكیان كرد ماڵوێران.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.