بە شەڕ و پێکدادان قوڕەکە خەستر مەکەن، کاتى ئاشتى و پێکەوەژیانە

  دوو شەممە, 30 تشرینی یەکەم 2017 08:47


لە ژینگەیەکى وەک ئەم وڵات و هەرێمەى ئێمەدا کە لە چەندین بواردا بەجێ ماوین و لەناو چەندین کێشە و ئاڵۆزى ئیدارى و شکست و قەیرانى حوکمڕانى و سیاسى و ئابوورى و ئەمنى و ناتەبایى حیزب و لایەن و توێژەکان و پەیوەندى نێوان هاوڵاتیان و دەسەڵاتدا ژیان بەسەر دەبەین، زیاتر لە هەر سەردەم و کاتێکى دیکە پێویستمان بە گفتوگۆ و لێکگەیشتن و نزیکبوونەوەى توێژەکان و ئەنجامدانى حیوار و پەیڤینە، نەک بەشەڕدان و دوورخستنەوەى توێژەکان و تەریککردنى شەریکەکان و دروستکردنى ململانێ و قوڵکردنەوە و زەقکردنەوەى کێشە و خاڵە ناکۆکەکانى نێوانیان و ڕەواجدان بە فەرهەنگى لەیەکتر خوێندن و ناشیرینکردن و بە شەیتانکردنى یەکتر و خۆ بە هەموو شت زانین و ئەوانیتر بە هیچ زانین.

مەخابن لە چەند ساڵى ڕابردوودا و لە لایەن بەشێک لە هێزە سیاسى و ئایدۆلژییەکانەوە، چەندین ململانێ و شەڕى جیاواز بە گەل و هاوڵاتیانمان کرا و سەرمایەیەکى زۆرى مرۆیى و مەعنەوى و ئابوورى بەهەدەر درا، جا ئیدى چ لە لایەن دەسەڵاتدار و هێزە ناوخۆییەکانەوە بووبێت، یان بە پلان و هاندانى ناحەزانى بەرژوەندى خوازى دەرەوە.

وەک بینیمان ململانێ و شەڕى خێڵەکى کرا بە گەلەمان، شەڕى ئایدۆلۆژى، شەڕى حیزبى و سیاسى، شەڕى ناوچەگەرێتى و شارچییەتى، ململانێ و شەڕى برەودان بە جیاوازییە کۆمەڵایەتییەکان و تا ڕادەیەکیش هەوڵى زەمینە سازکردن بۆ ململانێ و شەڕى ئایینى و مەزهەبیش دراوە، کە هەموو ئەمانە جێکەوتى خراپیان بەجێ هێشتووە لەسەر هاوڵاتیان و کۆمەڵگەکەمان.

مودریك عەلی عارف

لەدایكبووی (1978) لە گوندی (خەرپانی) ناوچەی هەورامان، پارێزگای هەڵەبجە، *لەگەڵ خوێندنی قوتابخانەدا چووەتە حوجرە و زانستە شەرعییەكانی خوێندووە، *بەكالۆریۆس لە (اصول الدین و فیكری ئیسلامی) *لە ساڵی (2005)ەوە وەك پیشەی مامۆستایەتی دامەزراوە.
* ئەندامی (ناوەندی مەعریفەت بۆ فیكر و مەعنەوییەت)ەو دەستەی نووسەرانی گۆڤاری (هەژان) *ئەندامی كارای (كۆمەڵەی نووسەرانی ئیسلامی كوردستان) *خاوەنی ئەزموونێكی چەند ساڵە لە بواری كاری ڕاگەیاندندا و كاری پەیامنێری بۆ چەند ڕۆژنامە و گۆڤارێك كردووە و چەند ساڵێك (مُحَرِّر)ی بەرنامەكان و بەڕێوەبەری (دەنگی یەكگرتوو ـ ڕادیۆی هەڵەبجە)، شارەزایە لە هەردوو زمانی (فارسی و عەرەبی)دا، خاوەنی زیاتر لە (15) كتێب و نامیلكەی وەرگێران و نووسین، كە زۆرینەیان لە بواری عیرفان و مەعنەوییەتدان، چەندین بابەتی لە ڕۆژنامە و گۆڤارەكاندا بڵاوكراوەتەوە و نزیكەی (15) ساڵە لە بوارەكانی ڕۆشنبیری و كۆمەڵایەتی و ئایینی و عیرفانی و ئەدەبیدا سەرقاڵی نووسین و وەرگێڕانە.