"بەغدا، ئەو دڕكەی هەرگیز ترێ‌ ناگرێت"

  هەینی, 03 تشرینی دووەم 2017 01:40

هەموومان دەزانین لە ماوەی پتر لە چارەگە سەدەیەك حوكمڕانی، دەسەڵاتی سیاسی كوردستان نەك هەر نەیتوانیوە ژیانێكی خۆشگوزەران دابین و حوكمێكی ڕەشید پەیڕەو بكات، بەڵكو لە مشەخۆری و نابەرابەری و بەهەدەردانی سامانی گشتی، گەیشتووەتە ئاستێكی مەترسیدار و چی بكرێت و چی بگوترێت، نابێتە پاساوی ئەو هەموو بێسەروبەری و ناڕۆشنی و ناشەفافیەتەی لەم هەرێمەدا دەگوزەرێت، وەك دەگوترێت وەها نەدڕاوە بتواندرێ‌ بە ئاسانی پینە بكرێت.

بەڵام ئەمە هەرگیز لەجێگەی خۆیدا نییە، بكرێتە بیانووی ستایشكردنی سیستمی ئیداری و فەرمانڕەوایی حكومەتی ناوەندی و بە گوڵ پێشوازی لە بڕیار و فەرمانەكانی ئاغای عەبادی بكرێت لە كوردستان، لەبەرئەوەی عێراقی تازە، یا بەغدای دوای (2003)، بە هەموو كایە و جومگە و نێوەند و دامەزراوەكانییەوە، یەكێكە لەو وڵاتە سەیرانەی سەر ئەم هەسارەیە، قەت ئەو مەئوا سەقامگیر و جێگە ئومێدە نەبووە، منی كورد شەرم لەوە نەكەم، كە هاووڵاتیی سەر ئەو پارچە زەمینەم. هیچ كات بەغدا نەبووەتە وڵاتێكی موئەسەساتی و لەسەر بنچینەی یاسا و دەستوور و هاووڵاتیبوون مامەڵە لەگەڵ گەلانی وڵاتەكەی بكات و ڕەچاوی مافە سەرەتاییەكانی مرۆڤ بكات، ئازادی و خۆشگوزەرانی بۆ خەڵكەكەی لە دروشمەوە بگوازێتەوە بۆ كردار. هەر بۆ نموونە ئەو كاتەی كە نە شەڕی داعش هەبوو و نە پرسی ڕیفراندۆم لە ئارادا بوو و نە هەرێم نەوتی دەفرۆشت، بەغدا ئامادە نەبوو بەشە بودجەی هەرێم وەكوو خۆی بنێرێت كە 17% بوو.
ئەگەر عێراقی پێش (2003) عێراقی سەركوتكردن و داپڵۆسین و حیزبی قائید و قائیدی زەرورە و كۆماری ترس و تۆقاندن و سێدارە... بووبێ‌، ئەوا عێراقی دوای (2003) بەگوێرەی ڕاپۆرتی دەزگا و نێوەندە فەرمی و نافەرمییە نێودەوڵەتی و ناوچەییەكان، لە ڕێزی پێشەوەی دەوڵەتە هەرە گەندەڵەكانی دونیایە، هەروەها بەپێی چەندین داتا و ئامار، عێراقی تازە لە ڕووی خراپی ژینگە و پیسی شارەكان و ناجێگیری دۆخی ئەمنی و بەربادی لەڕووی ئابووری و بەرخۆری و بێ‌ بەرهەمی، لە یەكەمەكانی وڵاتانی دونیایە. هەروەها كێشەی كورتهێنانی ساڵانەی بودجە و ساڵ بە ساڵ كەڵەكەبوونی زێتری قەرزی وڵاتان، ئەگەر ئێستاش كاركردی ڕاستەوخۆی نەكردبێتە سەر گوزەرانی خەڵكەكەی، ئەوا بێ‌ شك دوای چەند ساڵێكی دی، زۆر بە ڕۆشنی، ماك و شوێنەوارە خراپەكانی ئەو دۆخە ترسناكە دەردەكەوێت. ئەمە جگە لەوەی نەزعەی مەزهەبگەرایی و دابەشكردنی پۆستەكانی نێوەندی دەسەڵات، لەسەر بنچینەی تائیفی و زیادبوونی میلیشای چەكدار و سوپای نانیزامی، لەباتی پێشخستن، ڕۆژ بە ڕۆژ ئەم وڵاتە دەگەڕێنێتەوە دواوە.
لەبەرئەوە بەكورتی وەك چۆن عێراقی پێش (2003)، هەرگیز عێراقێك نەبووە منی كورد شانازیی پێوە بكەم و بە وڵاتی ڕاستەقینەی خۆمی بزانم، بە هەمان شێوە عێراقی تازە، هەر دڕكەكەی جارانە، بەربادیی ئەزموونی هەرێم و بیماریی باخی كوردستان، هەرگیز وام لێناكات پێم وابێ‌ ئەو دڕكەی بەغدا ڕۆژێ لە ڕۆژان ترێ‌ دەگرێت!