دۆخی ناوچەكە لەسەر ئاكامی ململانێی ئەمریكا و ئێران وەستاوە

  چوار شەممە, 08 تشرینی دووەم 2017 07:13

 

ئەگەر پاش ڕوخانی یەكێتی سۆڤیەت و هەڵوەشانەوەی بلۆكی ئیشتراكی ، ووڵاتە یەكگرتوەكانی ئەمریكا خۆی بە شوان و تاكە زلهێز و بێ‌ ڕكەبەر دەزانی لە جیهاندا ، بەڵام ڕوداوە دروستكراو و خێرا و جۆراو جۆرەكانی ڕۆژهەڵاتی ناوەڕاست ئەوەمان پێدەڵێت كە ئەمریكا وهەموو هاو پەیمانەكانیشی ناتوانن ئەوەی ئەوان دەیانەوێت بە ئاسانی بۆیان بچێتەسەر، چونكە ئەمڕۆ هێزێكیتر هەیە لە ناوچەكەدا بەتەنها لە بەرامبەر سیاسەتەكانی ئەودا وەستاوەتەوە ، كە ئویش وڵاتی ئێرانە.


ئەگەر هەردوو وڵاتی عێراق و ئێران بە نمونە وەر بگرین كە هەردو وڵات بەهۆی ڕژێمە دكتاتۆریەكەیانەوە جۆرێك لە دابڕانیان لە نێوان خۆیان و كۆمەڵگەی نێودەوڵتیدا دروستكردبو، هەرچەندە هەردوو ڕژێمەكەش لەلایەن گەلانی خۆیانەوە ڕژێمێكی مەقبوڵ نەبون، بەڵام كاتێك هاوپەیمانی نێو دەوڵەتی دروستكرا لە دژیان ، رژێمی عێراق توانی تەنها بیستو یەك ڕۆژ بەرگری لە بون و مانەوەی خۆی بكات ، بەڵام ڕژێمی سوریا ئەوە زیاتر لە شەش ساڵە بەرگری لە خۆی دەكات، یان بەرگری لێدەكرێت، ڕاستە ڕەوشی ئەوكاتی عێراق جیاوازە لە ئێستەی سوریا و هەروەها جۆری جەنگی هاوپەیمانانیش جیاوازە، بەڵام جیاوازیە گەورەكە لەوێدایە ، ئەوەی یەكەمیان خواستی ڕوخانی ڕژێمەكە هامان خواستی وڵاتی ئێرانیش بووە، بەڵام ووڵاتی دووەم پێچەوانەی خواستی ئێران بووە! بۆیە چارەنوسی عێراق ئاوا بو ، و سوریاش ئاوایە.


وەنەبێت ئەم دەرەنجامە تەنها لە دژایەتی وڵاتە خاوەن سیادەكاندا ڕەنگی دابێتەوە، تەنانەت لە حیزب و ڕێكخراوەكانیشدا هەمان دەرەنجام خۆی نمایش دەكات، ئەگەر سەیرێكی كۆتایی هەرسێ‌ ڕێكخراوی (قاعیدە و تاڵیبان و داعش) بكەین چونكە هەردو وڵات (ئەمریكا و ئێران ) هاوڕابون لەسەر لە ناوبردنیان ، ئەوا درەنگ یان زوو هەرسێ‌ ڕێكخراوەكە بە جۆرێك لە نێو براون ، (من باسی ئەوەناكەم كە ئەو ڕێكخراوانە دروستكراوی كێ بون و دەستی كێیان لە پشت بوو) ، بەڵام بۆچی سێ‌ ڕێكخراویتر (حیزب الله و حەماس و حوسیەكان) هەرچەند ئەمریكا و ئیسرائیلیش ویستی لەناو بردنیانیان هەبوو، چونكە ئەو خواستەیان پێچەوانەی خواستی ئێرانە تائێستەش ئەوەی ئێران ویستویەتی ئاوا گوزەراوە.


لێرەوە دەگەینە ئەو دەرەنجامەی هەر هیچ نەبێت لە ڕۆژهەڵاتی ناوەڕاستدا ئەوە تەنها ئەمریكا نییە یاری بەكارتەكانی دەستی دەكات ، مەگەر لەكاتێكدا ئەو گەمەیە هاوتەریبی بەرژەوەندیەكانی ئێران بێت، بەدیوێكیتردا كارتەكانی ئێران گەر بەهێزتر نەبێت لەكارتەكانی ئەمریكا ئەوا لە كارتەكانی ئەو لاوازتر نییە.
ئیتر ئەو زەمەنە بەسەرچوو كە ئەوەی ئەمریكا بیەوێت هەر ئەوە دەبێت، بەڵكوو ئەوەی ئێرانیش بیەوێت دەبێت ئەوە ببێت.


ئەو ڕوداوانەی ئەم دواییەی (هەرێمی كوردستان و لوبنان و یەمەن)یش ئەو ڕاستیانەی سەرەوە زیاتردەسەلمێنن.


ئیتر ئەبێت چاوەڕێی جەنگی نێوان ئەو دوو سەرباگەیەبین تابزانین، كام لایان باڵا دەستتر دەبێت لە ناوچەكەدا، چونكە گۆڕانكاریە نوێكانی ناوچەكە نیشانەی جەنگێكی گەورەتری پێیە لە ناوچەكەدا.