گەلی كورد چی بە دەستەوە ماوە ؟یاخود چی لە دەست داوە ؟

  چوار شەممە, 29 تشرینی دووەم 2017 09:26

 


هەموو گەلێكی ژێر دەستە هەتا ئەو كاتەی كە دەبێتە خاوەنی قەوارەیەكی سەربەخۆی خۆی پێویستە لەخەبات و تێكۆشان نەوەستێ و هەموو هۆكارەكانی سەركەوتن بگرێتەبەر .


كاتێك گەڵێ هەنگاوێك دەگرێتە بەرو ئامانجەكەی ناپێكێ یان ئاسەواری ئامانجەكەی لێ دەشوێنن ئیتر ئەمە بەمانای كۆتایی دونیا نایەت و خەبات و تێ كۆشان نەپێچراوەتەوە، بەڵكو دەبێت خۆی كۆبكاتەوە و بە خۆدا چونەوە بكات و بگەڕێ بەدوای هەلێكی تردا كە كەش و هەواكەی لە بارتر بێت تا دەگاتە ئامانجی دیاری كراوی خۆی .


ئێمەی گەلی كورد لە باشوری كوردستان زۆر پێویستە دوو پرسیاری جەوهەری لە خۆمان بكەین بە تایبەتی لەم ساتە وەختەدا كە هەندێ قەڵەم و ڕاگەیاندنیش زۆر زیاد لە پێویست كار لە سەر ڕوخاندنی باری دەروونی تاكی كوردی ئەكەن هەر بۆ ئەوەی بڵێن ئێمە لە گەڵ ئەم بابەتەدا نەبوین ( واتە ریفراندوم ) تا بیانەوێ بلیمەتی خۆیا ن بۆ شیتەڵ كردنی روداوە سیاسیەكان یان پێشهاتە كانی بە خەڵك بسەلمێنن . ، پرسیارەكانیش ئەمانەیە :


• ئایا ئەم ڕوداوانە كە ڕوی دا ئەكرێ بە نسكۆ و داڕمان لە قەڵەم بدرێ ؟
• ئایا ئەگەر بمانەوێ بۆ هەلێكی تر خۆمان ئامادە بكەین پێداویستیەكانی چین ؟ ئایا كەرەستەی ئەو پێداویستیانە لە ماڵی خۆماندا دەست ئەكەوێت یان ئەبێت هاوردەیان بكەین ؟ یان بیانخوازین لە دراوسێكانمان؟


سەبارەت بە پۆسیاری یەكەم بەندە بەڕای خوم پێم وانیە ئەمەی ڕوی داوە بە نسكۆ و داڕمان لە قەڵەم بدرێ ، هەر چەندە خوێن ڕژاوە ، ماڵ سوتاوە ، خەڵكێكی زۆر دەر بەدەر بوە ، بە تایبەتی لە كەركوك و دوس خورماتوو ناوچە جێ ناكۆكەكانی تر ، بەڵام دەبێت زۆر زیرەكانە و بەر پرسیارانە مامەڵەی لەگەڵدا بكرێت و لەم كاتەدا پێویستە كاری لە پێشینەی حكومەتی هەرێم گەڕانەوەی ماڵەكوردەكان بێت بەهەر نرخێك بوە بۆ شوێنە كانی خۆیان تا ئەو شوێنانە لە تەعریب كردنێكی تر بپارێزین و دەبێت وەفدی دانوستان كار لە گەڵ حكومەتی ناوەند ئەم خاڵە لە بیر نەكات و پێ داگیری بكات بۆ گەڕانەوەی ئەمن و ئاسایش بۆ ئەو شوێنانە تا ماڵە كوردەكان بە ئاسانی و بە بێ ترس بگەڕێنەوە سەر ماڵ و كار و بەرژەوەندی خۆیان ئەگەر لە بەرامبەریشدا دەست هەڵگرێ لە هەندێ بەرژەوەندی ماددی هێشتا هەر لە بەرژەوەندی كوردە ، پاشان پێویستە ستراتیجی ئارام كردنەوەی ئەو شوێنانە بگرینە بەر و لە هەر جۆرە گرژی و ئاڵۆزیەك بیان پارێزین ، چونكە هەر جۆرە گرژی و ئاڵوزیەك لەم شوێنانە لە بەرژەوەندی خەڵكی كوردستان و حكومەتەكەشی نیە بە تایبەتی لە ئایندەدا .
سەبارەت بە پرسیاری دووەم ئەو ئامانجەی كە لە پرسیاری یەكەمدا دەستمان ئەكەوێت ئەكرێت بیكەینە بەشێك لە زەمینەی ساز كردنی واقعێك كە یارمەتیمان ئەدات بۆ كۆكردنەوەی كەرەستەی خۆئامادە كرد ن بۆ هەلێكی تر .


پایەكانی دروست كردنی هەرێمێكی سەركەوتو : هەندێك سەرەقەڵەمی كورت و بەخێرا


یەكەم : لە ڕووی فیكریەوە


1- ئەبێت فەرمان ڕەوایانی هەرێم دان بەو ڕاستیە تاَلەدا بنێن كە لەم ماوە دورو درێژەدا سەركەوتو نەبوون لە دروست كردنی هەرێمێكی بەهێز و پێش كەوتوو، ئەڵقەی نێوان حاكم و هاوڵاتی لەم ماوەیەدا توشی جۆرەها نەخۆشیی بوە وگەشتوەتە ئاستی پسان و قرتان و ( ئەگەر مێژووش بخوێنینەوە هەمیشە ئەو دەسەڵاتەی خەمی ئەم ئەڵقەی نەخواردبێت كۆتای بە دەسەڵاتەكەی هێناوە )، پێویستە سیاسەتی نوقتە سەری دێڕ بەكار بێنن و هەڵوێستەیەكی جدی بكەن ئەگینا چارەنوسیان زۆر خراپ ئەبێت .و خۆشیان و هەرێمەكەش توشی لەمەی هاتوە خراپ تر ئەكەن .


2- تاك لە ژیاندا بكرێتە سەنتەر ، واتە لە بای ئەوەی دەوڵەت چاوەڕێی تاكەكانی بكات ، لە خۆی بپرسێت چی پێش كەش كردوە بە مرۆڤەكان ؟


3- ساق كردنەوەی سیستمی حوكم كە بەرهەمەكەی بریتی بێت لە دیموكراتی و مافی مرۆ ڤـ و پێكەوە ژیان و دوركەوتنەوە لە دیكتاتوریەت و تاك ڕەوەی و هەژمونی حیزبی و خێزانی و خێڵداری و ... هتد .


4- یەك گرتن لە سەر ئامانجە باڵاكانی هەرێم . وێنەیەكی پیاوێكی پیری رۆژی گشت پرسی زۆر هەژاندمی كە ووتی سیاسیەكان ئەوەی لە سەر ئێمە بوو كردمان ئەوەی ماوەتەوە ئێوە چۆن مامەڵە ئەكەن لە گەڵ دەرئەنجامی ئەم گشت پرسیە ؟


5- واز هێنان لە گریان بە سەر مێژودا و كولانەوەی برینی ڕوداوە تاڵەكان .

 


دوەم : لە ڕووی ئیداریەوە :


1- كەڵك وەرگرتن لە پێش كەوتو ترین شێوازی بەڕێوە بردن لە جیهاندا ، چونكە تەجروبەیەك كە سەركەوتوو بوبێت پێویست بە ئیجتهاد ناكات تیایدا ، كارگێڕیی زانستەو هەڵە وەرناگرێ ئەوەی پێویستە ئامادە كاریی زیهنی و ئەخلاقی و رۆ شنبیری تاكەكانە كە ئەوەش قورس نیە و بە ئاسانی مرۆ ڤەكان ئەتوانن لە گەڵیدا هەڵ بكەن .


2- لە ڕووی ئابوریەوە ، كوردستان هەم خاوەنی سەرمایەیەكی مرۆ یی گەورەیە هەم خاوەنی سەرمایەیەكی سروشتی جۆراو جۆرە .


3- گرنگی دان بە كەرتی خوێندن ، من پێم وایە بۆ هەستانەوەی یان پێش كەوتنی هەر گەلێك قۆناغی یەكەم كەرتی خوێندنە ، ئەم كەرتەش لە باخچەی ساوایانەوە دەست پێ دەكات تا دەگاتە كولیج و زانكۆكان ، ئەم كەرتە لە تەواوی ووڵاتدا ئەتوانین بڵێین لە چاخی تاریكیدا ئەژی بە بەراورد بە كەرتی خوێندن لە ووڵاتەكانی تری پێش كەوتوو .


4- گرنگی دان بە خوێندنی پیشەیی كە ئەم جۆرە خوێندنە لە تەوای وڵاتدا پیشت گوێ خراوە ، بە راستی ئەم جۆرە لە خوێندن لە ووڵاتانی پیش كەوتو گرنگیەكی تایبەتی پێ ئەدرێ و وەك ژێرخانێكی سەركەوتوی كەرتی تایبەتی سەیر ئەكرێت لە هەموو بوارەكاندا .


بە هیوای بینا كردنی هەرێمێكی سەركەوتوو ئەگەر بۆ خۆشمان نەبێت بۆ نەوەكانی دوای خۆمان تا بەر نەفرەتیان نەكەوین ( كلما دخلت أمە لعنت أختها )