چۆن ئەم تاسان وشۆکە نەتەوەییە تێپەڕێنین!؟؟

  دوو شەممە, 04 کانونی یەکەم 2017 09:02

لەئێستا دا کەشێکی نائومێدی وبێ هیوایی ڕووی لە هەموو کوردستانیەک کردوە دوای شکستی سیاسی وئابوری وئەمنی ولەدەستدانی خاک بەتایبەت دوای ڕووداوەکانی شانزەی ئۆکتۆبەر,کەوەک هەمان دۆخی دوای ئاشبەتاڵی ١٩٧٥ وئەنفالی ١٩٨٨ وشکستی ڕاپەڕینی ١٩٩١ وایە بگرە خراپترو بەسوێ ترو بەئازارترە,چونکەلەپێشودا ئەوەی پاڵی نا ڕۆڵە بەجەرگەکانی ئەم میلەتە کە بەرپەرچی سیاسەتی شومی تەعریب وتەبعیس وتەرحیل وتەهجیر وسوتماک کردنی خاکی کوردستان لە شاڵاوە شومەکانی کیمیا باران وئەنفال بدەنەوە ئەو هیوا وئومێدە بوو بەحوکمڕانی خۆماڵی کوردی کەدەسەڵاتە چەتە ئاساکەی بیست وشەش ساڵی ڕابردوو ئەو خەونەشی لەگۆڕنا.
بەڵام ئایا ڕەوایە لەبەرامبەر ئەم دۆخە تاڵەدا چۆک دابدەین ودەستەوستان دانیشین وخۆمان بخۆینەوە,یان دەبێت هەنگاو بەرەو تێپەڕاندنی ئەم ڕەوشە نالەبارە هەڵگرین.
کەئەوە ئەرکی دەستەبژێری سیاسی وڕۆشنبیرە جدی وڕاستەقینەکانە ئەوانەی لەسەرسەرەنوێلکی گەندەڵی هەڵنەنیشتون ,ئەوانەی بەڕەخنەوپڕۆژەی بنیاتنەرەوە ڕووی ڕەشی دزێوی دەسەڵاتی شکست خواردویان هەڵماڵیوە,ئەو کەس وگروپ وهێزانەی نەخێریان بۆسیاسەتی شکست خواردوو پرۆسێسی ڕێکخراوی بەهەدەردانی داهاتی گشتی بەرزکردۆتەوە,ئەوانەی چەکوچێکی پانکەرەوە بون بۆسەرە پیس خۆرەکان.
بۆیە وەک دۆخە سەختەکانی پێشوو پێویستمان بەڕابەڕە ڕاستەقینە وسەرکردە لەخۆبردوو وگیانفیداکانە کە ڕابەرایەتی گەنجە دڵپڕو خێر لەخۆنەدیوو وهاوڵاتیە ناخ پڕ لەحەسرەتەکانی ئەم هەرێمە شەکەتە بکەن بەرەو گۆڕانکاری ڕاستەقینە وبەپینەو پەڕۆ ڕازی نەبن,وچی دی پاسی بێ هودە نەدەنە یاریکەرە سیاسیە هیچ لەبارانەبوەکان کە ٢٦ ساڵە تاقی کراونەتەوە کەجگە لە گەندەڵیەکی بەرفراوان وخاک فرۆشی ودزینی سامانی گشتی وبرسیەتی وسەپاندنی دەرباری گوێ لەمستی خۆیان چی دیان لە باراندا نەبوو.
دڕ دان بەشاڵاوی نائومێدی وخۆڕێکخستنەوەو بەڕێخستنی پڕۆژەی هەڵسانەوەو قۆستنەوەی دەرفەتەکان ئەرکی هەنوکەییمانە,چونکە هەم ئێمە گەلی نائومێدی نین وفێرنین ڕەشبین بین وهەم توانایەکی مادی ومرۆیی زۆرمان لەبەردەستە گەر باش ڕابەڕایەتی بکرێ توانای زاڵ بوون بەسەر ئەم دۆخەی لەبەردەستدایە,هەم درز کەوتۆتە تەلار ی گەندەڵکاران وشکستخواردوە حوکمڕانەکان کەدەبێت سەرەنجام ئەودرزانە بەقوڵینگەکانمان بکەینە داڵان لەپێناوی هێنانەکایەی حوکمڕانیەکی شایستە بەگەلی کوردستان ووانەو ئەزمون وەرگرتن لەوانەی بەم دۆخە نەخوازراوەیان گەیاندین ودووبارە نەکردنەوەی هەڵە وبێ باکی وسەر کێشیەکانیان.