هەوری سیاسی و وەرزی سواربوونی شەپۆلەكان

  سێ شەممە, 19 کانونی یەکەم 2017 15:01

 

دوا بە دوای بەرزبونەوەی پلەی گەرمی داخی هاوڵاتیان و، هەڵمی برسییەتی و چەخماخەی بێ‌ مەعاشی و، گەیشتنی بەرزە پاڵەپەستۆی كەركوك و نزمە پاڵە پەستۆی پارێزكاكانی تری هەرێم ، دواجار هەورێكی توڕە ئاسمانی هەرێمی گرتەوە و دەمێكە چاوەڕێی وها گرمەیەك و وها بارانێك ئەكرا.

ئاخر دەمێكە هەندێ‌ فەریكە سیاسی و نیمچە سیاسی و كۆمەڵێك سیاسی دۆڕاویش مودەتێكە خەریكی نوێژە بارانەی سیاسین.

دیارە جوگرافیای ناوچەكانیش رۆڵی سەرەكی ئەبینن لە بارینی باران، بۆیە سەرەتا لە زۆنی سەوز باران دای كرد،هەرچەند تا ئَێستا بە زاهیر لە زۆنی ئەولا هەر خۆرەتاوە.

بە دڵنیایەوە خۆپیشاندان و ناڕەزایی دەربڕین لەم دەسەڵاتە نا پاكە بێ‌ باكە، كارێكی زۆر كرنگ و سەربەرزانەیە و حەق بوو زۆر دەمێك بوایە، ئەم كۆمەڵە بەرپرسە بێ‌ ترسە نابەرپرسە لە پرۆسەی سیاسی دوور بخرانایەوە. بەڵام كورد وتەنی شانسی خۆیان كە هەردەم شانسیان باشبووە،ئیتر مەلەسەی شەڕ و ئاژاوەی ناوچەكە دەرفەتی دان تا ئێستا بەردەوم بن.

دیارە خەڵك حەقی خۆیەتی هەموو جۆرە فشارێكی مەدەنی نا توندوتیژ لەبەرامبەر ئەم كۆمەڵە بازرگانە سیاسیە بگرێتەیەر، بەر بەڵام با جارێكی تر مێژوو خۆی دووبارە نەكاتەوە و، وەك خەباتی ئەو پەنجا ساڵەی شاخی لێنەیەت، كە جگە لە كۆمەڵێك مەسئول كە بە دووربین سەیری شەڕەكانیان ئەكرد، دواجار هەر ئەوان بوون بە خاوەن ماڵ و هەموو خەڵك نەك بوون بە میوان، بەڵكو بوون بە بێگانەش.


لە ئێستادا خەڵك كە تاقەت و بڕستی لێبڕاوە و تینی بۆ هاتووە و هاورا ئەكات، بەئاشكرا لێرە و لەوێ‌ هەندی كەس خەریكی هەڵدانی بەلەمن بۆ ناو ئاوەكە و، ئەیانەوێ‌ وەك فریادرەس خۆیان نیشان دەن و دەسكەوتی سیاسیان دەسكەوێ‌.


ئیتر ئێرە كوردستانە، مەملەكەتی هەموو شتە سەیرەكانە، هەموو شتێ‌ ئاساییە،زۆر ئاساییە هیچ نەبیت و حیزبیش بیت،ئاساییە كەناڵێك بێ‌ لایەن بێ‌ و دەنگی حیزبێكی دیاریكراویش بێ‌،ئاسایە خۆت هیچت دیار نەبێ‌ و شەو رۆژیش وەك تەرزە داباریتە سەر خەڵكی تر،ئاساییە فرسەت بێنی و لە دوای باران سواری شەپۆلەكانی لافاو بیت و خۆت بە (مەهدی) زەمانە بناسێنێ‌.


گرنگ پێویستە خەڵك زۆر وریابن و رێگا نەدەن كەسێك بە دەم و چاوێكی پێچراو، بە دەركەوتنێكی سەیر،بەرەو داهاتوێكی ڵێڵ و ناڕونیان بەرن، چونكە بەرهار كە دوای چاوەڕوانی و تێپەڕاندنی سەرما و بەستەڵەكی زستان دەرئەكەوێ‌، ئەگەر ئەویش لە ناخیدا لەبری خۆر و نمەی باران، بەفر و تەرزەی حەشار دابێ‌،ئەوە قیامەت ئەخوڵقێنێ‌ و هەر سەرمای زستان بەردەوام بوایە زۆر باشتر بوو،چونكە گوڵ و بولبول ئەم كەشە چاوەڕوان نەكراوەی نەگەرەكە،خاتراوە.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.