كوردو مالیكی و عیشق و سیاسەت

  دوو شەممە, 25 کانونی یەکەم 2017 10:51

 


یەكێك لە پێكهاتەكانی دەرونی تاكی كورد ئەوەیە كە دڵ و سیاسەت تێكەڵ دەكات، یان خۆشەویستی تێكەڵ بە سیاسەت دەكات، بۆیە هەمیشە كورد وەك گەلێكی خەڵەتاو بە درێژایی میژوو كۆتایی بە كارە سیاسی و خەباتەكانی هاتووە، لە بەغدا زۆر هەست بەمە دەكرا و هێشتاش ..


لە ڕوداوەكانی ڕابردودا لە هەڵوێستی توركیاوە كە لەگەڵ ئەو هەمووە دۆستایەتییەی لەگەڵ كوردستان هەیبوو، بەڵام كاتێك لەسەر بنەمای زانیاری ناڕاست هەستی كرد بەوەی كە ترسێك ڕوبەڕوی وڵاتەكەی دەبێتەوە، راستەوخۆ دڵی خستە ژێر پێڵاوەكانی ‌و ئەوەی بەخەیاڵدا نەدەهات وتی و بو بە بەشێك لەو كارەساتەی بەسەر كوردستاندا هات..لەوەش زیاتر ئامادەی تەنانەت بیستنی قسەش نەبوو..


مالیكی زۆر كوردی ناڕەحەت كرد، بەڵام هەموو عیراقیشی نارەحەت كرد بەهەمان شێوەو زۆر زیاتریش، لەئەنجامی سوربونی كورد و ئەمەریكا عەبادی هات لەسەر كورسی سەرۆك وەزیران دانیشت، مالیكی خرایە كەنارو بەكورد بوایە لەهەموو پۆستشێك مەحروم دەبوو، بەڵام كورد لەگەڵ عێراق لەسەر بنەمای بەرژەوەندی دەبێت هەنگاوەكانی بنێت، واتە ئەوە عەبادیش، ئەویش وا دەرچوو، ئاساییە وابێت، چونكە ئەویش سیاسەت دەكات، خۆ نابێتە خزمەتكاری ئاواتە نەتەوەییەكانی كوردستان، لەم جۆرە دۆخەدا دڵەكان دەبێت ئەردۆغان ئاسا بخرێنە ژێر پێڵاوەكان، ئەو ئەڵێت لە سیاسەتدا دەرگاكان داناخرێت بۆیە ئامادەیی خۆیی دەربڕی بۆ دانیشتن لەگەڵ ئەسەدی خوێن ڕێژ، بێگومان بۆ بەرژەوەندی وڵاتەكەی خۆی، لەم كاتانەدا تەنانەت ئەگەر ستەمكارەكانی شەستەكان بێنەوەو وەڵامی داواكاریەكانت بدەنەوە دەبێت هاوپەیمانییان لەگەڵدا ببەستی، ئەگەر وانەكەیت‌و بەڕق سیاسەت بكەیت ئەوە بە مێژووی میللەتەكەت خائین دەبیت، پاشان خۆ تۆ بە هاوپەیمانی سیاسی كارتی بەرائەت لەتاوان‌و چونە بەهەشت نادەیت بە هیچ كەس ...تەنها مامەڵەی دونیایی لەگەڵ دەكەیت لەسەر بەرژەوەندی رەوای هاوبەش نەك لەسەر تاوانكاری ؟ ئەی چی دەكەیت ؟ ڕێگات كوێیە ؟ هەموو دونیا دەڵێن ئەبێت لەگەڵ بەغدا بسازێیت ..ئەوەش واقیعی بەغدایە..


لەسیاسەتدا لە كردەوەكان بێزاردەبیت، نەك لە خودی سیاسەتكار، نابێت حاڵەتەكە ببێت بەنەفسی، ئەها كورد لە شەستەكانەوە سیاسەتی ناوخۆی لەسەر بنەمای شەخسیی ‌و نەفسی دادەڕیِژێت، ئەوەتا ئێستاش ناتوانێت ماڵە بچوكەكەی كۆبكاتەوە ؟ ئەها خۆی ئەبێت بە تەورو پیك ‌و كوتەكی دەستی نەیارەكانی؟ ئەبینن چۆنن زمانی كوردی لاپەڕەی رَۆژنامە‌و میدیاكانی ناحەزان پڕدەكاتەوە؟ چونكە هەمووی سیاسەتییان كردوە بە خۆشەویسی‌و رق و كینە ‌و شكاندنی شكۆی یەكتر..
بۆیە مالیكی یان هەر كەسێكیتر بێت گرنگ ئەوەیە تۆ چیت دەسەكەوێت، كورد تا ئێستاش دەبێت لەگەڵ بەغدا بژی، حاكمەكانی بەغداش هەرەوانەن، نابێت چاوەڕێی كەسێك بكەیت لە جیهانی نادیارەوە كە بەم زوانە نایەت، بە سوننەو شیعەوە، بە حیزب و وڵاتەكانیانەوە، بە كۆی رەگەزەكانیانەوە دژی هەنگاوی سەربەخۆبون وەستانەوە، بۆیە یەك پرسیار دەبێت گەلی كوردستان لە خۆیی بكات لەم كاتەدا:- لە بەغدا بەرژەوەندی من لە كوێ و لای كێیە ؟


بێگومان لەم حاڵەتەشدا ئەزمون دەبێت هەمیشە لە پێش چاوبێت، واتە مالیكی ئەگەر باش بوبێت دەكرێت ببێتەوە بە خراپەكەی جاران ، بەڵام ئەركە كوردیش واقیعییانەتر بیر بكاتەوە‌و كاربكات، كەس دۆستی بێ مەرجی كوردستان نییە، نە توركیا ، نە ئێران، نە ئەوروپا و نە ئەمەریكا، نە میحوەری سوننی، نە میحوەری شیعی، هەمووی لەسەر بنەمای بەرژەوەندییەكان كار دەكەن، ئەزمونیش هەندێ جار بە هەڵە دەخوێنرێتەوە..
ئەم بابەتە لەم كاتەدا بەو ڕاشكاوییە دەنوسم، هۆكارەكەی ئەو لێدوانانەی مالیكییە لەمەڕ كورد، هەندێك بەعەیبەی دەبینن، بەڕێزان مالیكی كابرایەكی تا سەر ئێسقان براگماتیزمییە، لەسەر بەرژەوەندی دەكرێت تا كۆتایی مامەڵەی لەگەڵ بكەیت، بەڵام زیرەكیشی دەوێت بتوانیت بەرژەوەندی گەلەكەت لەگەڵ بەرژەوەندییەكانی ئەودا بسازێنیت، بەتایبەت ئێستا عێراق وڵاتە ‌و ئەویش یەكێكە لە داخوازانی نەهێشتنی بنەمای تەوافوق لە پێكهێنانی حكومەت و بەڕێوەبردنیدا، عێراقیش ئێستا وڵاتێك نییە وەك چوار ساڵ لەمەوبەر، زۆر بەهێزترە، مالیكی لەیەك مەرحەلەدا پێویستی بە كوردە، هاوپەیمانی بۆ گەڕانەوە بۆ دەسەڵات، ئەوەش لەهەموو شت گرنگترە بۆ سیاسەتمەدار، بەڵام وریایی كە كێشەو داواكارییەكانی كورد وەك جاران كەڵەكە نەكەن و چەندساڵ تێپەڕبێت بەسەریاندا‌و دواییش بگەڕێینەوە خاڵی سەرەتا..لەهەموی گرنگتر یەكپاریچەیی كوردستانییەكانە..

شێروان شەمیرانی

له دایكبووی ساڵی ١٩٧٣.
خاوەنی دبلومی باڵاو بكالوریوس له فكری ئیسلامی - بەغدا.
بەربرسی بەشی رۆشنبیری سەندیكای رۆژنامەنووسانی كوردستان لقی بەغدا ٢٠٠٦ .

خاوەنی ٤ كتێبی چاپكراو، بڵاوكردنەوەی زیاد له ٣٠٠ بابەت و توێژینەوە .
میوانی بەردەوامی كەناله كوردی و عەرەبییەكان بو تاوتوێكردنی برسه سیاسی و فكرییەكان.