بۆچی ئیسرائیل سەركەڤت و عەرەب شكەستن؟!

  شەممە, 06 کانونی دووەم 2018 14:51

ئەرێ‌ عەرەبان د نیڤ چەرخیدا چ ب دەستڤەئینایە، سەرەرایی كێشا وان یا شارستانی ل هەمبەری ئیسرائیل؟!
ئەرێ‌ ئیسرائیل چ كریار ئەنجامدان هەتا سەركەڤت ل سەر عەرەبان؟
هەتا بشێن بەرسڤێ‌ ل سەر شكەستنا عەرەبان و سەركەڤتنا سەهیونیان بدەین، ئەڤ چەندە گەلەك شرۆڤەكرنا ب خوەڤە دگرت، لەورا د ڤی بابەتیدا دێ‌ پتر گرنگیێ‌ ب ئەگەرێن "ناڤخوە"كەین، بەری بچین ئەگەرێن دی، داكو مەزنیا بێ‌ ئاگەهیا مە دیاربت.
ژیوارێ‌ عەرەبی گەلەك پێدڤی ب وێ‌ چەندێ‌ ناكەت مرۆڤ كویر بەرێخوە بدەتێ‌ هەتا ئەگەرێن پاشكەڤتنێ‌ ببینت، دیسان ژیوارێ‌ ئیسرائیلی ژی پێدڤی بەرێخوەدانەكا كویر ناكەت هەتا ئەگەرێن سەركەڤتنا وێ‌ ژ خەلیجی هەتا زەریا ناڤەڕاست ببینین، ئەوژی:
- ئەگەر هندەك ئەگەرێن جیهانی یێن مادی نەبن، ئەوژی چونكی یێن د ناڤ هەمی جیهانێدا بەلاڤبووین و جیهانا پێش ئێخستی، وەكۆ (ئاڤاكرن، ڕێك، هەمی هوكارێن دی، ڕێكێن پەیوەندیێ‌، بلندبوونا ڕێژا ژیارێ‌، ...هتد).
- هەمی دەولەتێن عەرەبی، ژ لایێ‌ شارستانیڤە بێ‌ پاشڤە لێدانا ئێكێ‌ بتنێ‌ ژی، یان د جهدا ڕاوەستیاینە، یان ژی پاشڤە زڤرینە، ب تایبەت د گورەپانا (هزری، پەروەردەی، ڤەكۆلینێن زانستی، سیستەمێ‌ سیاسی).
داكو بابەت بەرفڕەه نەبت و ئەم نەچین ئەڤان هەمی مەیدانێن مە بەحسكرین، دێ‌ ل ڤێرە بتنێ‌ ل سەر ئێك بابەت ڕاوەستین، ئەوژی "سیستەمێ‌ سیاسی"یە.
سیستەمێ‌ سیاسی ڤانا ب خوەڤە دگرت:
"ژێدەرێ‌ شەرعیەتا دەستهەلاتێ‌، پەیوەندیا حاكمی ب ژێردەستێن ویڤە، كریارا ئاڤاكرنا دەولەتێ‌ ب بەردەوامی و پاراستنا وان، سەركرداتیكرنا جڤاكی و ڕێڤەبرن ل دویڤ ژیانا سەردەم".
جارەكا دی دێ‌ بێژین ئەم پێدڤی ب نموونێن "فاشلێن بەردەوام" نینین ژبۆ سیستەمێ‌ دەستهەلاتا عەرەبی- چ پاشاتی بن یان كۆماری- داكو بهێن خوە مەزن بكەن! ڤان كاران بكەن:
(شەرێ‌ ناڤخوەیی، شەركرن دژی دەولەتێن دەورۆبەر – ئەوێن ژ ئێك ڕەگەز-، پاشكەڤتنا پیشەسازی و تەكنۆلۆژی، پشتبەستن ب بەرهەمێ‌ دەولەتێن دی، گەلەك مەزاختن ل تشتێن نەپێدڤی، برسیكرنا پۆلیسی، ب كارئینانا ڕاگەهاندنێ‌ بۆ دەستهەلاتێ‌، كێمكرنا ڕەوشەنبیران، لاوازكرنا ئالیێن سیاسی و ڕێكخراوێن جڤاكێ‌ مەدەنی، لاوازكرنا دینی د ناڤ جڤاكێ‌ عەرەبیدا، بهێزكرنا تایفەگەریێ‌، توندۆتیژی، پەقاندن و ترسێ‌)، پاشی بەری ئەڤێ‌ و پشتی ئەڤێ‌ هەمیێ‌ ژی ئەو بزاڤێ‌ دكەن بنەمایێ‌ هێزێ‌ دەستهەلاتێ‌ بگرن دەست، حوكمێ‌ تاكەكەسی ب سەر هەر ڕەخنەیەك و كێشەیەكێ‌ دئێخن.
ب تێگەهێ‌ بەرۆڤاژی: ب ئێك ژ ڕێكێن شرۆڤەكرنێ‌، وەرن دا بەرێخوەدانێ‌ ل سیستەمێ‌ سیاسیێ‌ سەهیۆنی بكەین- ئاخڤتنا مە لڤێرە دێ‌ ل سەر وێ‌ بت یا د ناڤبەرا واندا، نەكو ئەوا سەهیۆنیێن (داگیركەر، ئاڤاكەرێن كومەلگەهێن سەهیۆنیێن توندڕەو)ل سەر دچن، دژی خودانێ‌ ئەردی یێن ڕەسەن (فەلەستینی، چ عەرەب ل سالا 1948 و چ یێن دی) ئیسرائیلی ب تایبەتمەندیا خوە – سیستەمەكێ‌ جوداكەرێ‌ ڕەگەزپەرستێ‌ دژوار و گەلەك خودان تۆمەت- وەكو دیار هەتا نهاژی سیستەكەكێ‌ جەكدارێ‌ سەربازییە.
ژ دەما ئێكەم كومەلگەها سەهیۆنی ل فەلەستین هاتی ئاڤاكرن، ئەڤە تایبەتمەندییا وێ‌ بۆیە:
- هێزا دەنگدەران ژێدەرێ‌ ئێكانەیێ‌ دەستهەلاتا شەرعیا سەهیۆنیایە، هەر ژبەر هندێ‌ سیستەمێ‌ سیاسی د دەولەتێ‌ دا یێ‌ فڕەئالیە، بێكۆ ئێك ژ وان پاشڤە لێ‌ بدەن، ژبەر هندێ‌ ژی سیستەمێ‌ وان هەر نەوەك ئێكییەكا سیاسی و ڕەوشەنبیری و دینی و ئابووری پشتگوه دهاڤێن، هەر ژ بەر هندێ‌ ژی چ سەركردێن ئیسرائیل توشی كودەتایێن سەربازی نابت، د دەمەكێدا دەولەتێن عەرەبی تێدا خەندقینە!
- ژ دەما ئیسرائیل هاتییە دامەزراندن د ناڤ بزاڤ و خەباتا بەرەڤانیكارا عەرەبی و فەلەستینیا چەكدار و نەچەكداردابوویە، بەلێ‌ هەتا نوكە ئەوێ‌ چ حوكمێن عورفی نەدەینادینە، ئەوان هیچ یاسایەكا بلەز نەئینایە پێش، دیسان چ دادگەه نەئیناینە بتنێ‌ بۆ هندەكان،دیسان دەنگێ‌ ئازاد و خوەپیشاندانێن جڤاكی سەركۆت نەكرینە- سەرەرایی هەبوونا چەندین كێشێن ڕوی ب ڕوی وێ‌ بووینە، لێ‌ هیچ جارەكێ‌ هەلبژاردن پاش نەئێخستینە و پەرلەمان تەجمید نەكرییە!
- سەرەرایی هەبوونا گەلەك نەوەك ئێكیان د ناڤبەرا سەركردێن دەولەتێدا، بەلێ‌ د سەر هندێرا ئالیەكێ‌ سیاسیێ‌ حوكمەتا وان ب تنێ‌ ڕێك نەدایە خوە ئالیێن دیێن ئۆپۆزسیۆن بشكێنیت و تومەتا كۆشتنێ‌ پالدەن سەركردەیەكێ‌.
- سەرەرایی هەبوونا چەندین سەركردێن دیرۆكی ل دەڤ وان، لێ‌ هەتا نها بتنێ‌ ئێك ژ وان سەركردان ژی ڕەوشا خوە وەكو ڕەوشا سەركردێن عەرەبێن فاشل لێ‌ نەكریە، بگرە ژ "پیرۆزكرن، پاراستنا وان بۆ نەدانا باجان، سەركەڤتن ب سەر یاسایێدا و دەستۆریدا".
دەما پشتڕاستبووین "دیڤید جوریون"ێ‌ – بابێ‌ دامەزرێنەرێ‌ دەولەتا ئیسرائیلی- بەرۆڤاژی یاسایێ‌ كاركری و هندەك كریارێن چەكداری بێ‌ ئاگەهیا وەزیرێ‌ بەرەڤانیێ‌ ل مسرێ‌ ئەنجامداین، ل وی دەمی حزبا وی ئەو ژ سەركرداتیێ‌ ئێخست و پاشی ژ سەرۆكاتیا حوكمەتێ‌ ژی ئێخست، ئێكێ‌ ژی نەگوت: ئەڤە كورێ‌ جوریونییە یێ‌ فلان و فلان كار كرین، ئەوێ‌ هەمی ژیێ‌ خوە د دروستكرنا كومەلگەهێن سەهیۆنیاندا دەربازكری، نەگوتن: ئەڤە ئەو كەسە یێ‌ سەركێشیا مە دكر ل شەرێ‌ لگەل "7 هێزێن عەرەبی ل سالا 1948"، یان ژی ئەو كەسێ‌ بەرنامێ‌ ناڤووكی دەینادی، ئەرێ‌ دێ‌ چەوا ل سەر ڤێ‌ خەلەتیێ‌ سزادەین؟! ئەرێ‌ دێ‌ چەوا ئیسرائیل پشتا خوە دەت ڤی سەركێشێ‌ هندە مەزن و خزمەتكری، -ب ڕاستی ژی سەركردەیەكێ‌ زیرەكبوو بۆ وان-؟!
هەردیسان دەما سەهیۆنیان دیتی هەڤژینا "ئیسحاق رابین"ی هەژمارەكا بەنكی بۆ خوە ل ئەمریكا ڤەكری، ب تایبەت ل وی دەمێ‌ هەڤژینێ‌ وێ‌ بووی بالیۆز ل "واشنتۆن"، ئەوێ‌ هەژمار بتنێ‌ "13هزار دۆلار"تێدابوون، ئەڤ یەك د دەمەكێدابوو د یاسایا واندا دروست نەبوو بۆ كەسەكێ‌ جۆهی هەژمارەكا بەنكی ژ دەرڤەیی ئیسرائیل هەبت، ب هەبوونا ڤێ‌ چەندێ‌ سەهیۆنیان گڤاشتن ل سەر "ئیسحاق رابین"ی كر هەتا دەستا ژ پۆستێ‌ خوە بەردەت، پاشی هەڤژینا وی هات دادگەهكرن و سزادان، بێكو كەسەك بێژت: ئەرێ‌ دێ‌ چەوا ئەڤێ‌ كریارێ‌ لگەل قارەمانێ‌ سەركەڤتنا "1967"كەن(ئەو سەركەڤتنا ب دامەزراندنا دوویێ‌ یا دەولەتا ئیسرائیلی دئێت نیاسین)؟! د دەمەكێدا ترسا ڤی كەسی د ناڤ مسڕ و هەمی دەولەتێن عەرەبیدا بەربەلاڤبوو ب هندێ‌ ئەڤە خودانێ‌ ئێكەم هێرشا عەسمانیبوو، نە بتنێ‌ ئەڤێ‌، بەلكو هەمی هێرشێن وان یێن (عەسمانی و ئەردی، هشكانی و ئاڤێ‌، باكوور و باشوور، ڕۆژهەلات و ڕۆژئاڤا) دبن چاڤدێریا وی دابوون، ئانكو ئەو كەس بوو یێ‌ ئیسرائیلیان بۆ خوە گەلەك شانازی پێ‌ دبڕ، هەتا ئەڤ گوتنە د دەرحەقا ویدا دگوتن"دیاریا خودایێ‌ ئیسرائلییە بۆ گەلێ‌ ئیسرائیل".
هەردیسان گرتنا "ئەیهود ئولمێرت"ێ‌ سەرۆك وەزیرێن بەرێ‌، ب تومەتا خارنا بەرتیلان، د دەمەكێدا ئەڤی كەسی ژی خزمەتا ئیسرائیل كربوو دەمێ‌ شیایی قودسێ‌ بۆ ئیسرائلیان بەرفڕەهكەت،
دا نوكە سەحكەینە جوداهیەكا ب گری، نەیا دۆماهیێ‌، هەمی سەركێشێن جۆهیان یێن سەربازی دەما دەمێ‌ وان یێ‌ یاسایی ب دۆماهی دهێت، دەستان ژ كارێ‌ خوە بەرددەن، هەتا ئەگەر ئەو د ناڤ شەری ژی دا سەركەڤتبن، هەروەكو ئەوا ل سەر "موشی دیان" سەپاندی ب تایبەت پشتی شەرێ‌ "1956"، دیسان لسەر "ئیسحاق ڕابین"ی سەپاندی پشتی شەرێ‌ "1967"، یان ژی "ئەریێل شاروون" سەركردێ‌ شەرێ‌ مەزنێ‌ "1973"ێ‌.
- هەردیسان جوداهیا نەخوەشا د ناڤبەرا ڕادیكالێن دینێ‌ مە و وان دا، ئەوژی:
پتریا كەساتیێن توندڕەوێن وان یێن دینی- نەكێم- پێگیرن ب یاسا و دەستۆر و هەلبژاردنان د ناڤ جڤاكێ‌ ئیسرائیلیدا، د سەر هندێرا نابێژن:"ئەڤە توندڕەویا دیمۆكراتییە"یان"توندڕەویێ‌ ب دیمۆكراتیێ‌ دكەن"؟!
بەلێ‌ توندڕەوێن دینیێن مە چ تشتی نوزانن، ژبلی ئاسن و ئاگر و ئاڤ هندەك خوەچەماندنان د ناڤم الێن خودێدا!
د دۆماهیا ئەڤێ‌ بەراوردكرنێدا، من دڤێت بیرا وە "مسڕیا ب تایبەت و عەرەبا، مۆسلمانان ب گشتی" بینم:
- گەندەلی د ناڤ مەدا – د ناڤ هەمی تەخ و چینێن جڤاكیدا- یا بووی بنەمایەكێ‌ سەرەكی، ئانكو ئەم یێن ژ قۆناغا "بەلاڤبوونا گەندەلیێ‌ د ناڤ جڤاكی"دا بەرەڤ قۆناغا "شەرعیەتدان و پیرۆزكرنا گەندەلیێڤە دچین"ب هزرا وێ‌ چەندێ‌ ئەڤ یەك سەرەكییە (ئەم یێن ل دویڤ سیستەم و قانوونێ‌ دچین)!
- ل سەر هەبوونا جوداهیێ‌ د ناڤبەرا دەولەت و جڤاكاندا ژی، ڕاستە د ناڤ هەمی دەولەتاندا گەندەلی یا هەی، بێگۆمان ئەڤە سرۆشتەكە ژ سرۆشتێن مرۆڤاتیێ‌، بەلێ‌ جوداهیا هەی د ناڤبەرا واندا: ئەگەر گەندەلی ل دەڤ وان "لدەڤ هندەكان بت، خەلەتییەك بت، دیاردەیەك بت، نەخوەشیەك بت – هەتا ئەگەر گەلەك بەلاڤ ژی ببت- ل سەر ڤێ‌ هەمیێدا ئەو دژاتیا وێ‌ دكەن"، بەلێ‌ گەندەلی ل دەڤ مە یا بووی "بنەما و سیستەم" و كێمەك " ل سەر ناچن، ڕەددكەن، خوەژێ‌ خلاس دكەن".
هندەك ژ وان ڕاستیێن عەرەب لگەل ئیسرائیلیان ڕوی ب ڕوی دبن:
1- هەر دەه خێزانێن سەهیۆنی، نەه خێزان ژ وان هێزا ڕۆژێ‌ بۆ كارەبێ‌ ب كاردئینن.
2- بلندترین ڕێژا فەرمانبەرا ل كۆمپانییا مایكرۆسۆفت، ل دویڤ ڕەگەزناما وان د بنەرەتدا جۆهی نە.
3- ئێكەم بەرنامێ‌ كۆمپیۆتەری یێ‌ دژی ڤایرۆسان"ئەنتی فایرۆس" ژ لایێ‌ وانڤە هاتییە دروستكرن.
4- د ناڤ ئیسرائیلێدا بلندترین ڕێژا باوەرنامێن خواندنێ‌ هەنە ل هەمبەری ڕێژا خەلكێ‌ وەلاتی.
5- ئیسرائیل ئێكە ژ وان دەولەتایە پترین پەرتووكا وەردگێرت سەر زمانێ ندی.
6- د جیهانێدا ل پلا سێیێ‌ دهێت بۆ هەبوونا پترین دەرفەتێن كاری.
7- بتنێ‌ نەه دەولەتان هەیڤێن دەستكرد هناردینە بۆشاهیا عەسمانی، ئیسرائیل ئێك ژ وانایە.
8- ئیسرائیلێ‌ ژێرخانەكا تەماما ئابووری یا هەی بۆ ڤەكۆلین و ڤەدیتنێن زانستی، هەتا شیاین د ڤی ئالیدا بگەهت پێشكەڤتنەك باش ژ زانستێ‌ گەشەكرنا كۆرپەلەی و تیشكێ‌ و وێنەكرنا نەخشەیان و زانستێ‌ بایلۆژی و پیشەسازی و ئاڤاكرن و زانستێن دی یێن هەر ئەم چ ژێ‌ نوزانین ژی، ئەگەرێ‌ سەرەكیێ‌ ئەڤێ‌ پیشكەڤتنا زانستی ژی ل دەڤ سەهیۆنیان "تەیساندن و تازەكرنا وێنێ‌ داگیركاریێ‌ یە جیهانێدا".
9- ل سالا "1909"پێڤە د ناڤ جهێن سەهیۆنیاندا بنگەهێن ڤەكۆلینێن چاندنێ‌ هاتییە دەینان، ئەوان بەردەوام ڤەكۆلین لسەر چاندن و ئاخێ‌ كرییە، هەتا بنگەهەكێ‌ حكومیێ‌ تایبەتمەند ب چاندن و گەشەپێدانا وێڤە هاتییە دامەزراندن، ئەڤە ئێكبوو ژ ڕێكخراوێن بهێز بۆ دامەزراندنا دەولەتا سەهیۆنی، سەرەرایی هەبوونا چەندین كڤاشتنان ژی لسەر ئیسرائیلیان لێ‌ دەست ژ ڤێ‌ چەندێ‌ نەبەردایە، ئەڤە دیاردكەت هەر تشتەك ل دەڤ وان "ڤەكۆلین كرییە".
10- لەورا شەرێ‌ عەرەب و مۆسلمانان لگەل داگیركاران مەزنترە ژ "دزیكەر و هاتی شەلاندن".
11- شەرێ‌ مە؛ شەرەكە لگەل "دكتاتۆر و ستەمكارێن دەستهەلاتدارێن مە" ئەوێن ئەم سەرشۆركرین وەكۆ بەرازی! ئەوێن ئەم وەكۆ 22 قەفەسێن مەیمینكان لێ‌ كرین"ناڤكرین ب 22دەولەتێن عەرەبی"، ئەوێن ئەم ژ ئیمپریالیزما جیهانی ڤەكرین و كرینە چەندین هێزێن "سیاسی و سەربازی و ئابووری...هتد!".
12- شەرێ‌ مە؛ شەرێ‌ "هەبوونێ‌ یە د ژیانێدا" لسەر هەمی جوداهی و گورەپان و ئاستێن ڤێ‌ هەبوونێدا.
13- شەرێ‌ مە؛ شەرێ‌ "وەرگرتنا چەنداتیا دۆژمنییە، پاشی دیاركرن و ئاڤاكرن جهێ‌ خوەیە لسەر ڤێ‌ چەندێ‌".
14- شەرێ‌ مە؛ شەرەكە لگەل "بهایێ‌ ڤەكۆلینان" د ناڤ جڤاكێ‌ مە ئەڤێ‌ بتنێ‌ "لێزڤرین و وەرگێرانەكا باش بۆ دڤێـت" نەزێدەتر.
15- شەرێ‌ مە؛ شەرەكە لگەل "ڕێباز و وەرگێران و ڤەكۆلینان".
16- شەرێ‌ مە؛ لگەل "پشتگۆهخستنا عەقلییە" بەرامبەر "پیرۆزكرنا هندەك خورافاتان".
17- شەرێ‌ مە؛ ب كۆرتی، مە یێ‌ شێلاتی و تاریكری ل سەر هندەك مینبەرا ب "ڕاگەهاندنا جوداهیێن د ناڤبەرا مەدا" یان ژی لسەر "دەركەڤتنا مەهدی" و "هاتنا خارا عیسایی".
18- شەرێ‌ مە؛ دڤێت پێناسا وی بهێت ڕاستڤەكرن ئەوا ب "ماددێ‌ ئاڤاكرنێ‌" ژ وێ‌ ڕۆژنامەگەریا تەعبان یا بتنێ‌ هێڤییا وێ‌ داگرتنا چەند ڕێزان.
19- د نوكەدا "67"سال ب سەر دەولەتا ئیسرائیلدا دەربازدبن، بەلێ‌ ژیێ‌ ئیسرائیل درێژترە ژ ڤێ‌ چەندێ‌، درێژتر ژ عومرێ‌ كارێن لاوەكیێن مە و پیرۆزكرنا مە و جوداهیێن مە.
20- لەورا ئەڤرۆ خەونان ب زڤرین و ڤەگەراندنا فەلەستینێڤە نابینم، بەلكۆ خەونێن من ژ هێڤیان ڕاوەستیایە ب "دووبارە پێناسەكرنا شەرێ‌ مە ب ڕەنگەكێ‌ ژێهاتی"، یان ژی "دووبارە پێناسەكرنا دۆژمنی" یان "دووبارە پێناسەكرنا شكەستنا مە"، ئەگەر ئەم ڤان كریاران نەكەین، ل وی دەمی بلا هەر چاڤەرێ‌ شكەستنێن دی ژی بین د پاشەرۆژێدا.
بابەتی دێ‌ ب دۆماهی ئینین ب گوتنەكا (محمد الغزالی) دەما دبێژت: "ئەگەر لگەل خرابیا شەرێ‌ دەرەكی، ناڤخوەیا مە تێك بچیت، ل وی دەمی ئەڤە گەلەك خراپ و پیسترە".
هەروەسا هوزانڤان (نزار قەبانی) دبێژت: "سەهیۆنی نەهاتینە د ناڤ مەدا د سنۆراندا، بەلكۆ وەكو مێریان ئەوان ژ كێماسیێن مە خارینە".