پانۆرامای شۆڕشی كورد وسەدەیەك لەشكستی سەركردەكان

  پێنج شەممە, 11 کانونی دووەم 2018 12:31

 

لەتەواوی ناوەندە نێودەوڵەتیەكان و ویژدانی بڕیاربەدەستانی جیهاندا نكــولی لە ژێردەستی گەلی كورد و داگیركرانی خــاكەكەی ناكرێت هەمووان بە شایستەی دەوڵەتی دەبینن. ئەوەش حاشاهەڵنەگرە بەدرێژایی سەدەی ڕابووردو كەبە سەدەی ئازادی گەلان ناسراوە لەناهەموارترین دۆخدا چیاكانی كوردستان لە شۆڕشگێڕ وپێشمەرگە چۆڵنەبوون و تروسكەی گڕی شۆڕش بۆساتێكیش خامۆش نەبووە كەچی گەل هێشتا ژێردەستەیە و خاك لەتلەت و داگیركراوە؟؟ ئەمە ئەو پرسیارە بێوەڵامەیە مێژوونوسان و چــاودێرانی سیاسی بەدوای شرۆڤەی ڕەهەندەكانی شكست و ئاشكرابوونی لوغزی گرێكوێرەی ڕاستیەكانەوەن .

ئاخر جێگەی سەرسوڕمانە لەگەڵ ئەوهەموو شۆڕشە یەك لەدوای یەكانەی لە پارچەكانی كوردستان هەڵگیرساون وخەباتی بێوچانی شۆڕشگێڕان وبەخشینی بێدرێخی خوێنی باشترینی ڕۆڵەكانی گەل , بەڵام تائێستە كـــورد بەژێردەستەیی عەرەب و تورك و فارس ماوینەتەوە؟؟!!!

كـــورد گەورەترین گەلی بێدەوڵەتە لەدونیادا وەك نوسەرێكی عەرەب دەڵێت ( اڵاكرادْ شعبُ اللهِ المحـــتاڕ فی الارظ) بەداخەوە لێرەدا بوارنیە مێژووی رخەباتی ِزگاریخوازی تەواوی گەلان تاوتوێ بكەین لەم سەرپێیەدا ئاماژەیەكی كورت بەچەند نموونەیەك و بەراوردیان بە حالەتی كوردستان دەكەین بۆ بەرچاوڕوونی زیاتر . هیندستان بەنموونە پیاوێك بەناوی غاندی بەهۆی راِستگۆیی لەگەڵ خواستی ڕەوای گەلەكەی و لەنێو ئاپۆڕای گەلەوە توانی لەماوەیەكی كورتدا سەربەخۆیی ووڵاتەكەی لە زلهێزترینی دەوڵەتانی دوونیا(بریطانیا العظما) بەدەستبێنێت گەلەكەی وەك پاداشت نازناوی (مەهاتما) بەواتای ڕۆحی پیرۆزیان پێبەخشی.لەساڵی 942 غاندی بانگەوازی (بریتانیەكان هیندستان چۆڵكەن) ی ڕاگەیاند گەل بەدەم بانگەوازەكەیەوەهاتن و توانیان سەربەخۆیی بەدەستبێنن. دوای سەربەخۆیی غاندی وەك جاران بەسادەیی و هاوشێوەی هەرهیندیەك مایەوە نەكۆشك و تەلار نە كۆمپانیاو پاڵاوگە نەپارەی بلۆك لە بانكەكان... نموونەی دووەم /كۆمەڵە گەنجێكی لاتڤی لەڕیغای پایتەخت گردبوونەوەیەكی شۆڕشگێڕانەیان بۆ ئازادی ووڵات كرد و هاواریانكرد (ڕوسیەكان بۆدەرەوە لاتڤیا ئازادە) ئەم دەنگە ڕاستگۆییانەی چەندگەنجێك سەریكێشا بۆ هەڵوەشاندنەوەی ڕوسیای سوور كە لە ساڵی 944 بەزۆر دەوڵەتانێكی زۆری دەوروبەری بندەست كردبوو سەرەنجام هەموویان سەربەخۆییان بەدەستهێنا. نموونەی سێیەم/ لە 993 تشیكۆسلۆڤاكیا پاش چەندین شەڕی خوێناوی بۆماوەی چەندساڵێك هەڵوەشایەوە كۆتاكەیان كۆسۆڤۆبوو لە 2008 سەربەخۆیی بەدەستهێنا . نموونەی چوارەم/ جەبەل اسوەد لە 2006 ڕیفراندۆمی جیابوونەوەی لەصربیا ئەنجامدا كە ڕێژەی بەشداربوان 85/100 بوو لەو ژمارەیەو 55,5/100 بۆسەربەخۆیی دەنگیانداو جیابوونەوە. نموونەی پێنجەم/ جنوبی ئەفریقیا دەوڵەتێكی ڕەگەزپەرست كەمینە سپیەكان زاڵبوون و ڕەشپێشتەكان چەوسێنراوەو بندەستبوون (نیلسن ماندێللا) توانی شۆڕشی سپی و دواتر خەباتی چەكداری لەدژی ڕەگەزپەرستی بەرپابكات و لەوپێناوەدا 27 ساڵ بەندكراوە پاش ئازادبوونی لە 993 خەڵاتی نۆبڵی ئاشتی پێبەخشراوە , لەكۆتاییدا توانی بەڕێگەی دیموكراتی سەركەوێت و لە هەڵبژاردنەكانی 994 بووبە یەكەم سەرۆكی زۆرینەی ڕەشپێستەكان بەڵام لە 999 هەرچەندە پارتەكەی و جەماوەر فشاریان كرد بۆدووبارە خۆكاندیدكردنەوەی قەبووڵینەكرد و ووتی بانەبێتە باو ئێمە شۆڕشمان بۆ ئازادی گەل بەرپاكردوە پێویستە دیموكراتی و سیستەم بچەسپێت ... ئەمانەم تەنها بۆنموونەبوو پرسیار ئەمەیە .


ئەدی ئێمەی كورد هەموو ئەو هەنگاوانەمان ( شۆڕش, خۆپیشاندان , هەڵبژاردن , ڕاپرسی..) تاقیكردەوە كەچی هەر بندەستین !! بۆ ئێمەی كورد نەگەشتین بە سەربەخۆیی ؟؟؟


هەرچەند بۆ وەڵامدانەوەی ئەم پرسیارە پێویست بە كتێبێك دەكات بۆ هەڵدانەوەی یەكبەیەكی لاپەڕەكانی مێژووی خەباتی ڕزگاریخوازی گەلەكەمان , بەڵام من ئەوەندە عەزیەتی بەڕێزتان نادەم تەنها لەچەند بڕگەیەكی كورتدا بەراوردێك لەنێوان سەركردە كوردەكان وئەوانیتر دەخەمە پێشچاووتان تا بۆخۆتان وەڵامبدەنەوە و هەربەخۆشتان حوكمی ڕاستی ڕووداوەكان بدەن كاتێك غاندی بووبە (مەهــاتما) ڕۆحی پیرۆز بەهۆی ژیانی سادەو دانەبڕانی بوو لە هاووڵاتیانی هیندی وسەربەرزانە و بێگەندەڵی و ستەم خەباتی دوور لە توندوتیژی بەڕیوەدەبرد و لەوپێناوەدا ئەشكەنجەو ئازار وزیندانی زۆری چێشت, ئەی سەركردەكانی ئێمە لەكوێی جەماوەرەكەیاندان ؟ ئایا ژیانیان وەك هاووڵاتیانە؟ كامە خەڵاتی ئاشتی و خۆنەویستی و داهێنان ئایا ڕازین وەك ماندێللا دەستبەرداری دەسەڵاتبن بۆ چەسپاندنی سیستەم و دیموكراسی ؟؟ لە جەبەل اسوەد كاتێك ڕیفراندۆمیان ئەنجامدا كردیان بە هەلی سەربەخۆیی و توانیان هەموو هێزو لایەنەكانیان یەكبخەن وبە یەكدەنگی دەوڵەتی سەربەخۆ ڕابگەیەنن , ئەی لایەنە سیاسیەكانی كوردوستان لەپاش گشتپرسی چییان كرد؟ ئایا یەكدەنگ بوون؟ و سەروەری نیشتمانیان بەسەر ڕق و تۆڵەو لوتبەرزیدا زاڵكرد ؟ یان پێچەوانەكەی؟


هەرموو ئەو دەوڵەتانەی كە وەك ئێمە داگیركرابوون یەكەم هەلی سەربەخۆییان قۆستوەتەوە و دەوڵەتی نیشتمانیان تێدا ڕاگەیاندوە دیسان دەپرسم بڕیاربەدەستانی كورد چۆن مامەڵەیان لەگەڵ هەلی بەردەستدا كردوە؟ ڕوخانی ڕژێمی بەعسی داگیركەربەنموونە ئایا توانیان چی بكەن ؟ ڕیفراندۆم بەنوونەیەكیتر ئایا دەوڵەتملن ڕاگەیاند یان نیوەی خاك و هەموو سەروەریمان لەدەستدا ؟...


بەداخەوە هێشتا لە كوردستان فەلسەفەی داگیركەرانی كوردستان زاڵە بەسەر نوخبەی سیاسی و بڕیاربەدەست فەرمانڕەواكانماندا چەمكی (حزب القائد و القائد بالضرورة) پەیڕەودەكەین . زمانی چەك قەڵەمڕەوی دەكات و كورسیەكی چەك یەكسانە بەدەنگی دیموكراسیانەی هەمووگەل !! میلەت سەرماو گەرماو برسی و بێدەرەتان و ماڵوێران ئەوانی سەركردە لە دیجیتاڵ و پیاسەو بازرگانیدان و سەرگەرمی ململانێی شەخصی و حیزبین !! ئەمانە ڕاستیەكانن

جارێكیتر دەپرسم/ چی وایكردوە ئێستە بەغدا بێمنەتبێت لە پێشمەرگەو حساب بۆ كورد نەكات؟؟ ئەی تورك بۆ سەركوتمان دەكەن و دەمانچەوسێننەوە؟؟ ئەدی براو كەسوكارەكانمان لە ئێرانحاڵیان لەهەمووان خراپتر نیە؟؟ ئەی هۆكار چیە بەشێكی كورد چەپڵە بۆ عەبادی لێبدەدات ؟؟ لەولاشەوە حەشدی وەحشی خاكمان داگیردەكات و ئاڵامان دەسوتێنێ و دەستدرێژی بۆسەر ماڵ و ناموسی كورد دەكات؟ تۆ بڵێی تاوانی غاندی و ماندێللاكانی مێژووبێت!!!؟؟ یان نەبوونی هاوشێوەی ئەوانە گەل وەك مەڕی بێشوانە؟؟

ئێستە گەشتن بە وەڵامی ڕاست ؟؟ بەتێڕوانینی من خۆخۆری و خۆپەرستی و ناوچەگەری و گەندەڵی و خۆ بەخوداكردنی سەركردەكان هۆكاری مانەوەمانە بە ژێردەستی . دڵنیام هەزاران هەل بڕەخسێت هەروا وەك سەروەتوسامانی ووڵات بەهەدەردەچێت , هەتا سەركردە دەستبەرداری ئاكارە دزێوەكان نەبێت گەل پەرتەوازەو بندەست دەمێنێتەوە.
بێرنارد شۆ دەڵێت زۆرجار فاشیلەكان پاساوی دۆراِندنەكانیان بە نالەباری بارودۆخەوە دەبەستن بەڵام من بڕوام بە نەگونجانی بارودۆخ نیە سەركەوتوەكان بەدوای بارودۆخی گونجاودا دەگەڕێن ئەگەر نەیاندۆزیەوە ئەوا خۆیان بارودۆخی گونجاو دەخولقێنن و دروستیدەكەن .