یەكگرتوو، حزبێكی نمەك سوێر!

  شەممە, 20 کانونی دووەم 2018 12:53

 

جیاواز لە هەموو حزب و لایەنەكانی تر (یەكگرتوو) هاتۆتە دنیا و، ئاشنای خەڵكی هەرێمی كوردستان بووە. جیاوازیەكانی (یەكگرتوو) زۆرن، بەڵام یەكێك لە جیاوازیە قوڵەكانی ئەوەیە ئەم حزبە بەرلەوەی قەد ولق و پۆپ باڵا بكات، (بەڕوو) ئاسا خەریكی خۆ قایم كردن و رەگ داتاكوتان بووە بە بەقوڵایی زەویدا. چونگە (یەكگرتوو) بەر لە ئیعلانكردنی حزبێكی رێكخرابوو. دوای راگەیاندنیشی كە لە ئێستادا بەرەو ساڵیادی ئەم حزبە هەنگاو ئەنێن، هەر جیاوازە و هەر بەم جیاوازیەش ئەمێنێتەوە. یەكێك لە كێشەكانی ئەم حزبە، ئەوەیە كە سیاسەت و هەنگاوەكانی بۆ رای شەقام و خەڵكی نا ئاشنا بەم حزبە، بە ئاسانی وەرناگیرێ‌ و مانا و مەبەستەكانی بەخەڵكی دەرەوەی خۆ ناگات.

بەداخەوە خەڵكی ئێمە لە ئەنجامی شێوازی مامەڵەی نا مەنتیقی لەگەڵیا، لە لایەن دەسەڵاتدارانی عێراق و هەرێم، زۆر حەزیان لە بڕیاری خێرا و زمانی زبر و نابووتكردنی ئەوانی تر و، قسەی بازاڕی موزایەدە و شەڕە تەعلیق و ئەم جۆرە شتانەیە.


بەڵام كێشەی ( یەكگرتوو ) ئەوەیە، كە نەخاوەنی ئەم زمانەیە و، نە لە ئەدەبیاتی خۆیدا رێگا بەم جۆرە زمان و شێوازی مەمەڵەیە ئەدات، راستی زۆرێك لە خەڵكی ئێمە تەنها فێری رەش و سپی كراوە و، جگە لەم دوو رەنگە بڕوای نیە لەنێوان ئەم دوو رەنگەدا رەنگی تریش هەبێ‌.

بۆیە خۆ بەدوور گرتنی (یەكگرتوو) لەم جۆرە زمانە، ئیشتیاقی ئەم جۆرە تایپە لەخەڵك تێرناكات،بۆیە هەندێكان بە مەبەست و هەندێكیشیان بێ‌ مەبەست، بەڕاست و چەپ، بە سەری (یەكگرتوو)دا ئەكێشن و، تەنانەت تۆڵەی حزبەكانی تریشی لێ ئەكەنەوە. جیاوازیەكی تری (یەكگرتوو) ئەوەیە بەرلەوەی حزب بێ‌، فیكرە، مەدرەسەیە، نەهجە، تێڕوانینە، دنیا بینیە، هاوسەنگیە لە نێوان دین و دنیا.


لەماوی 24 ساڵەی تەمەنی ئیعلانی ئەم حزبەدا، بەهۆی ئەم هەموو تایبەتمەندی و جیاوازیەوە، بووە بە هێزێك كە زۆرینەی كەسە باش و تایبەت و زیرەك و بەتوانا و داهێنانكارەكانی نێو زۆرێك لە حزبە سیاسیەكان و، میدیا بە هەموو جۆرەكانیانەوە شوێن پەنجەی قوتابیانی ئەم قوتابخانەیان پێوەیە دیار بێ‌،كە بە شایەتی دۆست و دوژمن ئینكاری ئەم خەڵكانە ناكرێ‌.


لەوانیە ئەمە وەك خاڵی لاوازی ئەم حزبە سەیر بكرێ‌، كە زۆرترین خەڵكی پێشكەش بە دەزگا و پۆستە حزبی و حكومیەكانی ئەم وڵاتە كردوە،ئەم قسەیە ئەگەر بە دیوێكی راست بێ‌،بەڵام بە دیوەكەی تری گەورەیی و تایبەتمەندی ئەم قوتابخانەیە دەرئەخات، كە مۆم ئاسا ئەسوتێ‌، تا ئەوانی تر لەبەر روناكیەكەی دانیشن و سوود لە گڕی سووتانی ئەو وەرگرن.

پێم وایە یەكێك لە گرفتەكانی ئەم حزبە، كە وەك خەڵكی تر خۆشم وتومە ،ئەوەیە زمانی بە بازڕكردنی كاڵا سیاسیەكانی لە مەیدانی سیاسەتدا وەك پێوست نیە و، بانگەشە و ریكلامەكانی بە زمانێكە، كارە باش و چاكەكانی وەك خۆی ناگات.

بۆیە ئەكرێ‌ ئەم حزبە لەم خاڵەدا موڕاجەعەی خۆی بكات، بە هێشتنەوەی تایبەتمەندی و دنیابینی خۆی.

بەداخەوە (یەكگرتوو) حزبێكی نمەك سوێرە!!!ئێستا هەزاران كەس كە لەسەر ئەم كانیە ئاویان خواردۆتەوە و گەورەبوون و شارەزای دنیای سیاسەت و ئیعلام بوون، كەچی ئێستا لە هەمووكەس سەرسەختانە تر، هێرشی زۆر توند و ناڕەوا ئەكەنە سەر ئەم حزبە و، زۆر جار ئەگاتە بوختان و قسە بۆ هەڵبەستن و تەشهیر بەواتای وشە.
بەداخەوە ئەمرۆِ لە دنیای بازاڕی سیاسی ئەم وڵاتەدا، ئەوەی زۆرترین جنێو بدات، زۆرترین تەشهیر و سوكایەتی بكات،داهێنانكاربێ‌ لە بواری درۆ،دكتۆرای هەبێ‌ لە زانستی موزایەدە، بۆڕدی هەبێ‌ لە خەڵەتاند و، چەواشكاری،ئەوە زۆر بەئاسانی ناحەقیەكانی خۆی ئەكات بە حەق و، حەقەكانی بەرامبەریش ئەكات بە ناحەقی،زۆر جار ئەم جۆرە كەسانە بە چەپڵە و فیكە پێشوازیان لێ ئەكرێ‌ و لە خەڵك ئەبن بە رۆستەم.

ئاشكرایە حەق هەم تاڵە و هەم درەنگ وەرئەگیرێ‌،ناحەقیش زۆرجار شیرین ئەكرێ‌ و زووتریش ئەچێتە ناو خەڵكەوە، بەڵام تەنها گڕ و تینی ئاگر و تێزاب، ئاڵتون لە مەعدەن و كانزاكانی تر جیا ئەكاتەوە .

 

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.