كوردایەتی لەنێوان شۆڕش و ماڵەباجێنەدا

  یەک شەممە, 21 کانونی دووەم 2018 11:48

 

ئیرادەی دوژمنكارانەو پیلانی درێژ مەودای براوەكانی شەڕی یەكەمی گێتی (هاوپەیمانان) بەپێی ڕێكەوتننامە شومەكەی سایكس بیكۆی ساڵی 1916 كوردیان بەسەر چواردەوڵەت و سێ نەتەوەی ڕەگەزپەرست و هەمەجی ناوچەكەدا دابەشكرد . بۆئەوەی لەهەر زەمان و سەردەمێكدا بەپێی بەرژەوەندیەكانیان یاری بە چارەنوسی ناوچەبكەن و كورد وەك كارتی فشار بۆ ڕاگرتنی باڵانسی پێگەی سیاسی و سەربازی خۆیان بەكاربێنن .

ئەوەش ڕوونە ئەو سێ نەتەوە (عەرەب و فارس و تورك) بەدرێژی مێژوو ناكۆك بوون وچەندین شەڕی خوێناوی لەنێوانیاندا ڕویداوە دواترینیان شەڕی هەشت ساڵەی عێراق ئێران بوو . بۆیە لەهەر قۆناغێكدا بەجۆرێك شۆڕشەكانی كوردیان دژبەیەكدی بەكارهێناوە و لە زۆرینەی ململانێكانیاندا وەك شەڕی چاڵدێران ڕۆڵەی كورد قوربانی بوون و خاكی كوردستان ژێرپێی فارس و تورك و عەرەب بوون .

لەهەمانكاتدا لەباربردنی شۆڕشەكانی كورد كراونەتە تایەكی تەرازووی ڕێكەوتنە كاتی و مۆنۆپۆڵخوازانەكانی ئەم سێ نەتەوە داگیركەرە بۆنمونە ڕێكەوتنی شومی جەزائیر 6/اژار/1975 لەنێوان هەردوو ڕژێمی ئێران و عێراقدا بەنوێنەرایەتی (هەردوو محمد رەزا و صدام حسین و بەسەرپەرشتی هەواری بومدێن سەرۆكی ئەوكاتەی جەزائیر توانیان نسكۆو ئاشبەتاڵ بە (شۆڕشی باشوور بەسەركردایەتی مصطفی بارزانی)بكەن لەبەرامبەر چەند پێگەیەكی ئاوی لە كەندوی (عەرەب ـ فارس) هەروەها لە صەفقەیەكی هاوشێوە لەنێوان كەمالیستەكانی توركیاو بەعسیەكانی سوریادا بەبێبەرامبەر ڕێبەری پارتی كرێكارانی باكوور(عبدالله ئۆجەلان) لە تشرینی دووەمی 1998 لەسوریا دەركراو دواتر لە سیناریۆیەكی مخابەراتی قێزەوندا 15شبات 1999 نەیروبی ڕادەستی توركیا كرایەوەو تائێستەش لە دورگەی ئیمرالی بە نامرۆڤانەترین شێوە لەگرتوخانەی تاكەكەسیدایە .

لەباربردنی ڕیفراندۆمی هەرێمی كوردستان كە مافێكی شەرعی و دەستووری گەلی كوردە پەردەیەكی دیكەی (شانۆگەری سەركوتكردنی كوورد) بوو بەسپۆنسەری ڕێكەوتنی نێوان ئەو سێ وڵاتە بەرامبەر بە دوژمنە مێژوویی و هاوبەشەكەیان (كوردستان) ئەوەبوو وەك بەشێك لەو ڕێكەوتنە قێزەونە بەسەرپەرشتی ڕاستەوخۆی ئێران ڕوداوەكانی 16ی ئۆكتۆبەری لێكەوتەوە لەم پەردەیەی پیلانگێڕیەكانیاندا توركیا ڕۆڵی پاڵپشتی لۆجسی و چەواشەكاری اعلامی هەڵبژارد وائێستە هەمان دوژمنانی كورد سەرقاڵی نمایشكردنی پەردەیەكیتری هەمان شانۆگەرین تەنها كاراكتەرە سەرەكیەكە لەبری ئێران ڕژێمی تورانی ڕەگەزپەرستەكانە ئەمجارە كوردستانی ڕۆژئاواو كانتۆنی عەفرین و دەسەڵاتە خۆجێیەتیەكەی هاوشێوەی كەركوك بكەنەئامانج و وەك دەبینن ئێران ڕۆڵی بێدەنگی هەڵبژاردوە , ئەمانە چەند پەردە وسیناریۆیەكی مامەڵەو هەڵوێستەی داگیركەرانی كوردستانە بەرامبەر پرسی ڕەوای گەلی كورد . كەچی بەناوسەركردەكانی كورد لەبری برایەتی و پێكەوەژیان بۆلەناوبردنی یەكدی هەریەكەیان هانا بۆ لایەنێك یان زیاتریان دەبەن!! 

مەخابن ئەوە حاڵی كوردستانە كەچی شۆڕشی كورد لەیاری مناڵان و ماڵەباجێنە دەچێت سەربەتاڵان وەك مناڵان تاویستی یارییان هەبێت چیك جیڤارا هێزی یەدەكە لەئاستیان بەڵام كە بۆنی نەوت و ئاپۆڕای مەگەزی سینی پڕشیرینی یەكی كاسكرد و ئەویدی تاسان و لەهۆشخۆی برد ئیدی یەكەم ڕەنگدانەوەی توڕەییەكان شەقهەڵدانە لەماقڵەی مەملەكەتی ماڵەباجێنە و كایە بشێوێ دەبێتە سەمفۆنیای هەوری ڕەشی ئەهریمەنی تینوو بەخوێنی ئاڵی گوڵاڵە و دۆشاوی تووی بەخورماكراو تروسكایی گڕ و گووڕ لە هەناوی بابەگوڕگوڕ دەچنێت و لالش دەبێتە لوقمەی بەربەیانێكی وەحشی بیابانە بەدناوەكەی نوگرەسەلمان .

دوای ئەم هەموو كارەساتانە لەمەملەكەتی پرسەی بێكۆتا لەبری خۆسازدان و بەخۆداچوونەوە هەموو بوین بەپاچ بۆ ڕوخانی شكۆی كەلاوەی نیشتمانی پڕلە كوندەپەپو وا نزیكە بەقەد ژمارەی كۆڵانەكانی شارێك حیزبی حەپۆل و پارتی پەرت و سەركردایەتی بێسەركردەو سەری بەتاڵ لەسەر شانۆی مینبەری ماڵەباجێنە دروستدەكەین بۆ ئەوەی سیاسەتی پەرتكەو زاڵبەی دوژمنان خێراتر لاپەڕەی سەركەوتنەكانیان تۆماربكەن .