هەوڵێكـ بۆ شیتەڵكردنەوەی بەشێكـ لەوتەكانی ئەمینداری یه‌كگرتوو!

  دوو شەممە, 22 کانونی دووەم 2018 13:34

 

... ئێوارەی شازدەی كانوونی دووەم  ئەمینداری گشتی یەكگرتوو مامۆستا صلاح الدین محمد لەهەولێری پایتەخت و لەبەردەم بینای ئەنجومەنی سەكردایەتی یەكگرتوودا بەپرێس كۆنفرانسێكی ڕۆژنامەوانی بڕیاری كشانەوەی یەكگرتووی لەكابینەی هەشتەمی حكومەتی هەرێم ڕاگەیاند ، بەندە وەكـ هەر كەسێكی تری ئەم وەڵاتە لەبەردەم شاشەی كەناڵەكانەوە بینەری ئەو كۆنگرە ڕۆژنامەگەریە بووم بەم شێوەیە لەقووڵایی وتەكانی ئەمیندار گەیشتم :
:
• سەرەتا بەم ئایەتە پیرۆزە دەستی پێكرد .. (الَّذِينَ يُبَلِّغُونَ رِسَالَاتِ اللَّهِ وَيَخْشَوْنَهُ وَلَا يَخْشَوْنَ أَحَدًا إِلَّا اللَّهَ ۗ وَكَفَىٰ بِاللَّهِ حَسِيبًا) .. ئایەتی 39 لەسورەتی الاحزاب ، سادەترین ماناكردنەوە بۆ ئەم ئایەتە كە لەسورەتی ئەحزابدا هاتووە ، بەڵگەیە‌ بەقووڵایی ئیمان وباوەڕی ئەم حزبە بەو پەیامەی كە هەڵیگرتووەو بانگەوازی بۆ دەكات و جەختی كردەوە كە یەكگرتوو پەیامی خودای موتەعالی پێیە وئەیەوێ بەردەوام بێ ! هەر بۆیە ئەم كاروانه پشت ئەستوورە بەخوای گەورەو تەنهاش لەو ئەترسێ وكەسێكی تر نیە حیسابی بۆ بكات ! هەروەكـ ئاماژەیە بەبارودۆخی ساتە وەختی بڕیاری كشانەوەی یەكگرتوو لەناو هەولێری پایتەختدا ، لەوێشەوە ئاماژەكانی كۆبوونەوەی چواردەور بەئەگەرو گریمانەو گرەوەكانیان لەسەر یەكگرتوو ، كەبەداخەوە ‌تەنها لەفاڵچی وجادوو ئەچوون !
:
• هەروەها وتی ( لەساته ‌وەختی ڕاگەیاندنی یەكگرتوو كە بەبیست ڕۆژی تر تەمەنی یەكگرتوو پێ ئەخاته ناو‌ بیست وچوار ساڵەی ڕاگەیاندنی ، ئەو كات هەموو شتێكی جێاواز بوو ، وە ئەیەوێ بەو جێاوازیەی خۆی بمێنێتەوە ، لەهیچ حزب ولایەنێكی سیاسی نەئەچوو وە ناچێ ) ! واته هەروەكـ چۆن لەسەردەمێكدا لەدایكـ بوو بەسروشت وپێكهاتەی ئەو كاتەی حزب و لایەنەكانی تری كوردستان جێاواز بوو ! دیسان ئەیەوێ هەر بەو جۆرە بمێنێتەوەو تایبەتەمەندیەكانی خۆی لەدەست نەدا ! واتە وەكـ هەمیشە حزبێكی ڕەسەنی كوردەواری وئیسلامیی وئیصڵاحی و مەدەنی وخزمەتگوزار ودڵسۆز بەخاكـ وگەل ونیشتمان ! دوور لەبەكارهێنانی چەكـ و پەنابردن بۆ خۆكوشتن وشەڕی كوردكوژی و وابەستە بەوەڵاتانی چواردەور یاخود جێبەجێكاری ئەجیندای ئەم یان ئەو درێژە بەكارو كاروانی خۆی بدات ! چونكە خەڵكێكی زۆر هاوشێوەی یەكگرتوو بەڕیكەوتن ، وەلێ كەمێكی كەم لەوانە توانیان بەرگەی بارودۆخە سەختە جێاوازەكانی ڕیگا بگرن و بتوانن وەكـ چۆن هاتن هەر بەو جۆرەش بمێننەوە و درێژەپێدەری دروشم وبانگەشەكانیان بن !
:
• لەبڕگەیەكی ترا وتی ( كاروانی یەكگرتوو لەو ڕۆژەوە بەتەنها وتاقانە ڕێگە ئەبڕێ ) ! واتە ئەو دروشم وكەرەسانەی كەلەو سەرەتایەدا یەكگرتووی پێ ناسێنرا هەنوز خاڵی بەهێزو بڕوای تەواوی ئەم حزبەیە بەخوێندنەوەیەكی دروست وتەندروست بۆ واقیعی سیاسی كوردستان وناسینی كۆمەڵگای كوردەوای وبەرچاوڕۆشنی سەركردایەتی ئەوساو ئێستای ئەم كاروانه ! لێرەوە ئەم حزبە هەرگیز نەیویستوە جگە لەخەمی بانگەوزاو ئیصڵاحخوازی وخزمەتكردن بەمیللەتەكەی ، هیچ بژاردەیەكی تر تێكەڵ بەسیاسەت وبەرنامەی حزبەكەی بكات ! ئەمەش واته بەتەنهایی و ودووركەوتنەوە لەفشارو ژێرباری ئیملائاتی ئەم یان ئەو یەكێكە لەهەرە ‌تایبەتمەندیەكانی ئەم كاروانه ! هەر بۆیە پەنابردن بۆ قیل وقال و بۆ هەر ڕۆژەو وێستگەیەكـ ، بۆ هەر ڕووداوێكـ وەرچەرخانێكی تازە بێتەدی ! چەندە ناسروشتی وجێگای پرسیارە ، ئەوەندەش بڕوا بەخۆ نەبوونه ‌وكەوتنە ژێرباری پێشهاتە تازەكانی ڕۆژە كە لەكاتی ئاسایدا بە دروشم وبنەما جێگیرو مەحكەمەكانی ڕابووردوو یەكـ ناگرێتەوە ! لێرەوە ئەم جێاوزایە زەقق وهەڵبەزەو دابەزە‌ بە یەكگرتوو ناخوا و لەوانیتری جیاكردۆتەوە ! بەدیوێكی تر چوونە ژێرباڵی هەر لایەن وحزبێكی تر چەندە خاڵێكی بەهێز وتەكنیكی سیاسی وتەكتیكی ڕۆژبێ ئەوەندەش هەستكردنە بەبچووكی وترسە لەفەوتان وداڕوخان وفۆبیای تیاچوون ومانەوە لەدواوە !
:
• دیسان وتی ( گوێ لە حەسادەت وحەسوودی كەس نەبوو ، حیسابمان بۆ چەوساندنەوە وستەم ومەحرومیەت نەكرد ، تەحەمولی جۆرەها پێشێلكاری وسوتان وكوشتن وئازار كرد ) ! واته ئەم كاروانە لە ڕۆژگارێكدا بەچۆكدا نەهات كە بەجۆرەها شێواز هەوڵی ڕێگری ونەخوێندنەوە وبچووكردنەوەی ئەدرا ! واتە ئەوەی لە ئێستادا بەرانبەر بەیەكگرتوو دەبینرێ ودەگوزەرێت باجی بوون وڕاساڵی ئەم حزبەیە ، ئاماژەیە بەمانەوە وبەردەوامی ئەم حزبە لەسەرهەمان ڕەوت وڕێڕەوی خۆی ، لانەكردنەوەیە بەلای كەسانێكـ كە لەشێواوی ناخ وڕوخساریدا چاوی بەكەسی ترا هەڵنایە ! لێرەوە باجی ئەم وەستان ومانەوەیە تەعبیرە لەئازاری بەردەوام وبێنازی وگیرفان بەتاڵی ئەندامان وپەلامار وسەنگەرگرتنی ئێستای زۆرینەی لایەنە سیاسیەكان بەڕێژەیەكی جێاواز لەحزب وشخصێكـەوە بۆ ئەویتر ! بڕیاری كشانەوە لەهەولێر و لەو ناوەڕاستدا تەعبیرە لەپتەوی دەزگا ودامەزراوەكانی ئەم حزبەیەو ڕەنگدانەوەی قەناعەت وبیروباوەڕی سەركردەكانیەتی !
:
• هەروەها وتی ( یەكگرتوو بەموزایەدەو بەقسەی پۆچ وبێمانا نەناسراوە ، یەكگرتوو بەخەڵكێكی ڕەوشت بەرز و پلاندار وبەسەلیقە ناسراوە ) ! واته یەكگرتوو وەكـ حزبێكی ئیسلامی مەدەنی ونەرم ڕەوتی ئیصڵاحخواز هەمیشە بەدوور بووە‌ لەهەر وتەو هەڵوێستێكـ خزمەت بەئامانجە بەرزەكانی چاكسازی نەكردبێت ، هەروەكـ قووڵبوونەوەی زیاتری كێشەو گرفتە ئاڵۆزەكانی كوردستان چەندە پرسێكی یاسایی وئاسایی بووبێت خودی دەسەڵاتدارانی هەرێم هۆكاری سەرەكی بووبێتن ، ئەوەندش پەیوەست بووە‌ بەهەندێ هەڵوێست وكاردانەوەی ئەوانیتر كە لەكاتی خۆیدا بۆ مەرام وئامانجگەلێكی ڕاگوزەری حزبی وتایبەتی گیراوەتە بەر ! بەداخەوە لەكوردستاندا تەواوی پرسەكان وئاشتی كۆمەڵایەتی بەسیاسەت كراوەو لەناو سیاسەتیشدا بۆ موزایەدەو خەڵكـ چەواشەكردن سیاسەتێكی دوور لەهەموو بەها وڕەوشتێكی باوی سیاسیەت پێڕەودەكرێت ! یەكگرتوو سیاسەت بەئەخلاقەوە دەكات ، چونكە سیاسەتی دوور لەئەخلاقی سیاسی موزایەدەی بێ مانا بەرهەم دێنێت ، هەر بۆیە یەكگرتوو ئەیەوێ ئەندازەیەكـ لە متمانە ومانایەكـ بۆ سیاسەت ونرخێكـ بۆ ئەخلاقی سیاسی وسیاسەتی ئەخلاقیانەی سیاسیەكان بگێڕێتەوە ! ئەگەرنا لێرەو لەكوردستاندا سیاسەت وسیاسیەكان تەواو بێ ئەرزش ونابووت كراون ! عەیامێكی گەرەكە وەكـ خۆی بگەڕێتەوە !!
:
• لەبڕگەیەكی تری ڕاگەیەنراوەكەیدا وتی ( یەكگرتوو بەكۆی دەنگی سەركردایەتی لەحكومەت كشایەوە وە بۆ ئەوانەش گرەوی زۆریان لەسەر یەكگرتوو كرد بەحاڵی خۆیاندا بچنەوە باشترە ) ! كۆ دەنگی سەركردایەتی یەكگرتو هەموو سیحری ئەوانەی پوچەڵ و بەتاڵكردەوە كە گرەوی دووركەرتبوون یاخود وازهێنانی بەشێكـ لەوەزیر و كادیرە پێشكەوتوەكانی ئەم حزبەیان كرد‌ ! بەم بڕیارە كۆدەنگیە سەلماندی كە یەكگرتوو حزبێكی یەكگرتووی سەرتاسەری كوردستانیە ، ئەگەرچی بەشێوەیەكی هاوسەنگـ وتا ڕادەیەكـ یەكسان لەهەردوو زۆنی سەوز و زەرد بوونی هەیە ، وەلێ بڕیارو هەڵوێستی سەركردەكانی یەكگرتوو پێش هەر ناو وناتۆرەیەكی ناحەزانی ، بڕیاری یەكگرتوو بوون وبەرژەوەندی گشتی وبۆ خواست ومافەڕەواكانی گەلەكەی لەسەرتاسەری كوردستان بێ جێاوازی دێتەبوون ! لێرەوە گەرەكە بەوانەدا بچینەوە و بیروهۆشیان بخەینەوە ژێر پرسیار ونیشانەی سەرسوڕمان لەسەریاندا بچەقێنین ، كە جار جارە بۆ موزایەدەو بۆ خۆهەڵكێشان لەبەردەم شاشەكاندا بڕیارو خەونی كاڵفامانە ئەدەن !!
:
• ئەم چەندە وشەیە ئەكەینە كۆتا بڕگەی وتەكانی وشیكردنەوەی ئێمەش كە وتی ( ئەم هەنگاوەی یەكگرتوو دژ بەهیچ كەس ولایەنێكـ نیە ، چاولێكەری كەس و جەبهەگیری لەگەڵ كەسی ترا نیە ، وە بۆ ڕازیكردن و چەپڵەلێدانی كەسیتر نیە ) ! لێرەوە ئاماژە دەكات بەمەترسی وترسناكی هەڵوێست وبڕیاری حزبەكان بەدەسەڵات و دژە دەسەڵاتیەوە كە بەداخەوە زۆرێكـ لەو هەڵوێستانە بەئامانجی ڕازیكردنی لایەكـ لەسەر حیساب وبوغزاندنی ئەویتر بووە ! یاخود لەپێناو مانەوەی شەخص و بۆ بەنەفرتكردنی شەخصەكان بووە ! لێرەوە لە حزب ولایەنە سیاسیەكان بۆ تاكـ بەتاكی كۆمەڵگا لەبری چوون بەیەكدا وكۆبوونەوە لەچوار چێوەی پرۆژەو دەرچەیەكی نیشتمانی وبۆ بەرژەوەندی گشتی ولەوێشەوە بۆ یەكڕیزی وكۆدەنگی وگەیشتن بەچارەسەرو كۆتایهێنان بەكێشەو گرفتەكان ، بەداخەوە بەم جەبهەگیریە لەیەكتر هێندەی تر بوە مایەی قوڵبوونەوە و پەرتەوازەیی كۆمەڵگا وتۆخكردنەوەی دوو بەرەی ئاراستە پێچەوانەو دژە ئاراستەی جێاواز ! هەر بۆیە لەبری فشار خستنە سەر دەسەڵاتداران وگۆڕانكاری لەحكومەت ودژایەتی گەندەڵی وچاكسازی لەئیدارە وهەڵسانەوەی ژێرخانی ئابوری بۆ ‌بژێوی ڕۆژانەی قووت ومووچەی هاوڵاتیان بەگشتی ، كەوتینە سەنگەرگرتن لەیەكتر وسەنگەر گواستنەوە بۆ ئەویترو لەپێناو ڕازیكردنی ئەوانیتر ! یاخود بۆ چەپڵێدان وئافەرینی چەند كەس وكەسایەتیەكـ هەندێجار پەنا دەبرا بۆ نەوتنی ڕاستیەكان یاخود پەردەپۆشكردنی ئەوەی كە پێویستە بگووترێت كە نەدەگوترا ! بەداخەوە بە پشتبەستن بەئەزموونی ئەم چەند ساڵەی ڕابووردوو دەركەوت كە هەندێ كەس بەهیچ شێوەیەكـ لێت ڕازی نابێ و دانی خێرت پێدا‌نانێ هەتا دەقاودەق وەكـ ئەو بیرنەكەیتەوە یاخود لەونەچیت یان كوێرانەو بێ بەرچاو ڕوونی شوێنی نەكەوی ! هەر بۆیە مەرج نیە ئەوەی چەڵەی بۆ لێدای ئیتر بە هەموو شتێكـ و بۆ هەموو هەڵوێست و بڕگەو وەرچەرخانێكـی سیاسی تۆ ڕازی وقایل بێ ! بەڵكو چەپڵەو ئافەرینی ئەوان بۆ ئەوەیە تەنها تۆ لەوبچی یاخود هاوشێوەی دەسەڵاتداران بۆی بتوێتەوەو بۆ كۆتاجار تەنها لەخۆت نەچی !!!