ماڵی ماممان!

  سێ شەممە, 23 کانونی دووەم 2018 18:53

 

تاڵەبانی لە كتێبی (دیداری تەمەن)دا، كە باس لە ڕووداوەكانی سەرەتای شێستەكانی سەدەی ڕابردوو دەكات، دەڵێ‌: "هەندێ‌ كەلیمەی سڕیمان هەبوو، بۆ نموونە بە سۆڤیەتمان دەگوت ماڵی ماممان". هەموومان دەزانین سۆڤیەتی هەنگینێ‌ و ڕووسیای هەنووكە نە لە سەردەمی كۆماری مەهاباد و نە لە ئێستا و تەواوی سەدەی ڕابردوو و نە پێشتریش، هیچ كات مامی كورد نەبووە و نییە. هەر وەك چۆن نە لەسەردەمی شێخ مەحمووددا، تورك مامی ئێمە بووە، نە لە هەڕەشە و ڕووداوەكانی دیكە كە بە درێژایی مێژوو لەسەر نەتەوەی كورد هەبووە، ئەمەریكا و ئەوروپا و كۆی وڵاتانی ڕۆژهەڵات و ڕۆژئاوا مامی كورد بوون. لە ڕووداوە تازەكانیشدا هەمدیس چ لە هێرشی سەر كەركووك لە شازدەی ئۆكتۆبەر، چ لەو هێرشە نابەرابەرەی دەكرێتە سەر كانتۆنی عەفرین لەلایەن توركیاوە، بەداخەوە هیچ وڵاتێك ماڵی ماممان نییە.
بۆیە ئەگەر لە هەموو هەرەس و لێقەومان و كارەساتەكاندا، هەقیقەتی ئەو گوتەزایە كۆنەــ نوێیەمان زێتر بۆ دەركەوتبێ‌، كە دەڵی: "كوردەكان جگە لە چیاكان هیچ دۆستێكی دیكەیان نییە"، ئەوا دەبێ‌ پتر ئەو ڕاستییەشمان لەكن ڕۆشن بێ‌، كە لە سەردەمی نوێدا هیچ شتێك لە یارییەكان نەگۆڕاون هیچ، نە سیاسەتی دەولی و مامەڵەی پراگماتییانەی دونیا، نە سادەیی و خۆشباوەڕی ئێمە، هیچیان نەگۆڕاون. ئەوەی گۆڕاوە تەنێ‌ ئەوەیە كە پێشتر قەتڵ و عام و ئەنفال و كیمیاباران دەكراین، زەمەنێكی دەویست تا دونیای دەرەوە دیمەنە تراژیدییەكانمانی پێ بگات و بیانبینێ‌. بەڵام ئێستا سات بە سات و چركە بە چركە هەمووان تەماشای وێنەی برین و خوێن و مردنمانە دەكەن، بێ‌ ئەوەی هیچێك لەوانەی بە ماڵە مامیان دەزانین زۆر جار تەنانەت بە وشەیەكیش پشكداریی كۆست و كەسەر و پرسەكانمان بن.
ئای چەندە سەخت و سەیرە لە شاییدا هەموو دونیا ماڵی مامت بێ‌! لە شیوەندا یەك ماڵە مامیش شك نەبەیت، لەوەش سەختتر و سەیرتر ئەوەیە، ئەمجارە و جارێكی دیكە و دەیان و سەتان جاری دیكەش، لە خۆشیدا و لە عانی زۆربوونی پوول و هاوتەریببوونی بەرژەوەندییەكاندا، باوەڕ بە خۆت بێنی كە ئەو هەموو ماڵە مامەت هەیە.