رادیۆی speda.FM و چەند قسەیەك

  سێ شەممە, 13 شوبات 2018 22:16

 

دیارە بەرواری 13ی شوبات لە جیهاندا بە رۆژی جیهانی رادیۆ ناسراوە، ئەویش لەبەر ئەویە كە لە ساڵی 1948 لەم رۆژەدا یەكەم رادیۆی نەتەوەیەكگرتوەكان دەستی بە پەخشكرد،بەڵام لە هەرێمی كوردستان ئەم رۆژە هاوكاتە لەگەڵ ساڵیادی پەخشی رادیۆی speda.FM .


ئاشكرایە رادیۆ وەك ئامێر، وەك كەل و پەل لە ماڵەكان، هەر لەگەڵ پێشكەوتنی زانست لە سەرەتای سەدەی نۆزدەمەوە، بووە بە دۆست و یاوەری زۆرینەی زۆری مرۆڤەكان.لە ئێستاشدا تەكنەلۆژیای نوێ‌ و كۆمپوتەر و ئەنتەرنێت و تۆڕەكۆمەڵایەتیەكان، نەیان توانیوە لە مەیدانەكەدا توڕی دەن و دووری خەنەوە، چونكە رادیۆ زۆر باش رەگی لە دڵ و دەروونی خەڵكدا داكوتاوە، بۆیە هەرگیز خۆری رادیۆ ئاوا نابێ‌.


ئاشكرایە لە هەرێمی كوردستان رادیۆ زۆرە و، بە پێی سەرچاوەكانی زانیاری ئێستا زیاتر لە 90 رادیۆ لە هەێمی كوردستان پەخشیان هەیە.لەم نێوەندەدا رادیۆی speda.FM تایبەتمەندی خۆی هەیە، بۆیە تەنها لەخۆی ئەچێ‌ نەك هیچ كەسێكی تر.


راستی قسەیەكی زۆر گرنگ هەیە، ئەویش ئەوەیە كاتێك مرۆڤەكان كاتەكانیان لەگەڵ جۆرێك لە جۆرەكانی میدیا بەسەر ئەبەن، زۆر گرنگە تەنها كات كوشتن نەبێ‌، بەڵكو سوود وەرگرتن و چێژوەرگرتن و ئاسودە بوون بێ‌، بۆیە هەر میدیاێك ئاوا نەبێ‌ ئامانجدار نیە و تەنها كات بەڕێكەرە.


رادیۆی speda.FM بێ‌ لێدان و بەكەم سەیری كردنی ئەوانی تر، بەردەوام هەوڵیداوە ئامانجدار و پەیامدار و خزمەتكاربێ‌ بە سێ‌ كوچكەی (خوا و خاك و خەڵك )هەر لەم پێناوەشدا دامەزراوە.


لە سایەی خواوە، رادیۆی speda.FM بەپێی بەدواداچوون و وەرگرتنی رای هاوڵاتیان و راپرسی رێكخراوەكان ئەم رادیۆیە هەردەم لە پێشەوە بووە، هەر چەند لە رابردوودا لە ژێر ناونیشانی (دەنگی یەكگرتوو- رادیۆی سلێمانی) بووە.بەڵام بە دڵنیایەوە ناوبانگ و شۆرەتی ساڵانی زێڕینی پێش 2017 بووە ،كەبوو بەهەوێن و لەدایك بوونی ئەم رادیۆیە.
با دنیا بزانێ‌ كە پەخشی speda.FM لە بوڕجی عاج و باڵاخانەی خەیاڵی و، ڤێلای گەڕەكە راقی و تازەكان نیە، نەخێر بەڵكو لە خانویەكی زۆر سادە و ساكاردا كارەكانی خۆی ئەنجام ئەدات، بەڵام نهێنی سەركەوتن و زۆری بیسەرەكانی ئەوەیە، كە ستافێكی دڵسۆز و لە خۆبردوو كارەكانی ئەنجام ئەدەن، بەڵێ‌ تا ئێستاش لەم دەزگایە هەر بە تام و بۆنی ساڵانی نەوەتەكان ئیش ئەكرێ‌ و، لەم سەردەمی قەیران و بێ‌ تفاقیە، ئەوان تەنها لە پێناوی خزمەت بەردەوامن نەك پاڵنەری ماددی. ئەگەرنا ئەوەی لەم دەزگایە ناونراوە مووچە و لە بری یەك مانگ ئەدرێ‌ بە كارمەندەكانی، بە تەحەداوە ئەڵێم تەنها پارەی یەك ژەم خواردنی دوو براوە لە یەكێك لە شوێنە راقی و بەناوبانگەكان.


ئەوەی رۆژانە لەم دەزگایە ئەبینرێ‌، بریتیە لە هاوكاریكردن و بەدەمەوە بوونی یەكتری لە سەرجەم بەشەكان.


لەم دەزگایە هەر لە پاسەوان و پرسگە و كارگوزارەوە تا بەشەكانی ئیدارە و حسابات و هونەری و تەحریر و هەواڵ و بەرنامەكان و ئەرشیف و پەیوەندیەكان، هەمویان لە غیابی یەكتر كارەكانی یەكتر ئەكەن.


لە سەرووی هەڕەمەكەش كەسێك بە ناونیشانی (بەڕێوەبەر) ئیدارەی دەزگاكە ئەكات، كە كارمەندەكان زیاتر لە خۆی بە خاوەنی دەزگاكە ئەزانێ‌ ئینجا خۆی. بۆیە زۆر دوورە لە مامەڵەی پۆلیسی و، تەنها بە چەكی برایەتی و تەبایی كارەكانی رێكدەخات.


بە كورتی هەموو ئەوانەی لەم دەزگایەدا كارئەكەن، هەر كارێكی تر بكەن زۆر لەوە زیاتریان دەست ئەكەوێ‌، بەڵام تەنها خۆشەویستی بۆ دەزگاكە وای كردوە كوڵنەدەن و ماندوو نەبن.


بە هیوای ئەوەی رۆژێك لە رۆژانە ئەم رادیۆیە ببێ‌ بە ئەستێرەی درەوشاوەی میدیای كوردی و، نەك تەنها لە ناوخۆ، بەڵكو لە دەرەوەی وڵاتیش بیسەر و گوێگر لە خۆی كۆتەوە و هەگبەی پڕ لە عەتر و عەنبەری لووتی ئەوانیش پڕ بكات.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.