خەریكە یارییە سیاسییەكەش گەرم دەبێت ئاگاداربن، خۆشەویستی و ڕێز، كێبەركێكەتان بیر نەباتەوە!!

  هەینی, 16 شوبات 2018 11:39

كاتێك كاپتن یان یاریزانێكی باش و خۆشەویستی یانە و تیپەكەتان، بە هەر هۆكار و بیانوویەك لە یانە و تیپەكەتان دەچێتە دەرەوە و دەڕواتە ناو یانە و تیپێكی دیكەوە، ئیدی دەبێ‌ دوو یاسای گرنگتان لەبیر بێت و فەرامۆشی نەكەن:

1ـ دەكرێ‌ لە ڕووی ئەخلاقی و بیرو باوەڕی تایبەتتانەوە، خۆشەویستی و ڕێزەكەتان بۆ ئەو كاپتن و یاریزانە هەر بەردەوام بێت.
2ـ بەڵام زۆر گرنگە ئیدی بە ڕكەبەر و مونافیسی خۆتان و یانە و تیپەكەتانی بزانن و ئەوپەڕی هەوڵی خۆتان بخەنە كار بۆ ئەوەی خۆتان براوە و ئەو دۆڕاوی یاری و كێبەركێكە بێت.... هۆشیار بن لەناو یاریەكەدا نابێ‌ خۆشەویستی و ڕێزەكەی جاران و ئێستاشی واتان لێ بكات یارییەكی لاواز بكەن و دەرفەتی بردنەوە و براوەیی بە ئەو بدەن و خۆتان ببنە دۆڕاوی یارییەكە.
لە سیاسەتیشدا ئەم دوو یاسا و ڕێسایە پێویستە پەیِرەوی بكرێن، ئەگەر سەركردە و كادیر و كاراكتەرێك یان تەنانەت كەسی یەكەمی حیزب و لایەنەكەتان، ڕۆژێك لە ڕۆژان سەنگەری خەباتی گواستەوە و چووە ناو حیزب و لایەنێكی دیكەوە، ئەوا ئێوە دەتوانن خۆشەویستی و ڕێزەكەتان بۆی بمێنێ‌ و بەردەوام بێ‌، بەڵام پێویستە زۆر سەرسەختانە و بە هێز و دامەزراوانە مونافەسە و كێبەركێی لەگەڵ بكەن و هەوڵی بەزاندنی بدەن و ڕێگە نەدەن ئەو خۆشەوییستی و ڕێزەكەتان بەكار بهێنێ‌ بۆ شكست پێ‌ هێنانتان و دەستخستنی بەرژەوەندییەكانی.
گەرموگوڕ بن و كێبەركێ‌ و مونافەسەیەكی ئازایانە و لێزانانە بكەن و هەوڵی بردنەوەی یارییەكە بدەن... ئومێدتان بە بردنەوە و سەركەوتنی خۆتان و یانە و تیپەكەتان هەبێت.

 

مودریك عەلی عارف

لەدایكبووی (1978) لە گوندی (خەرپانی) ناوچەی هەورامان، پارێزگای هەڵەبجە، *لەگەڵ خوێندنی قوتابخانەدا چووەتە حوجرە و زانستە شەرعییەكانی خوێندووە، *بەكالۆریۆس لە (اصول الدین و فیكری ئیسلامی) *لە ساڵی (2005)ەوە وەك پیشەی مامۆستایەتی دامەزراوە.
* ئەندامی (ناوەندی مەعریفەت بۆ فیكر و مەعنەوییەت)ەو دەستەی نووسەرانی گۆڤاری (هەژان) *ئەندامی كارای (كۆمەڵەی نووسەرانی ئیسلامی كوردستان) *خاوەنی ئەزموونێكی چەند ساڵە لە بواری كاری ڕاگەیاندندا و كاری پەیامنێری بۆ چەند ڕۆژنامە و گۆڤارێك كردووە و چەند ساڵێك (مُحَرِّر)ی بەرنامەكان و بەڕێوەبەری (دەنگی یەكگرتوو ـ ڕادیۆی هەڵەبجە)، شارەزایە لە هەردوو زمانی (فارسی و عەرەبی)دا، خاوەنی زیاتر لە (15) كتێب و نامیلكەی وەرگێران و نووسین، كە زۆرینەیان لە بواری عیرفان و مەعنەوییەتدان، چەندین بابەتی لە ڕۆژنامە و گۆڤارەكاندا بڵاوكراوەتەوە و نزیكەی (15) ساڵە لە بوارەكانی ڕۆشنبیری و كۆمەڵایەتی و ئایینی و عیرفانی و ئەدەبیدا سەرقاڵی نووسین و وەرگێڕانە.