پرۆسەی خوێندن لەنێوان بێ باكی حكومەت و بایكۆتی مامۆستایاندا

  چوار شەممە, 21 شوبات 2018 11:21

 

وەك لای هەمووان ئاشكرایە بەهۆی ئەو بارودۆخە داراییەی كە ماوەی زیاترلە سێ ساڵە ڕوبەروی هەرێمی كوردستان بوەتەوە زۆربەی كەرت وجومگەكانی حكومەت توشی ئیفلیجی و ناكارامەییی بونەتەوە و لەنێویشیاندا پرۆسەی پەروەردەو فێركردنیش لەنێوان سەرجەم كەرتەكانی دیكەی حكومەتدا پشكی شێری بەركەوتوە.
بەهۆی قەیرانی درایەەوە سێ ساڵە كەرتی پەروەردە گرفتی بۆدروست بووە و مامۆستایان لەكاتی جیاوازدا بۆهەڵوێست وەرگرتن لەبارودۆخ و گوزەرانی خراپی خۆیان بایكۆتی هۆڵەكانی خوێندنیان كردوە وبەتایبەتی وەك پێی دەوترێت لەسنوری زۆنی سەوز و هەرچەندە لە زۆنی زەر بایكۆت نەكراوە بەڵام حاڵی خوێندن لەو دەڤەریش هیچی باشتر نیە لە دەڤەری سەوز.
سێ ساڵە قوتابیان بەنیوە و ناچڵ وانە دەخوێنن و هیچ ساڵیك نەتوانراوە وەك پێویست پرۆگرامەكانی خوێندن تەواو بكرێن ئەمەش بێگومان كاریگەری سلبی زۆری كردوەتەسەر ئاستی زانستی قوتابیان وئەگەر هەرسێ ساڵەكەی خوێندن كۆبكەیتەوە ناكاتە ساڵێكی تەواو رێك و پێك كە پێشتر پرۆسەی خویندنی تیادا جێبەجێ دەكرا.
هەرچەندە حكومەت دەیان بەڵێنی بە مامۆستایانداوە كە موچەكانیان لەوادەی خۆیدا پێیان بدات بەڵام هیچكام لەبەڵێنەكانی نەبردوە تەسەرو تەنانەت مامۆستایان رازی بوون ئەو روبعە موچەیە لەوادەی خۆیدا دابەشبكرێت كەچی حكومەت ئەوەشی نەكردو لەئێستادا بەدوومانگ جارێك ڕوبعە موچەیەك بەمامۆستایان دەدات ئەمەش وایكردوە كە ئەوەندەی تر بارو گوزەرانی مامۆستایان خراپتر بێت و لەجارانی رابردوتر هەڵوێستەكانیان توندتر بكەن.
لەم نێوەندەدا تائێستا حكومەتی هەرێم نەیتوانیوە بەشێوەیەكی كرداری داوای مامۆستایان جێبەجێبكات و پرۆسەیەكی گرنگ و كاریگەری وەك خوێندن نەكاتە قوربانی پلانە شكستخواردوەكانی خۆی ،بەتایبەتی تریش لەم ساڵی خوێندندا كە مەترسی ئەوە دەكرێت لەسنوری سلێمانی و هەڵەبجەوئیدارەكانی ڕاپەرین و گەرمیان ساڵێكی خوێندنی قوتابیان بەفیڕۆبروات .
ئەوەی جێگەی تێڕامان و سەرسورمانە تا ئێستا حكومەت لەبەردەم ئەم بارودۆخەدا خەمساردەو مێشێك میوانی نیەو هیچ پلانێكیش بەدی ناكرێت تاوەكو پرۆسەی خوێندن لەو ئیفلیجیە ڕزگاربكات ،لەكاتێكدا ئەو بارودۆخەی كەلەم وڵاتەدا بەسەر خوێندندا دەگوزەرێت لە هەروڵاتێكی تردا بوایە ئێستا كابینەی حكومەتی لەسەر هەڵوەشابویەوە .
لەلایەكی ترەوە پەرلەمانی كوردستان لەبەرامبەر بایكۆتی مامۆستایاندا بێ دەنگی هەڵبژاردوە جورئەتی ئەوەی نیە كە سەرۆكی حكومەت و وەزیری پەروەردە بانگهێشتی پەرلەمان بكات و لێپرسینەوەیان لەگەڵدا بكات.
ئەوە بابێدەنگی حیزبەكانیش لەئاست ئەم پرۆسەیەدا بوەستێت كە هیچكامیان نوزەیان لێوە نایەت جگە لەوەش خێزانێك نیەلەهەرێمی كوردستاندا مناڵێكی لەقوتابخانەدا نەبێ كەچی دوبەخێوكەر نابینی دەنگیان هەڵبڕن و پاڵپشتی مامۆستایان بكەن و داواكاریەك پێشكەش بكەن و داوای كردنەوەی قوتابخانەكان بكەن و نوخبەی ڕۆشنبیرو سیاسیەكانیش بەتەواوەتی بێدەنگ بوون و هیچ قسەیەكیان بۆچارەسەر پێ نیە.
لەكۆتایی دەڵێم لەبارەی فەوتانی ساڵێكی خوێندنی قوتابیانەوە بەرپرسی یەكەم نێچیرڤان بارزانی سەرۆكی حكومەت و پشتیوان صادق وەزیری پەروەردە و پاشانیش حیزبە سیاسیەكان و دواتریش كەس و كاری قوتابیان لێی بەرپرسن و هیچ كاتێك بەپرسیاریەتی ناكەوێتە ئەستۆی مامۆستایانەوە .

ئیسماعیل سەعدی

لەدایك بووی خورماڵ 1976 لەسلێمانی دادەنیشێت لە ئێستادا مامۆستایە و لەساڵی 1996دا یەكەم نوسینی لە ڕۆژنامەی داهێنان بڵاو بوەتەوە وبۆ ماوەی دوو ساڵ پەیامنێری ڕۆژنامەی یەكگرتوو بووە ماوەی دووساڵیش لە ڕۆژنامەی ئامانجی سەربە یەكێتی مامۆستایان كاری كردوە. بەرێوەبەری نوسینی گۆڤاری پەنجەرەیە و دووساڵ بەرنامەی پرسی گەنجی لە دەنگی یەكگرتوو رادیۆی سلێمانی پێشكەش كردوە ئەندامی كارای سەندیكای ڕۆژنامەنوسانی كوردستان
بەشداری دەیان خولی ڕۆژنانوسی كردوە و لەوبوارەدا چەندین بڕوانامەی بەدەست هێناوە. دەیان بابەت و نوسینی لەڕۆژنامەو گۆڤارو ماڵپەرە كوردیەكاندا بڵاو بونەتەوە لەوانە ڕۆژنامەی هاوڵاتی و ماڵپەری كوردیو ولە ساڵی 2009ەوە وەك پەیامنێرو هەواڵساز لە ماڵپەڕی كوردیو دەست بەكارەو لە ئێستاشدا بەردەوامە.