هەرێمی كوردستان دوای 27حەوت ساڵ لەراپەرین

  دوو شەممە, 05 ئازار 2018 12:50

 

راپەرینی 1991 كە بە ڕاپەرینە مەزنەكە ناسراوە لە5ی ئازاری ساڵی1991 لە شاری رانیە دەستیپێكرد ,و لە 21ی ئازار كە هاوكات رۆژی نەورۆزو سەری ساڵی كوردیش بوو دواین سەنگەری دەسەڵاتی فاشیزمی بەعسی عەفلەقی لەشاری كەركوك شاربەدەر كرا, بەمەش خەڵكی مەینەت بارو ستەمیدەی كوردستان بەهەموو چین و تۆێژەكانی بەژداری ئەو راپەرینە مەزنەی كرد,

 

هەربۆیەش دوای راپەرین راستە وخۆ بەرەی كوردستانی راگەیەنرا بۆ ئەوەی گشت رەنگە جیاوازەكان بەژداربن لەبنیات نانەوەی كوردستان ,ئەوەی پێویستە بوترێت ئەوەیە كەئایا كێ راپەرینی كرد ؟ وهەروەها كێ سود مەند بوو ؟شتێكی بەڵگە نەویستە خودی راپەرین پێویستیەكی گرنگی ئەوكات بوو بۆ وەڵامدانەوەی نەهامەتی و ناسوری و ئەو ستەمەی دەرهەق بەگەڵی كورد ئەنجام دەدرا لەلایەن رژێمە یەك لەدوایەكەكانی عێراق ,بەتایبەت رژێمی سەدام كە بەدرندەترین سەردەمی فەرمانرەوای عێراق دادەنرێت لەمێژودا,

 

گرنگتر لەمانەش گشتی پیرۆزی دۆزی رەوای كورد بوو لە باشور كە نزیكەی نیو سەدە كورد چاوەروانی هەڵومەرجێكی ئاوای دەكرد كەپێشتر بەهۆی بەرژەوەندی زلهێزانی جیهان نەدەرەخسا,هەرچۆنێك بێت ئێمەی كوردانی باشور توانیمان ببینە خاوەنی هەرێمێكی نیمچە سەربەخۆ,هەروەها بەهۆی كۆچرەوی ساڵی 91 بریاری هەرێمێكی ئارام بەهێلی 36 لە نەتەوە یەكگرتوەكان بۆ هەرێم دەرچوو, كە ئەوەش یەكەم بریاربوو لەبەرژەوندی كورد كە پاڵپشتیەكی نێو دەوڵەتی هەبێت,ئیتر لەوساوە تاكوو روخانی رژێمی بەعس دەوڵەتی ناوەندی عێراقی خەوی بەگەرانەوە بۆ كوردستانەوە دەبینی بەڵام هیچ دەرفەتێكی بۆ نەرەخسا بەدەر لە31 ئاب كە بۆ هاوسەنگی هێز لەبەرامبەر هەژموونی ئێران بەتەنسیق لەگەل ئەمەریكا هێزەكانی عێراق بۆماوەیەكی كاتی دەستیان بەسەر هەولێر داگرت بۆ بەرژوەندی هێزیكی سیاسی پارسەنگی هێزیان گۆری,

 

بێگومان پێویستە ئاماژە بەوە بكەین كە سەرەتایی نەهامەتیەكانی كورد لەوە دەستی پێكرد كاتێك بەرەی كوردستانی هەر زوو هەرەسی هێنا , واتە پێش بەئامانج گەیشتنی پەرتەوازی و لەرزۆكی پێوە دیاربوو,دیارە ئەمەش بەهۆی كاریگەریان لەژێر هەژموونی هێزە هەرێمیەكان و نێودەولەتیەكان ,ئیتر بەهۆی دەست تێوەردانە دەركیەكان هەر زوو كوردستان وەك داری رزیو بەرەو سیس بوون هەڵوەرین رۆیشت,ئەوەی پێویستە بوترێت ئەوەیە كە خەڵك خاوەنی راپەرین بوو كەچی لەهەمان كات هەرخودی خەڵك بۆتە قوربانی ,بەواتایەكیتر خەڵكی دەپرسێت ئەرێ ئێمە بۆچی راپەرین؟

 

ئایا بۆئەوە راپەرین كە رووبەرووی مەرگەسات و براكوژیمان بەرن,یاخود بۆئەوە راپەرین بەرەو كوردستانێكی سەربەخۆ و دیموكرات وپێشكەوتوو بچین؟!!!.سەیرتر لەوەش ئەوەیە كەلەدوای راپەرین تاكوو 2003 واتە رێك دوای رووخانی بەغدا دەسەلاتدارانی هەرێم خەڵكی داماوی كوردستانیان بەجۆرێك دابەش كردبوو كە هەر لە شارو دێهات و دەشتەكان بازارەكان بگرە تاكوو ئاسمانیشیان لەنێوان دوو زۆن دابەش كرابوو,ترس و تۆقاندن تەزكیەی حزبی و مەحسوبیەت و مەنسوبیەت پاشاگەردانی و پاوان خوازی دەستی بەسەر گشت جومگەكانی حوكمرانی ئەم كوردستانە خێر لەخۆ نەدیوە داگرتبوو,ئینجا رەنگبێت لەوەڵامدا هەر زوو توتی ئاسا دەڵێن ئێە هێشتا ساواین و ئەزمونی حوكمرانیمان نەبوە پێشتر ,

 

دەی كەواتە پێوستە ئێمەش چەند پرسیارێكیان لێبكەین بۆئەوەی وەلامان دەست كەوێت: باشە ئەگەر وایە ئەی بۆچی لە بازرگانی ساوا نەبوون؟ ئایا كاتێك گەرانەوە لەشاخ ئەو هەموو ملیار دۆلارەو هەزاران كۆمپانیاو ڤێلاو كێلگەی سەدان دۆنمی و ...تادوایتان هەبوو؟ئایا هەرگیز پرسیوتانە لەخۆتان كە بۆچی خەڵك لێتان بێزارە, ئایا هەر ئەو خەڵكەی كە ئێستا نەفرەتتان لێدەكات هەر ئەو خەڵكە نەبوو ففتی بەففتی دەنگیان بۆدان؟ هەر ئەو خەڵكە نەبوو گوڵبارنیان دەكردن, هیچ پرسیوتانە بۆ خەڵك متمانەی بەئێوە نەماوە؟ بۆ خەڵكتان بێ هیوا كرد؟ یاخود بۆ چاوتان لە نێلسۆن ماندیلا و غاندی و مەهاتیر محمد و شێخ زاید نەكرد خۆ ئەمانەش خەڵكی ئەوروپا نین تاكوو وەك هەموو جار بیانومان بۆ بێننەوە؟ بۆ گەنجانتان سەرگەردان كرد كەسەرمایەی ئەو ولاتەن كەسەر بنێنەوە لە دوورە ولاتی غەریبان ببن بە نێچیری باندە مەترسی دارەكان ,جگە لە وەش لە سۆزی دایك و باوكایەتی بێبەش بن لەهەمان كات ببنە خۆراكی ماسیەكان لە دەریاكان؟

 

ئەی بۆ ناپرسن چیتان بۆ خانەوادەی شەهیدان و ئەنفال كراوان و كیمیا باران كراوان كردوە؟مەگەر چیتر ماوە بەسەریان بێت تاكوو شایستەی ئەوە بن وەك كورو كچانی ئێوە بژین؟یاخود ئەو مافەیان پێ رەوا نابینن؟ ئیتر باسی چی بكەین ئێوە شانازی بەچیەوە دەكەن مەگەر نازانن مێژوو رەحم بەهیچ كەس ناكات؟ ئایا سەیری نەهامەتیەكانی پێشمەرگەتان كردوە؟ئایا مامۆستایان شایەنی ئەو هەموو سزا دانەن؟مەگەر ئەوان پێشەنگی زانست و پەروەدەی وڵات نین؟ رەنگبێت گالتەتان بەو وتانە بێت , یاخود رەنگبێت بەهەڵە بۆتان شیبكرێتەوە بڵێن ئەوە ناحەزی ئێمەن شت دەنوسن, هەرچەندە پێویست بە شیكردنەوە ناكات چونكە خەڵك ئیتر متمانەی لەدەست داوە ,دەرفەتی زۆری پێدان بەڵام هەرواتان زانی خەڵك گەوج و نەزانە,بۆ هەموو كارەساتێك ونەهامەتیەك سیناریویەكی چەواشەكارانەتان دروست دەكرد,بەڵام ئیتر سینارۆكان ئاشكران و خەڵكیش وریا بۆتەوە,هیچ رێگایەكتان لەبەردەم نەماوە تەنیا بەخۆداچونەوە نەبێت و چۆك دادان نەبێت لەبەردەم ئیرادەی خەڵك....