یادەكانی ئازار و نەورۆز لەنێوان پێكەنین و گریان

  دوو شەممە, 05 ئازار 2018 16:03

 

وا ئەمساڵیش وەك ساڵانی رابردوو لە ساتە وەختی بۆنەكانی ئازار و نەورۆز داین،هەر چەند وەك دەڵێن مانگی ئازار بۆ ئێمەی كورد بەڕاستی مایەی ئازار بووە و، زۆرترین ئێش و ئازاری كورد لەم مانگادا بووە، بەڵام بوونی رۆژی ئازادی و ڕاپەرین لەم مانگەدا بەجۆرێك خۆشی و شادی بە دڵی كورد بەخشیوە، كە تاڕادەیەكی زۆر ئازارەكانی ئازاری بیر بردۆتەوە.
وائەزانم كەم تا زۆر پێویست بەوە ناكات ئاماژە بە سەردەمی تاریكی رۆژگاری بەعسیزم بدەین،چونكە یەكجار زۆر باسكراوە و هەركەسێكیش بەچاوی خۆی نەی بینیبێ‌ ئیتر ئەم حیكایەتە بەكەس تەصویر و مۆنتاژ ناكرێ‌. بەڵام پێویستە بڵێین ئەوەی لەسەردەمی خەباتی شاخدا راپەڕینی بەرهەم هێنا ئیرادەی پۆڵاینی خەڵكی كوردستان بوو،ئاخر ئەو نەمامە ئیسقانی خەڵكی فیداكاری بۆ كرا بە پاچ و پاچەكۆڵەی پێكرا،خوێنی قارەمانانی بۆ كرا بە ئاو و، نەیانهێشت گەرمی بیابانەكانی عەرعەر و نوگرە سەلمان خوڵ و گڵی دەوری نەمامەكە وشك كاتەوە و، نەبەردی و چاونەترسی شۆڕشگێڕانی بۆ كرا بە قەڵغان تا بەعسیە خوێن تاڵەكانی عۆجە و تكریت دەستیان پێی نەگات و نەیبڕنەوە.
ئێستا چی؟ ئێستا هیچ و هیچ! واتا هیچ بۆ خەڵك و هەموو بۆ ئەوان،ئاخر ئەوان كێن؟ئەوان هەر ئەوانەن كە بە حازر خۆری راهاتوون،ئەوان هەر ئەوانەن كە بە كولێرە و نانی خەڵك مانەوە و لەبرسا نەمردن، بەڵام دوای تێر خواردنیان بەكەسیان نەوت ماون یان مردوو، ئاخر ئەم مەسەلەیە ئەوەندە ئاڵۆز و پڕ ئازارە بەكەس باس نەكراوە تا بە من باس بكرێ‌، وائەزانم هەركەس بەڕاستی دڵسۆزی كورد و كوردستان بووە و فیداكاری كردوە، ئێستا ئەگەر مانگانەكەی یەك ملیۆن دنیاریش بێ‌ كەس لاری نیە،چونكە هەموو ئەوانەی كە ئێستا ماون لە یەك دوو هەزار كەس زیاتر نین،بەڵام نا ئەصلی كێشەكە ئەوەیە بۆیەكەم جار لە دنیادا،لای ئێمە یاساكانی بایۆلۆژی داهێنانی تیاكراوە و خەباتی شاخ لە باوكەو بۆ كوڕ و، لە مامەوە بۆ برازا و لە خاڵەوە بۆ خوشكەزا بە شێوەی بۆ ماوەیی پشت بە پشت و دەست بەدەست دەگوازرێتەوە؟!.
با واز لەمەش بێنین، با بزانین دەسەڵاتی كوردی لە باشوری كوردستان لە ماوەی یەك چارەگە سەدەی رابردوودا چ زوڵمێكیان لە خاك و خەڵك كردوە،چ ناحەقێكیان بەرامبەر بە نەتەوە و زمان كردوە، چ ناعەدالەتێكیان لە ناو كۆمەڵگادا بەرپاكردوە؟ راستی نەمن و نە غەیری من كەس نازانێ‌ لە كوێوە دەست پێبكات!!! ئاخر هەرچی بڵێین هەر كەمە،لە چی بپرسین؟ لەوە بپرسین و بڵێین بۆ لە شەڕی نەگریسی ناوخۆ 5هەزار گەنجی كوردتان بەكوشتدا؟بڵێین بۆ كوردستانێكی چوار لەتكراوتان دوو لەت كردەوە؟ بڵێین بۆ لەم ماوە زۆرەدا نەتانهێشت سوپایەكی یەكگرتووی مەشقپێكراوی بێ‌ لایەن دروست بێ‌؟ بڵێین بۆ لە كارگوزاری فەرمانگەیەكەوە تا وەزیر و پەرلەمانتارێك بە تەزكیەی حیزبی خەڵكتان دامەزراند و تەواوی جومگەكانی كۆمەڵگاتان بە حیزبی كرد؟ بڵێین بۆ ناو و رەنگ و جوگرافیاتان لەنێوان خۆتاندا بەشكرد؟ بڵێین بۆ هەزاران كەسی بەتوانا و بلیمەتان لە ناوەندە ئەكادیمیەكان بێبەشكرد و، خەڵكی كەم ئاستتان كرد بەشت و خەڵكی زیرەكی بێ‌ دەستتان كردە مشت؟ بڵێین بۆ لادێكانتان وێرانكرد و شارەكانتا كرد بە بەندیخانەیەكی گەورە؟بڵێین بۆ خەڵكتان لە كشتوكاڵ تۆراند و نەك شیر و پەنیر بەڵكو تەماتە و پەتاتەشمان كەوتە دەستی ئێران و توران؟بڵێین بۆچی بۆ مەرامی حیزبی لەشكرێكی زیاتر لە یەك ملیۆن و نیو موچەخۆرتان دروستكرد، لەكاتێكدا كەمتر لە نیوەی ئەم ژمارەیە ناوی هەیە لە حكومەتی عێراق؟بڵێین بۆ مانگ بووە بە 90 رۆژ؟ باشە 27 ساڵە پارەكانتان چی لێكردوە؟بڵێین بۆ عێراق بەم وەزعە شڵەژاویەی خۆیەوە تەنیا كرێی ئیشپێكردن بە كۆمپانیاكانی نەوت دەدات، بەڵام ئێوە جگە لە كرێ‌ لە فرۆشتنیش نسبەتان بۆداناون؟بڵێین بۆ بە تانكەری قاچاغ رێگاو بانەكانتان وێرانكرد و دوایش چاكتان نەكردنەوە؟بڵێین بۆ لەم زەریا نەوتە گاز نادەن بە وێستگەكانی كارەبا و سەرە مولیدە بەس نەبوو، دواتر سەرە مەحاویلەشتان داهێنا؟بڵێین بۆ بازاڕتان قۆرخ كرد و بۆ هەمووتان بوون بەبازرگان؟بڵێین بۆ یەك مانگ دوای تەواو كردنی پڕۆژەكان دەست دەكەوەنە بە نۆژەنكردنەوەیان؟بڵێین بۆ لەم وڵاتە كوالیتی كۆنترۆڵ سفرە و پلە بەرزێك دەتوانێ‌ ئەوەی بیەوێ‌ بیخاتە بازاڕەوە؟ بڵێین و بڵێین و بڵێین!!!
دڵنیابن هەرچی بڵێین هەر هیچمان نەوتوە،چونكە هەموو ئەوانەی وتمان راستیەكی حاشا هەڵنەگرن و، لەسەر ئەرزی واقیعدا بە بەرچاوی دۆست و دوژمنەوە وەك رۆژی رووناك دیارن.بەداخەوە لە هەموو شتێك قورستر و لە هەموو كارەساتێك گەورە تر، بێ‌ ئومێد كردنی خەڵك بوو دوای سەدەیەك لە ئومێدی سەركەوتن و خەوبینین بە دەسەڵاتی كوردیەوە،زۆر بەداخەوە پێكەنین و خۆشی ساتەكاتی راپەرین، ئێستا بوون بە فرمێسك و گریان،لە دەسەڵاتدانیش مێش نیە میوان.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.