لە(16/3)داهەڵەبجە چی دەوێ؟!

  هەینی, 16 ئازار 2018 18:10


لە یادی (30) ساڵەی كیمیابارانی هەڵەبجەدا، جێی خۆیەتی جارێكی تر بیر لەوە بكەینەوە كە بۆچی سەرەڕای (26)ساڵ حوكمڕانی كوردستان و، دەیان بڕیاری گرنگ و گەورە، هێشتا شارەكەمان لە سەرەتاكانی بنیاتنانەوەی شارستانیەت و بە چەندین كێشەی سیاسی و ئەمنییەوە دەژی؟! بۆچی هیشتا گازندە لە بەرپرسان و دەسەڵاتدارانی شارەكەو حكومەت دەكرێت؟! ئەگەر دەسەڵات و بەرپرسان كەمتەرخەمن و، تا ئاستێكیش حیزبەكان لە ئاستی پێویستدا نین بۆ خزمەتی هەڵەبجەو بەدەمەچوونی خواست و پێویستییەكانی، ئایا ناكرێت رێگای تر بگیرێتە بەر؟

(1)
(هەڵەبجە دڵسۆزیی دەوێ)
ئەم شارە پڕیەتی لە كەسی خەمخۆر و دڵسۆز، بەڵام بێدەسەڵات لە بڕیاردان، كەسانێكیش هەن خاوەن بریار، بەڵام لاواز لە دڵسۆزی و خەمخۆری بۆ شارەكەو بەرژەوەندی و پێداویستییەكانی خەڵكە بەڕێزەكەی..
هەڵەبجە پێویستی بە دڵسۆزیی هەیە.. پێویستە بەرپرسە كارگێڕی و سیاسییەكانی ئەم شارە جارێكی تر دوور لە بەرژەوەندی كەسی و حیزبی خۆیان، بێنەوە مەیدانی خزمەت، سەربەرزی بنوێنن بۆ شارەكەیان و، بریار بدەن دەستكەوتی تایبەت لەسەر حیسابی شاری هەڵەبجە بخەنە ژێر پێ..
ئەوە هەنگاوێكی گەورەی خزمەتكردنی ئەم شارەیەو، بەوەش مێژووی سەربەرزیی و نمونەیی بۆ خۆیان و بۆ شارەكەش تۆمار ئەكەن و، هەر ئەوەش هەنگاوێكی رزگاربوونی ئەم شارەیە لە خەم و خەفەت و كێشە و گرفتەكانی..
گرنگە هەر تاكێك لای خۆیەوە دڵسۆزی بۆ شارەكەو بەرژەوەندییە گشتییەكانی هاوڵاتیان بنوێنێت و، تا ئاستی بەرپرسیارێتی و دەسەڵاتی خۆی گەردن كەچ بێت، بێگومان ئاوی لێڵی بێباكی روون دەبێتەوە..

(2)
هەڵەبجە ئاشتی و ئاساییشی دەوێ
هەڵەبجە بە شاری ئاشتیخوازی و خۆشەویستی و رێزی نێوان پێكهاتەكەی ناسراوە، هەر ئەوەش پاڵنەری ئەوە بوو كە لە پەرلەمانی كوردستان دەنگ لەسەر یاسای ناساندنی شارەكە بە (پایتەختی ئاشتی) بدرێت، بەڵام ئەنجامی بێ خزمەتی حكەمەت و بێ خەمی بەشێك لە بەرپرسان و، ئەو بارودۆخە قەیراناوییەی چەند ساڵێكە یەخەی دانیشتووانی هەرێمی گرتووە، شاری هەڵەبجەش بە مەبەست بێت یان بێ مەبەست، جاروبار لێرەو لەوێ دەنگی شڵەژانی ئاساییشی نێوان خەڵكەكەی دەبیسترێت..
خەڵكی شاری هەڵەبجە بە هۆشیاری زۆرینەی پێكهاتەكانیەوە، نمونەی بەرچاو و جوانیان لە رابردوودا نیشانداوە، زانایانی ئایینی و رێكخراوەكان و چالاكوانان و، تەنانەت تا ئاستێكی زۆریش لەناو حیزبەكانی شارەكەدا، ئەوە بڕاوەتەوە و ئیرادەیەك هەیە بۆ پارێزگاری شارەكە لەو دەستانەی ئاشتی تێكدەدەن، بەڵام هۆشیاری زیاتر و چاوكراوەیی زیاتری دامودەزگا ئاسایشییە دڵسۆزەكانی دەوێ، تا نمونە گەورەكانی ئاشتی و ئاساییش و خۆشگوزەرانی و پێكەوەیی گەشەی زیاتر بكات و، لە تەواوی دونیادا دەنگ بداتەوە.. ئەمەش دەست لەناودەستی نێوان گشت حیزبەكان و دامودەزگاكان و، رێكخراوەكان و، خەمخۆرانی دەوێ..
هەڵەبجە سەربەرزە بە هۆشیاری و پەروەردەی دانیشتووانەكەی لەو پێناوەدا، بەڵام پێویستی بە زیاتر هەیە..

(3)
هەڵەبجە بەخشندەیی دەوێ
بەدرێژایی مێژووی نوێی شاری هەڵەبجە، بەتایبەت لە دوای راپەڕینی (1991)ەوە، ناوچەكە دەرفەتی ژیانەوەی زۆر بووە، بەهۆی بوونی سنورەكانی لەگەڵ كۆماری ئیسلامی ئێران، سەرەڕای دەرفەتی وەبەرهێنانی تر، بەڵام گرنگی نەدانی دەسەڵاتی هەرێم بەم ناوچەیە، ئەو دەرفەتەی لەكیس خەڵكەكەی دا و نەتوانرا گەشەی ئابوری دانیشتوانی لێ بكەوێتەوە، بۆیە زۆرینەی خەڵكی پارێزگای هەڵەبجە باری ئابورییان لە ئاستی ناوەندی و كەمتردایەو، كرانەوەی بازرگانی و فراوانبوونی ئابوری تێدا نابینرێت..
ئەوەی كە رێگرێكی گەورە بووە لەم پێناوەدا، وێڕای كەمتەرخەمی حكومەت و دەسەڵاتی هەرێم، ملكەچ نەكردنی بەشێك لە حیزبەكان بووە بۆ خواست و پێداویستییەكانی شارەكە، بۆیەش لەو ململانێ نادروستانەدا هاوڵاتیان بوونەتە قوربانی و شارەكەش لە گەشەی ئابوری دواكەوتووە.
سەرەڕای ئەوەی ئەو هاوشارییانەشی كە تا ئاستێك ئابورییان باشە لە ناو هەڵەبجەدا نین و كەمتر بە خواست و پێویستییەكانی ئەم شارەدا دەگەن و، هەندێكیشیان كەمتەرخەمن بەرامبەری..
ئەوەی بەدەستی دانیشتوانی ئەم شارە خۆی و دڵسۆزانی ئەكرێت، بەخشندەییە..
بەخشندەیی بۆ پێداویستییەكانی هەڵەبجە.. بەخشندەیی لە هەڵوێست و گوتاری دروست.. بەخشندەیی لە مافە حیزبی و شەخسییەكان بۆ خزمەتی بەرژەوەندییە گشتییەكان.. بەخشندەیی لە حەزە شەخسییەكان لە پابەندی زیاتر بە یاسا و هاوكاری هاوشارییانی تر.. لە سەرووی هەموویانەوە بەخشندەیی دارایی بۆ هاوكاری و بژێوی دانیشتووان و دابینكردنی پێداویستییەكانی.. هەروەها بەخشندەیی تری دڵسۆزی و خەمخۆری و لێبڕان و لێبوردەیی و....، تا بەدەستی خۆمان بەشێك له برینەكانمان ساڕێژ بكەین، تا زیاتریش بەخشندە بین زیاتر لە ئامانجەكانی شارەكە نزیك دەبینەوە..

(4)
هەڵەبجە پاكسازی دەوێ
ماوەی 30 ساڵی رابردووی مەینەتی دوای كیمیاباران و، 26ساڵ حوكمڕانی دەسەڵاتی هەرێمی كوردستان، زۆر شت دەبوو بۆ هەڵەبجە بكرایە و نەكراوە، وێڕای بێباكی دەسەڵاتدارانی حكومەتی هەرێم، ناوخۆی ئەم پارێزگا خۆشەویستەش بێبەش نییە لە كەسی گەندەڵ و بێباك و خۆرەی بەرژەوەندییەكان، ئەوانەی لەم شارەدا دەژین، باشتر لەوە دەگەن كە چەندین جار كێشەی ناوشار و ئاشتی ناو جەماوەر و خەڵكە بەئەمەك و دڵسۆزەكەی، لەلایەن چەند كەس و بەرپرسێكی نەشیاو بە ئەرك و بەرپرسیارێتی دراوە بە بادا و، دانیشتوانی شارەكەی دوچاری كیشەو گرفتی زیاتر كردووە..
ئەگەر ئەو گەندەڵی و بێباكی و كەسە بەرژەوەندیخوازانەی ناو هەڵەبجە نەبوونایە زۆر زیاتر لەوەی هەیە بۆ هەڵەبجە جێبەجێ دەكرا، بۆیە جێی خۆیەتی ئەوە بەبیر خۆمان بهێنینەوە كە هەڵەبجە پێویستی بە پاكسازییە، پێویستی بە پێداچوونەوە هەیە، بۆ دیاریكردنی بەرپرس و بەڕێوەبەر و كاربەدەستانی شیاو بۆ شوێنە گرنگ و پۆستە كارگێڕی و حیزبیەكانی شارەكە، با ئیتر پۆستی بە وەكالەت نەمێنێت و خەڵكی هەڵەبجەش ئاهی بەرپرسی نابەرپرس و كەسانی تێكدەر بە ئاشتی و ئاساییشی ئەم پایتەختی ئاشتییە هەڵەنكێشن..
پاكسازی هەوێنی چاكسازی دێنێتە كایەوەو، زۆر كێشەی پارێزگای هەڵەبجە چارەسەر دەكات..

فەهمی حەمە تۆفیق

فهمی حمە تۆفیق عارف...
بەرواری لەدایكبوون: ( 11 / 4 / 1976 )
شوێنی لەدایكبوون:...هەڵەبجە - عەبابەیلێ..
بڕوانامە:..بەكالۆریۆس / جوگرافیا (زانكۆی صلاح الدین) 2001 ـــ ماستەر/ جوگرافیا (سانت كلیمێنتس) 2010
ئیش و پۆستی ئێستا:.مامۆستا (ئا.ئەزمڕی كوڕان)، ل.ئەنجومەنی باڵای مامۆستایانی یەكگرتوو، كارگێڕی مەكتەبی پیشەییەكان، بەڕێوەبەری دەنگی یەكگرتوو / رادیۆی سلێمانی...
خوێندنەوەو رێكخستنی دوو كتێبی مەرحومی د.ئەكرەم عەنەبی بۆ چاپ ئەوانیش:. (1- لە هەڵەبجە بووم، 2- ئینجیلی بەرنابا)،
كتێبێك ئامادەیە بۆ چاپ (لەنێوان مامۆستا و قوتابیدا).