لە پێشەنگانى پێشین (يادى شەهیدبوونى پێشەوا قازى محەممەد)


ئه‌مڕۆ 10ی‌ خاكه‌لێوه‌ی (30 /3 /1947) ساڵڕۆژی‌ له سێداره‌دانی‌ پێشه‌وا قازی‌ محەممەدو هاوڕێیانی‌ صه‌دری‌ قازیی‌ و سه‌یفی‌ قازییه‌:
به‌و بۆنه‌یه‌وه‌ دیمه‌نێك له‌ ساته‌كانی‌ پێش شه‌هیدبوونی‌ و ده‌قی‌ وه‌صیه‌تنامه‌كه‌ی‌ پێشكه‌ش ده‌كه‌م به‌ هاوڕێیان، تكام له‌و براو خوشكانه‌ هه‌یه‌ كه‌ نه‌یانخوێندۆته‌وه‌، با بیخوێننه‌وه‌:
كاتێك قازی‌ (نیكوداد)ی نادادگه‌ر حوكمی‌ له‌ سێداره‌دانه‌كه‌ی‌ بۆ پێشه‌وای‌ شه‌هید قازی‌ محمد خوێنده‌وه‌، وتی‌: " قازی‌! دانیشته‌ وه‌صیه‌تنامه‌ی‌ خۆت بنوسه‌". قازی‌ زۆر خوێنساردانه‌ چه‌ند دێڕێكی‌ نووسی‌. پاش ماوه‌یه‌ك وتی‌ به‌ مه‌لایه‌ك كه‌ هێنابوویان بۆ ته‌ڵقینی‌ شایه‌تومانی‌ قازی‌! : وه‌ره‌ بنووسه‌. قازی‌ هه‌ندێ بابه‌تی‌ وت كه‌ په‌یوه‌ندی‌ به‌ میرات و خێزان و شتی‌ تایبه‌ته‌وه‌ بوو، مه‌لاكه‌ ده‌ینووسی‌. پاش ئه‌وه‌ قازی‌ به‌ مه‌لاكه‌ی‌ وت: هه‌ندێ وه‌صیه‌تم هه‌ن بۆ میلله‌تی‌ كورد, من به‌ فارسی‌ ده‌یڵێم, تا ئه‌مانه‌ چاك تێی‌ بگه‌ن، به‌ڵام تۆ به‌ كوردی‌ بینووسه‌. مه‌لاكه‌ وتی‌: قوربان! من نازانم به‌ كوردی‌ بنوسم. قازی‌ وتی‌: ئه‌مه‌ش یه‌كێكی‌ تر له‌ به‌دبه‌ختییه‌كانی‌ گه‌لی‌ كورد. بێنه‌ با خۆم بینووسم! پاشان ئه‌م وه‌صیه‌تنامه‌یه‌ی‌ به‌ خه‌تی‌ خؤى نووسی‌:
ده‌قی‌ وصیه‌تنامه‌ی‌ پێشه‌وا قازی‌ محمد
بسم الله الرحمن الرحیم
میلله‌تی‌ كورد، نه‌وه‌ ئازیزه‌كانم، ئه‌ی‌ براو خوشكانێ كه‌ مافتان پێشێل كراوه‌و سته‌متان لێ كراوه‌!
من خه‌ریكم ساته‌ وه‌خته‌كانی‌ ژیانم به‌ڕێ ده‌كه‌م، چه‌ن بیرخستنه‌وه‌و ئامۆژگارییه‌كم بۆ ئێوه‌ هه‌یه‌:
بیكه‌ن به‌ خاتری‌ خوا له‌ مه‌زیاتر دوژمنایه‌تی‌ و دوبه‌ره‌كایه‌تی‌ له‌ نێو یه‌كتردا مه‌كه‌ن. یه‌كگرن و پشتیوانیی‌ له‌ یه‌كتر بكه‌ن، بێ هوده‌و به‌ به‌لاش خۆتان به‌ دوژمن مه‌فرۆشن، تا دوژمن كاری‌ پێتان هه‌بێ ئێوه‌ی‌ ده‌وێ و، به‌ هۆی‌ ئێوه‌وه‌ به‌ ئامانجه‌كانی‌ خۆی‌ ده‌گا. دوژمن سه‌باره‌ت به‌ ئێوه‌ هیچ سۆزو نه‌رمییه‌كی‌ نیه‌، هه‌ر هه‌لێكی‌ بۆ هه‌ڵكه‌وێ خۆی‌ لێتان نابوێرێ. دوژمانانی‌ گه‌لی‌ كورد زۆر سته‌مكارو بێ ڕه‌حمن، پشتگیریی‌ یه‌كتر ڕه‌مزی‌ سه‌ركه‌وتنی‌ هه‌ر میلله‌تێكه‌. له‌ غه‌یری‌ ئه‌مه‌دا میلله‌ت تیا ئه‌چێ و په‌رت ئه‌بێ و، ده‌كه‌وێته‌ ژێر ده‌ست و ئه‌بێته‌ دیلی‌ دوژمن.
ئه‌ی‌ گه‌لی‌ كورد! ئێوه‌ هیچتان له‌ گه‌لانی‌ تر كه‌متر نیه‌. غیره‌ت و لێهاتوویی‌ ئێوه‌ له‌و میلله‌تانه‌ زیاتره‌ كه‌ دیلی‌ دوژمنان بون و، ئازاد بوون و، یه‌كێتی‌ و یه‌كپارچه‌یی‌ خۆیان پیشان دا. ئێوه‌ش با له‌مه‌ زیاتر ژێرده‌سته‌و كزو بێناز مه‌بن. خۆتان به‌ دوژمن مه‌فرۆشن. له‌گه‌ڵ یه‌كتر ئیره‌یی‌ مه‌كه‌ن. به‌م جۆره‌ ده‌توانن بگه‌ن به‌ ڕزگاریی‌.
براكانم! فریوی‌ دوژمن مه‌خۆن. دوژمنی‌ كورد له‌ هه‌ر ڕه‌نگ و تیره‌و نه‌ژادێ بێ، بێ ویژدانه‌و ده‌رهه‌ق به‌ ئێوه‌ بێ ڕه‌حمه‌. به‌هۆی‌ هه‌ندێ كورده‌وه‌ هه‌ندێكی‌ تر له‌به‌ین ئه‌به‌ن. دوژمنی‌ ئێوه‌ حه‌سوده‌، به‌ فێڵ و ته‌ڵه‌كه‌ ئێوه‌ دژی‌ یه‌كتر ده‌جوڵێنێ و، به‌ كوشتنتان ده‌دا.{...}
من ئه‌وه‌تام له‌ دواساته‌كانی‌ ژیاندا، به‌ خاتری‌ خواو له‌به‌ر خوا ئامۆژگاریتان ئه‌كه‌م. خوا خۆی‌ ئاگاداره‌ هه‌رچیم له‌ ده‌ست هات له‌ به‌خشینی‌ گیان و ماڵ و هه‌وڵ و تێكۆشان درێغیم نه‌كرد. ئێسته‌ش له‌م بارو دۆخه‌دا دوباره‌ ئامۆژگاریم بۆتان ئه‌وه‌یه‌ كه‌ فریوی‌ دوژمن نه‌خۆن و، به‌ سوێندو قورئان خوێندن و قه‌ول و قه‌راریان پشت مه‌به‌ستن، چونكه‌ دوژمنان خوا ناناسن، بڕوایان به‌ پێغه‌مبه‌رو ڕۆژی‌ دوایی‌ و لێپرسینه‌وه‌و حساب و كتاب نیه‌، ئێوه‌ هه‌رچه‌ند موسڵمانن، به‌ڵام چونكه‌ كوردن هه‌ر مه‌حكومن و، به‌لای‌ ئه‌وانه‌وه‌ به‌ دوژمن حساب ده‌كرێن، بۆیه‌ ماڵ و گیانی‌ ئێوه‌ بۆ ئه‌وان حه‌ڵاڵه‌و، به‌لایانه‌وه‌ ده‌سكه‌وت و غه‌نیمه‌یه‌.
من بڕیار نه‌بوو بڕۆم و ئێوه‌ به‌ دوژمن بسپێرم، چه‌ند جار بیرم له‌ ڕابردوو كردۆته‌وه‌، كه‌ چۆن گه‌وره‌كانی‌ ئێمه‌ فریوی‌ سوێند و قورئانی‌ دوژمنیان خواردووه‌و، گیراون و كوژراون، چونكه‌ دوژمن نه‌یتوانیوه‌ له‌ گۆڕه‌پانی‌ جوامێریدا خۆڕاگر بێ به‌رامبه‌ریان، ناچار په‌نایان بردۆته‌ به‌ر درۆو فێڵ و ئه‌وانیان فریوداوه‌و، كوشتویانن.
من ئه‌مانه‌م هه‌موو له‌ بیره‌و، پشت به‌ دوژمن نابه‌ستم: پێش گه‌ڕانه‌وه‌ی‌ حكومه‌تی‌ شا بۆ كوردستان، چه‌ندین جار په‌یام به‌ من درا ـ له‌ ڕێی‌ چه‌ند كه‌سێكی‌ كوردو غه‌یری‌ كوردیشه‌وه‌ ـ كه‌ نیازی‌ شاو ده‌وڵه‌تی‌ ئێران ئه‌وه‌یه‌ كه‌ قه‌تره‌یه‌ك خوێن له‌ كوردستان نه‌ڕژێ، به‌ڵام ئه‌وه‌تا ئێسته‌ به‌چاوی‌ خۆتان ده‌ره‌نجامی‌ قه‌ول و قه‌راری‌ ئه‌وان ده‌بینن، چونكه‌ سه‌ركرده‌كانی‌ كوردو سه‌ره‌ك هۆزه‌كان خیانه‌ت ناكه‌ن و، خۆیان به‌ حكومه‌تی‌ شا نافرۆشن، ئه‌وه‌ چاره‌نوسی‌ ئێمه‌و كۆماره‌كه‌ی‌ ئێمه‌یه‌.
ئامۆژگاری‌ من بۆ ئێوه‌ ئه‌وه‌یه‌ كه‌ مۆڵه‌ت بده‌ن با منداڵه‌كانتان زانست فێر ببن، چونكه‌ كورد هیچی‌ له‌ میلله‌ته‌كانی‌ تر كه‌متر نیه‌، خوێندن و وه‌رگرتنی‌ زانست هۆی‌ پێشكه‌وتن و ده‌سكه‌وته‌{هه‌ر میلله‌تێ ڕوو له‌ زانست بنێ} له‌ كاروانی‌ میلله‌تان و قافڵه‌ی‌ شارستانێتی‌ دوا ناكه‌وێ، ده‌ستخستنی‌ زانست و زانیاریی‌ چه‌كی‌ كوشنده‌ی‌ دوژمنی‌ كورده‌.
دڵنیابن یه‌كێتی‌ و ڕێككه‌وتن و ده‌ستخستنی‌ زانیاری‌ ئێوه‌ به‌سه‌ر دوژمندا زاڵ ده‌كات. ئێوه‌ نابێ به‌ كوشتنی‌ من و ئامۆزاكانم ترس ڕوتان تێ بكات، هێشتا ده‌بێ كه‌سانێكی‌ تریش گیانی‌ خۆیان ببه‌خشن تا به‌ ئاواته‌كانیان بگه‌ن، دڵنیام دوای‌ ئێمه‌ كه‌سانێكی‌ تریش هه‌ن كه‌ به‌ فێڵ و درۆی‌ دوژمنان له‌ناو ده‌برێن. دڵنیام دوای‌ ئێمه‌ كه‌سانێكی‌ تری‌ زۆر ئه‌كه‌ونه‌ داوی‌ فێڵ و درۆی‌ ده‌وڵه‌ت و گرفتار ئه‌بن، به‌ڵام هیوادارم كوشتنی‌ ئێمه‌ ببێته‌ هۆی‌ په‌ندو عیبره‌تی‌ خه‌مخۆرانی‌ كورد.
ئامۆژگارییه‌كی‌ تری‌ من ئه‌وه‌یه‌ كه‌ داوای‌ یارمه‌تی‌ ته‌نها له‌ خوا بكه‌ن، هه‌ر هه‌نگاوێكتان نا بۆ سه‌رفرازی‌ میلله‌ت، ته‌نها له‌ خوا هاوكاریی‌ داوا بكه‌ن، من دڵنیام خوای‌ گه‌وره‌ یارمه‌تیتان ئه‌داو، سه‌رتان ده‌خا.
ڕه‌نگه‌ بێ به‌ خه‌یاڵتاندا كه‌ من (قازی‌ محمد) بۆچی‌ سه‌رنه‌كه‌وتم؟ له‌ وه‌ڵامدا ده‌ڵێم: به‌خوای‌ گه‌وره‌ سوێند ده‌خۆم. كه‌من سه‌كه‌وتووم (!)، چ نیعه‌ت و چ سه‌ركه‌وتنێ باڵاترو زۆرتره‌ كه‌وا خه‌ریكم گیان و ماڵ و سامانی‌ خۆم له‌ ڕێی‌ میلله‌ت و نیشتمانی‌ خۆمدا ده‌به‌خشم. باوه‌ڕ بكه‌ن، من له‌ ناخی‌ دڵمه‌وه‌ ئاره‌زوی‌ ئاوا ڕۆژێكم ده‌كرد، به‌ خۆمم ده‌وت: ئه‌گه‌ر مردنم به‌ جۆرێك بێت كه‌ له‌ خزمه‌تی‌ خواو میلله‌تی‌ خۆمدا سه‌ربه‌رز بم، ئه‌و مه‌رگه‌ بۆ من پیرۆزه‌و سه‌ركه‌وتنه‌.
ئازیزه‌كانم! كوردستان هی‌ ته‌واوی‌ كوردانه‌، وه‌ك خێزانێك وایه‌ كه‌ هه‌ر ئه‌ندامێكی‌ به‌ كارێكه‌وه‌ سه‌رگه‌رمه‌، كه‌سێكی‌ تر مافی‌ به‌رچاو ته‌نگی‌ و ئیره‌یی‌ نیه‌. كوردستان ئه‌و خێزان و ماڵه‌یه‌. هه‌ركات زانیان كه‌سێ له‌ تاكه‌كانی‌ ئه‌م خێزانه‌ ده‌توانێ كارێك ئه‌نجام بدات، نه‌كه‌ن ڕێگری‌ لێ بكه‌ن و له‌مپه‌ری‌ بۆ دروست كه‌ن. نه‌كه‌ن ده‌رهه‌ق به‌ كه‌سانێ كه‌ به‌رپرسیارێتی‌ و كارێكی‌ گرنگ به‌ كه‌سێ سپێردرا ـ كه‌ ئه‌زمونی‌ زیاتری‌ هه‌بووـ ده‌بێ بێ به‌ده‌مه‌وه‌.
ئه‌وان فرمانی‌ ئێمه‌یان جێ به‌جێ نه‌كرد، جگه‌ له‌وه‌ دوژمنایه‌تی‌ ئێمه‌یان به‌ ڕه‌وا زانی‌ ـ چونكه‌ ئێمه‌ خۆمان به‌ خزمه‌تكاری‌ خه‌ڵكی‌ ده‌زانی‌ ـ ئێسته‌ ئه‌وان له‌ ماڵی‌ خۆیان و له‌ ناو خێزان و خوێشانی‌ خۆیاندان و، كاتیان له‌ خه‌وی‌ شیریندا به‌سه‌ر ده‌به‌ن، ئێمه‌ی‌ خزمه‌تكاری‌ میلله‌تیش له‌ ژێر قه‌ناره‌داین و، دواساته‌كانی‌ ژیانمان به‌سه‌ر ده‌به‌ین.
من به‌ نوسینی‌ ئه‌م وه‌صیه‌تنامه‌یه‌ ته‌مه‌نم كۆتایی‌ دێت، ئه‌گر منیش به‌رپرسیارێتیه‌كی‌ گه‌وره‌م له‌سه‌ر شان نه‌ئه‌بوو، ئێسته‌ وه‌ك ئێوه‌ له‌ ناوخێزانی‌ خۆمداو له‌ خه‌وی‌ شیریندا ده‌بوم.
ئه‌م ئامۆژگارییانه‌ یه‌كه‌م بۆ خۆمه‌، پاشان بۆ ئێوه‌. ئه‌ركی‌ منه‌ كه‌ پێتان بڵێم: ئه‌گر كه‌سانێكی‌ تر به‌رپرسی‌ ئێمه‌ بونایه‌و مه‌سئولیه‌تی‌ ئێمه‌یان له‌سه‌ر شان بوایه‌, ئێسته‌ ئه‌وان له‌ ژێر په‌تی‌ ئیعدامدا ده‌بون.
ئیـتر بۆ ڕازیردنی‌ خوای‌ گه‌وره‌و، له‌به‌ر مه‌سئولیه‌ت و ئه‌ركی‌ سه‌رشانم، وه‌ك كوردێكی‌ خزمه‌تكاری‌ میلله‌ت و، كه‌سێ كه‌ فرمان به‌ چاكه‌و قه‌ده‌غه‌ی‌ خراپه‌ ده‌كا، چه‌ند ئامۆژگارییه‌كم بۆ ئێوه‌ هه‌یه‌، هیوادارم بۆ داهاتوو هۆی‌ ڕێنمویی‌ و په‌ندو عیبره‌ت بن بۆتان. ئه‌گه‌ر به‌ ته‌واوی‌ ئامۆژگارییه‌كانم له‌ گوێ بگرن، پشت به‌ خوای‌ گه‌وره‌ به‌سه‌ر دوژمندا زاڵ ده‌بن:
1- هه‌وڵ بده‌ن و به‌ توندی‌ پشت به‌ خوا ببه‌ستن و، بڕواتان ببێ به‌وه‌ی‌ لای‌ خواوه‌ هاتووه‌و، هه‌وڵ بده‌ن بۆ په‌رستنی‌ خواو، جێبه‌جێ كردنی‌ ئه‌ركه‌كانتان.
2- یه‌ كێتی‌ خۆتان بپارێزن، كاری‌ ناشایسته‌ مه‌كه‌ن، ئیره‌یی‌ به‌ یه‌كتر مه‌به‌ن، به‌ تایبه‌تی‌ به‌رامبه‌ر ئه‌ركه‌ قورسه‌كان.
3- زانستتان زیاتر كه‌ن، تا فریوی‌ دوژمنان نه‌خۆن.
4- بۆ چه‌ند ڕۆژێكی‌ ژیان له‌م دنیا بێ نرخه‌، خۆتان به‌ دوژمن نه‌فرۆشن، چونكه‌ دوژمن دوژمنه‌و، نابێ پشتی‌ پێ ببه‌سترێ.
5- ده‌رهه‌ق به‌یه‌كتر خیانه‌ت مه‌كه‌ن، نه‌ خیانه‌تی‌ سیاسی‌، نه‌ دارایی‌، نه‌گیانی‌ و ناموسی‌، چونكه‌ خیانه‌تكار لای‌ خوای‌ گه‌وره‌ سوك و گوناهباره‌. بشزانن خیانه‌تی‌ هه‌ركه‌سێ یه‌خه‌ی‌ خۆی‌ ده‌گرێته‌وه‌.
6- هه‌ركه‌س توانی‌ به‌بێ خیانه‌ت كاره‌كانی‌ ئێوه‌ ئه‌نجام بدات، له‌گه‌ڵ ئه‌و جۆره‌ كه‌سانه‌ هاوكاریی‌ بكه‌ن، نه‌ك به‌ ئیره‌یی‌ به‌رامبه‌ری‌ بوه‌ستنه‌وه‌، یا ببنه‌ سیخوڕی‌ بێگانه‌.
7- ئه‌و شوێنانه‌ی‌ له‌ وه‌صیه‌تنامه‌كه‌ نوسیومه‌ بۆ دروستكردنی‌ مزگه‌وت و نه‌خۆشخانه‌و قوتابخانه‌، له‌سه‌رتانه‌ جێبه‌جێی‌ بكه‌ن و، تا ئه‌و شوێنه‌ی‌ كه‌ گونجاوه‌ سوودیان لێ وه‌رگرن.
8- له‌ كارو هه‌وڵ و تێكۆشان كه‌مته‌رخه‌میی‌ مه‌كه‌ن، تا وه‌ك میلله‌تانی‌ تر له‌ دوای‌ كۆیله‌یی‌ و دیلیه‌تی‌ ڕزگاتان ببێ، سامان زێڕو زێوه‌ری‌ دنیایی‌ بێ بایه‌خه‌. ئه‌گه‌ر ولایه‌تێكی‌ سه‌ر به‌خۆتان هه‌بێ كه‌ تیایدا ژیان به‌رنه‌ سه‌رو، سه‌ربه‌خۆتان بێ، ئه‌وكاته‌ ماڵ و سامان و ئابڕوو و نیشتمان و هه‌موو شتێكتان ده‌بێ.
9- جگه‌ له‌ (مافی‌ خوایی‌)، مافی‌ هیچ كه‌سێكم له‌ گه‌ردندا نیه‌، به‌ڵام هه‌ركه‌س وا دابنێ كه‌م یا زۆر مافێكی‌ له‌گه‌ردنمدایه‌، با مافی‌ خۆی‌ له‌ میراتگرانه‌كانم وه‌رگرێ.
تا كاتێ یه‌كگرتوو نه‌بن سه‌ركه‌وتوو نابن، نیسبه‌ت به‌یه‌كتر سته‌م و ده‌ستدرێژیی‌ مه‌كه‌ن، چونكه‌ خوا سته‌مكار له‌ناو ده‌با، ئه‌مه‌ به‌ڵێنی‌ خوایه‌: سته‌مكار ئه‌ڕوخێ و، خوا تۆڵه‌ی‌ سته‌ملێكراوی‌ لێ ده‌سێنێ.
هیوادارم ئه‌م ئامۆژگارییانه‌ به‌ هه‌ند بگرن، خوا به‌سه‌ر دوژمناندا سه‌رتن.
مراد ما نصیحت بودو گفتیم، حوالت با خدا كردیم و رفتیم.. مه‌به‌ستی‌ ئێمه‌ ئامۆگاریی‌ بوو و، كردمان حه‌واڵه‌ی‌ خوامان كردن و، ڕۆشتین".
ئیمزا: خزمه‌تكاری‌ نه‌ته‌وه‌و نیشتیمان: قازی‌ محمد
هه‌ڵوێستی‌ نه‌ترسانه‌ و بڕوادارانه‌ی‌ قازی‌ له‌ ساته‌وه‌ختی‌ پێش له‌ سێداره‌دانی‌:
پێش جێبه‌جێكردنی‌ حوكمی‌ له‌ سێداره‌دان، قازی‌ محمد داوای‌ كرد مۆڵه‌تی‌ بده‌ن كه‌ نوێژو دۆعا بكات. بۆیه‌ ده‌ستنوێژی‌ گرت و دوو ڕكات نوێژی‌ كرد و ماوه‌ی‌ زیاتر له‌ دوو سه‌عات موناجاتی‌ له‌گه‌ڵ‌ خوا كرد. به‌ جۆرێ كه‌ بووه‌ هۆی‌ بێزاری‌ دادوه‌ران و ئاماده‌بووان. پێشه‌وا قازی‌ كه‌سێكی‌ زانا و شه‌رعزان بوو، به‌ پێی‌ به‌ڵگه‌نامه‌كانی‌ سه‌رده‌می‌ ئه‌و، له‌ هه‌موو كار و باره‌كاندا هه‌وڵی‌ ده‌دا په‌یڕه‌وی‌ له‌ شه‌ریعه‌تی‌ ئیسلام بكا، بۆیه‌ له‌ له‌حزه‌ی‌ بردنیشی‌ بۆ په‌تی‌ سێداره‌دا، له‌ خه‌می‌ ئیلتیزام به‌شرعی‌ ئیسلامه‌وه‌ بوو. پاش ئه‌وه‌ی‌ كه‌ به‌ دڵێكی‌ گه‌وره‌ی‌ ئیماندارانه‌وه‌ پێشوازیی‌ له‌ هه‌واڵی‌ ئیعدام كرد. كه‌ چاوی‌ به‌ هه‌ر سێ سێداره‌كان كه‌وت،(مه‌به‌ست سێداره‌ی‌ خۆی‌ و سه‌یفی‌ قازی‌ و سه‌دری‌ قازییه‌)، گوتی‌: سێداره‌ له‌ ئیسلامدا مه‌كروهه‌، گولله‌بارانم بكه‌ن. له‌ وه‌ڵامدا پێیان وت: بڕیار هه‌ر سێداره‌یه‌و، ده‌بێ هه‌روا بكرێ. دوای‌ ئه‌وه‌ كه‌ ویستیان هه‌ڵی‌ واسن، دووباره‌ مۆڵه‌تی‌ خواست هه‌ندێ نزاو پاڕانه‌وه‌ بكا، بۆیه‌ كاتێ په‌ت كرایه‌ كه‌ردنی‌, پێش ئه‌وه‌ی‌ ژێر پێی‌ خاڵی‌ بكه‌ن ده‌ ده‌قیقه‌ی‌ تر پاڕایه‌وه‌. پاشان گیانی‌ پاكیی‌ به‌ره‌و خاوه‌نه‌كه‌ی‌ گه‌ڕایه‌وه‌.
هه‌زار ڕه‌حمه‌ت له‌ گیانی. گۆڕی پڕ نور بێت.
(سوپاسي خواى گه‌وره‌ش ده‌كه‌م كه‌ يارمه‌تى دام ژياننامه‌ى پێشه‌واو تيشكێك له‌سه‌ر كۆمارى كوردستان بڵاو بكه‌مه‌وه‌..).