گاڵتەجاڕی دەنگەكان و هاوارەكەی هەڵەدنی...!!!

  سێ شەممە, 15 ئایار 2018 07:10

بەر لە هەڵبژاردنە گاڵتەجاڕیەكەی 12ی ئایار، هۆشداری زۆر درا بە هێزەكانی دەرەوەی پارتی و یەكێتی، بەڵام بەداخەوە تای هەڵبژاردن هێندە قورس بوو برا و برا یەكتریان نەناسی.
ئاشكرایە پەرلەمانتار (ئەبوبكر هەڵەدنی) كەسێكی زۆر ناسراو و دڵسۆزە،ئەوەی یەك رۆژ ئەو پیاوەی ناسیبێ‌ باش ئەزانێ‌ نەزاهەت و بەرائەت و دڵسۆزی ئەو پیاوە چەندە، هەڵەدنی لە سەرەتای بانگەشەكانی هەڵبژادن، زۆری نوسیی و زۆریش قسەكرد و، بەئەمانەتەوە ئەركی خۆی بەجێهێنا و هاواری كرد و تكای زۆری كرد.
وتی با سەرجەم لایەنەكانی دەرەوەی پارتی و یەكێتی، لەبەر تای هەڵبژاردن وەرەقەكان تێكەڵ نەكەن، هێڵی سور نەبەزێنن، قودسیەتی یەكتر نەڕوشێنن، شكۆی یەكتر نەشكێنن، دڵی یەكتر ئازارنەدەن، تكای كرد هەموو حزبەكان رووی دەمیان تەنها لە دەسەڵات بێ‌ و كاتی خۆیان بە شكاندنی یەكتر بە فیڕۆنەدەن، هاواری كرد ئێوە هەمووتان لای دەسەڵات وەك یەكن،كەس شەیتان نیە و ئەوی ترتان فریشتە، هاواری كرد لەكاتی بانگەشەدا لەبری پەلاماردانی یەكتر و سفركردنی یەكتر، پەلاماری دەسەڵات بدەن و دەسەڵات سفركەن، هاواركرد ئەگەر وانەكەن ئەوە لەدوای هەڵبژادن جووت حزبەكەی دەسەڵات وەك بەرزەكی بانان بۆ دەرئەچن و، ئێوەش دەستان لە هەمانەی خاڵی دەرەچێ‌.
ئیتر دوا بەدوای ئاشكرابوونی مەهزەلەی ئینتیخاباتەكەی عێراقی حەبیب، دەق و دەق هاوارەكەی هەڵەدنی راست دەرچوو، ئەوەبوو جووت حزبەكە بۆی دەرچون و ئەوانی تریش بە ئەمری واقیع و، لەبەر بێ‌ كەسی جارێكی تر سەریانكردوە بە یەك بەرەدا، تەنانەت هاتن لەماڵی یەكگرتووش دانیشت، ئەو ماڵەی 2 ساڵە و بەگشتی و، بەتایبەتی تریش لە سەروەختی بانگەشەكان وەك ماڵی خێوەكان ناشیرین و نامۆ و شووم كرابوو.
بە شایەتی مێژوو زۆربەی لایەنەكان ئەوەی بۆیان كرا و لەدەستیان هات، بەرامبەرە بە یەكگرتوو كردیان،فەیلەسوف و قاوەگرەوە و ئەستێرە ناسەكانی چەند لایەنێك، هەزار و یەك خەویان تەفسیر و تەئویل كرد لەسەر یەكگرتوو، ئاخر لەپا چی نازانم؟؟؟
باشە ئێستا خەجاڵەتی ناكێشن لەبڵاوكردنەوەی دەیان هەواڵی هەڵبەستراوی رێكەوتنی یەكگرتوو پارتی بۆ مەسەلەی بەرەی ئیسلامی و، دەنگدانی پارتیەكانی كەركوك بە لیستی یەكگرتوو؟
راستی داتاشینی درۆی شاخدار عەیبەیەكی زۆر گەورەبوو، بۆ كەسانێك كە مانای عەیبە بزانن.
بەهەر حاڵ دواجار هەڵبژان بە شێوەیەكی زۆر كۆمیدیا تەواو بوو، ئێستا لایەنەكان ئەزانن چەند هەڵە بوون لە شكاندنی كەرامەتی یەكتری.
وەك رۆژنامەنوسێك بێ‌ لایەنگری، بەدەگمەن شتی رەسمیم بینیوە لە لایەن یەكگرتوەوە لەسەر لایەنەكانی تر، ئەوانیش تەنها وەك وەڵام و راستكردنەوە،نەك شكاندن و ئابڕو بردن. بەڵام بەشایەتی مێژوو زۆربوون ئەوانەی، درێغیان نەكرد لە بە شەیتان كردنی یەكگرتوو،دەی ئێستا هەموو شتێك دەركەوت،ئەی كوا راستی قسەكانتان و تەفسیر و تەئویلەكانتان؟
هیوادارم هەموو حزبەكانی دەرەوەی دەسەڵات بەخۆیاندا بچنەوە و، جارێكی تر پەیمانی شەرەف ئیمزا بكەن و، ئیتر واز لەیەكتر شكاندن و تەشهیركردنی یەكتر بێنن،ئەگەرنا ئەوە ئۆپۆزسیۆنی سوریا باشترین بەڵگەی زیندوە، زۆریش لەخۆمانەوە نزیكەن، فەرموون دوای 8 ساڵ لە كوشتن و وێرانكردن و دەربەدەری خەڵكی هەژار و داماو، لەبەر ناكۆكی و یەكتر قبوڵ نەكردنی لایەنەكان و، رازی نەبوونی كەسیان بەكەسێكی تر، دەرەنجام تا ئەم لەحزەیەش، وەحشییە مرۆڤ كوژەكە، (بەشار ئەسەدی)دیكتاتۆر هەر لە كۆشكەی خۆی ماوە و، بەناوی سەرۆكەوە حوكمی سوریا ئەكات.
ئومێد ئەكەم ئەمجارە حزبەكان، بەدەم هاوارەكەی هەڵەدنیەوە بچن و، لانی كەم لە هەڵبژادنەكانی 30ی ئەیلولدا، هەمان بەزمی شكاندنی یەكتری دووبارە نەكەنەوە، بەڵكو لەبری ئەوە دەنگی دزراو و، نەوتی دزرا و، هیوای دزرا و، خۆشی دزرا و، ئارامی دزراو، ئاشتی دزرا و بۆ گەل و نیشتیمان بگێڕنەوە.
حزبەكان جەماوەرەكەیان ئارام بكەنەوە و، چیتر پەلاماری ناحەقی یەكگرتوو نەدەن، چیتر گۆزە لە سەری بێ‌ تاوانەكاندا نەشكێنن، ئەگەر دڵسۆزن هەركاتێ‌ بەحسابی خویان پێیان وابوو، كە یەكگرتوو هەڵە ئەكات، برایانە دەستی بگرن بۆ سەر رێگاكە، نەك فشاری زیاتر لێبكەن و بیانەوێ‌ زیاتر و زیاتر لە قوڕو لیتەدا نقوم بێ‌ و بخنكێ‌، چونكە ئەوانەی بەمەرگی براكانیان خۆشحاڵن،جگە لە پەشیمانی هیچی تریان دەست ناكەوێ‌.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.