نامەیەكی كراوە بۆ سەركردە ناڕازییەكان

رۆژگارێك لەناو شارەكان خۆشترین وشە، كە وەك ئاوی سارد لەگەرمای هاویندا جەستەی هەموومانی فێنك ئەكردەوە، وشەی كورد و كوردستان و خەبات و سەركەوتن بوو.

زەمەن هات و كوردستان رزگار كرا و( شیمالی حەبیب) بوو بە هەرێمی كوردستان و، لە بری وێنەی (سەیدو رەئیس) وێنەی تاڵەبانی و بەرزانی هەڵواسرا.
بەڵام دواتر چی؟دواتر واقیعی حاڵ بە جۆرێك بوو، كە ئێستا كەم نین ئەوانەی پڕ بەدەمیان ئەڵێن (سەد رەحمەت لە كف دز).
دوای 27 ساڵ لە حكومڕانی ، جگە لە دەر و نەهامەتی و چەوسانەوە و براكوژی و گرانی و قات و قڕی، دەسەڵاتی كوردی هیچی تری لە هەگبەدا نەبوو.!!!
بەڵام وەك هەمیشە داهێنان لە دزی و گەندەڵی بەردەوامە و، بۆ دواجار گەیشتە قۆناغی دەنگ دزین، دوور نیە هێشتا فلمەكە تەواو نەبووبێ‌ و ،چاوەڕیی موفاجەئە و داهێنانی زیاتریش بكرێ‌.
بەداخەوە لەكاتێكدا وڵات بە خراپترین قۆناغی بێ‌ هیوایی و بێ‌ متمانەیی وبرسیەتیدا گوزەر ئەكات، زۆر حەیف دەستێكی بەهێزی دادپەروەر و حەق ویست بەدی ناكرێ‌.
ئێستا، خراپە،فەساد،بێ‌ دادی گەیشتۆتە چڵە پۆپە،ئیتر كاتی ئەوەیە هەرچی سەركردە و كەسایەتی نیشتیمان پەروەور هەیە،بەڵێن بە خوا و خەڵك و خاك بدەن، ئەگەر خوێنی خۆشیان لەسەر دانابێ‌ (ستۆپێك) بەم هەێجانی بێ‌ مانایی و سنوربەزاندنە بكەن.
ئیتر شەڕە دەنوك و پاشقوڵ لەیەكگرتن وەلانێن و، لە پێناو، خەڵك و خاك هەموویان ببەن بەیەك هێز و دەستی ئەم دەسەڵاتە بێ‌ باكە بگرن.
بەڵام سەرەتا بەر لەوەی هیچ هەنگاوێكی عەمەلی بنێن، بە راشكاوی ئەڵێم، پێویستە بە ئامادە بوونی كەسی یەكەمی حزبەكان ، و كەسە كاریگەر و دیارەكانی ئەم لایەنانە كۆنفراسێكی تایبەتی داخراو ببەستن. لەم كۆنفراسەدا خاڵ بخەنە سەرپیت و، زۆر بە راشكای گلەیەكانی خۆیان لەیەكتر بكەن و، هەركەس هەستی كرد زوڵمی لە براكەی كردوە داوای لێبوردن بكات، هەروها بە بڕیاری باڵاترین ئۆرگانی ئەم لایەنانە، ئیتر ناوزڕاندن و هێرشكردنە سەر یەكتری، تەحریم و تەجریم بكرێ‌، بۆ ئەوەی بتوانن ئەركە قورسە مێژوویەكە ئەنجام بدەن.
دوای ئەوە پێویستە بەرەیەك دروست بكەن و، زۆر بە روونی ئەرك و مەهامی خۆیان لە نوسراوێكی ئیمزاكراودا دیاری بكەن.
دواتر دەست بەرن بۆ ئەركە گەورەكە، كە بریتیە لە بوژانەوەی هیوا،گەڕانەوەی ژیان، هێنانەوەی دادپەروەری، بیناكردنەوەی ناخە رووخاوەكان، سارێژكردنی دڵە بریندارەكان، دروستكردنەوەی كەسایەتیە تێكشكاوەكان، دەرمان كردنی دەردارەكان، بەكورتی رۆح كردنەوە بە جستەی نیچە مردوی خەڵك و خاك بە پشتیوانی خوا.
یانی چی بكەن؟ یانی دوور لە خوێن رشتن و كودەتا، خەڵك رزگار بكەن و كارێك بكەن ئەوەی لەم وڵاتە ئەكەوێتە نێوان ئاسمان و زەوی بیگۆڕن، ئەم گۆڕینەش چەند لەبەرژەوەندی گشتی خەڵك و ناڕازییەكانە، زۆر زیاتر لە بەرژەوەندی نەیارەكانیانە،چونكە ئێستا ئەم حزبانە سەرەكیترین هۆكارن بۆ ئارام كردنەوەی خەڵكی ناڕازی، ئەوان هەرگیز رێگا نادەن ناڕازییەكان دەست بۆ كاری هەرزەكارانە بەرن و، جارێكی تر جەستەی نیشتیمانی بریندار ئازار بدرێ‌.
سەركردە ناڕازییەكان ئەگەر توانیان و لەئاستی ئەو بەرپرسیاریەتیەدا بوون، ئەوە بۆ خۆیان و خەڵك باشە،ئەگەر نا مێژوو رەحمیان پێناكات و ئەوانیش، بە جۆرێكی تر وەك دەسەڵات زوڵم لە خەڵك و خاك ئەكەن.
ئیتر بەسە شەڕە تەعلیق و بایكۆت كردن و میوانداری نەكردنی یەكتر لە شاشەكان، بەسە یەكتر نەخوێندنەوە، بەسە بەشەیتان كردنی ئەوەی تر، بەسە گۆزە شكاندن لەسەری بەرامبەرەكەت.
بێ‌ گۆمان ئەم حزبانە، بیروباوەڕ ِو دنیا بینی جیاوازیان هەیە، تەنانەت لەناو یەك فەلسەفە و عەقیدەشدا، جارێكی تر دنیا بینی جیاواز هەیە، بەڵام من تەنها وەڵامی یەك پرسیام لەوان ئەوێ‌، باشە بۆ دوو لایەنی دەسەڵات هەر چەند خوێنی چەندین ساڵەیان لە نێوانە،بەڵام تەنها لەبەر پارە لانی كەم لەشتە خراپەكان كۆك و تەبان، بەڵام ئێوە لە سەر حەق، لەبەر خەڵك ناتوانن ئاشت و رێك بن؟
ئاخر چاوەڕی چی تر ئەكەن بەسەر ئەم میللەتەدا بێ‌؟، گرانی، بێ‌ موچەیی، بێ‌ ئاوی، بێ‌ كارەبایی، بێ‌ نەوت و بەنزینی،گاڵتەكردن بە دەزگای تەشریعی و داخستنی درگاكەی،لەسەرووی هەمووشیانەوە، رۆژانە دەركردنی بڕیاری قەرەقوشی و زیادكردنی باج و سەرانە لەسەر خەڵك، ئێستا تەنها دوو شت ماوە بیكەن، ئەوانیش دانانی قوفڵی هەوا و بەكونترۆڵكردنی هەورەكانە. ئیتر باسی تاسەو چاڵ و چۆڵی شەقامەكانیش هەرمەكەن...
بەڵێ‌ ئەوان مێژوویەكی پەنجا ساڵەی پڕ لە شەڕیان هەیە، بەڵام ئێوە هیچتان نە ئەهلی چەكن، نە یەك فیشەكتان ئاڕاستەی یەكتر كردوە، سەیر ئەوەیە بۆ ئەوان ئەتوانن، بۆ ئێوە ناتوانن؟
ئیتر ئێستا دوای ئەوەی دەنگەكانیش دزران و حزبەكان سفر كران، ئیتر دوا فرسەت و دوا هەلە، بۆ ئەوەی سەركردە ناڕازییەكان خۆیان یەكلابكەنەوە،یان دەست لەناو دەست بۆ ئیصڵاح و گۆڕانكای و چاكەخوازی، یان فەرموون بۆ پوكانەوە و توانەوە و، بوون بە یادەوەری لە لاپەڕەكانی مێژوو...