یەكبوون گرەنتی سەركەوتنەوەی ئوممەتی ئیسلامیە

  چوار شەممە, 13 حوزەیران 2018 08:51

خوای گەورە كەرامەت و رێز و چارەنووسی ئەم ئوممەتەی بەستۆتەوە بە نزیكیان لە قورئان و شوێنكەوتنی پێغەمبەرەكەی (د.خ).

مێژوو بۆمان دەگێڕێتەوە كاتێك كە ئەم ئوممەتە لەگەڵا خوادا بووەو لەگەڵا قورئاندا ژیاوە سەروەری هەموو جیهان بوون و لەناو گەلانی جیهانیشدا پێشەنگ بوون، بەڵام ئەمڕۆ بەهۆی دووبەرەكیمانەوە قودس داگیركراوە، بەم هۆیەشەوە هەموومان تووشی سەرشۆڕی بووین و كاریگەری لەسەر هەڵوێست و ژیان و ناوبانگی هەموو مسوڵمانانیش كردووە، لەبەرئەوە پێویستە لەم شەوانی قەدرەدا چاوێك بە خۆماندا بخشێنینەوەو خۆمان ببینین كە لە چ دۆخێكدا دەژین؟ ئایا توانیومانە ئامانجی گەورەی رۆژو [ڵعَلَّكُمْ تَتَّقُونَ] لە خۆماندا بەرجەستە بكەین؟
با ئەوەی لەدەستمانداوە بەدەستی بێنینەوە، هەركەسێك لە ئێمە كەم و كوڕی و كەمتەرخەمیەكی هەبووە لە رۆژانی رابردووی ئەم مانگەدا با لەم چەند رۆژەی كە ماوە بەخۆماندا بچینەوەو دووبارەی نەكەینەوە، با هەست بە بەرپرسیارێتی بكەین بەرامبەر هەژاران و نەداران لە رێگەی بەخشینی سەرفیترەكانمان لەكاتی خۆیدا بۆئەوەی بەرامبەرەكان بتوانن بەباشترین شێوە كەڵكی لێ‌ وەرگرن، هەروەها نابێت بەرپرسیارێتیمان لەبیر بچێتەوە بەرامبەر بە كێشە سەرەكیەكانی گەلەكەمان، نابێت تەنها بیرمان لای بەرژەوەندیەكانی خۆمان بێت، خوای گەورە پشت لەم ئوممەتە ناكات و سەری دەخات، بەڵام بەمەرجی ئەوەی یەك بگرن و لە دووبەرەكی دووربكەونەوە و قورئان بكەینەوە بە پرۆگرامی ژیان.
ئوممەتێكی بەرز و گەورە
خوای گەورە سەربەرزی و كەرامەت و رێز و گەورەیی ئەم ئوممەتەی بەستۆتەوە بە نزیكیان لە قورئان و شوێنكەوتنی پێغەمبەرەكەی، ئەمەش وادەكات كە ببنە ئوممەتێكی بەرز و پێگەیشتوو، نەك پاشكۆی رۆژهەڵات و رۆژئاوا، هەرچەند لەمەدا دەبێت پارێزگاری لە بەرژەوەندیەكانی خۆی بكات و لەسەر ئەو بنەمایە مامەڵە لەگەڵا گەلانی تردا بكات، بەڵام یەكبوون و كەرامەتی بە پابەندبوونیەتی بە دینی خوای گەورەو پشت بەستنیەتی بە تواناكانی ئەو.. مێژوو ئەوەمان بۆ دەگێڕێتەوە ئەم ئوممەتە ئیسلامیە هەركاتێك لەگەڵا خوادا بووبێت بوونە پێشەنگی هەموو جیهان، بوونە مامۆستاو رابەری پەروەردەیی. مێژوو بۆمان دەگێڕێتەوە كە ژنێك لە عەموریە هاواری كرد "وامعتصماە" ئەم هاوارە گەشتە كۆشكی خەلیفە لە بەغداد، خەلیفە موعتەصەم هاوارەكەی بیست و هێرشێكی كردە سەر رۆمەكان و رزگاری كرد.
حاڵی ئەمڕۆمان
لە ئەمڕۆدا گەلانی مسوڵمان وازیان لە ئەم شەرەفە گەورەیە هێناوەو كەوتوونە شوێن رۆژهەڵات و رۆژئاوا بە باكور و باشوردا شۆڕ دەبنەوەو دەكەونە شوێن هەر دەنگێك كە بانگیان بكات و قبوڵی هەموو جۆرە ملكەچی و سەرشۆڕیەك دەكەن، بۆ ئەمەش رێگەچارەیەك نابیننەوە ئەم ئوممەتە هەرچەند دوربكەوێتەوە لە بازنەی پشت بەستن بەخوا رۆژ بەرۆژ لاواز دەبێت و هێزی دوژمنان زیاد دەكات، دوژمن تەنها لەیەك زمان تێدەگات ئەویش زمانی هێز و ئوممەتێكی بەهێزە، ئەو هێزەش دەبێت سەرچاوەكەی ئەم ئایەتە بێت كە خوای گەورە دەفەرموێت [وَأَعِدُّوا لَهُمْ مَا اسْتَطَعْتُمْ مِنْ قُوَّةٍ وَمِنْ رِبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ وَآخَرِينَ مِنْ دُونِهِمْ لَا تَعْلَمُونَهُمُ اللَّهُ يَعْلَمُهُمْ ].