عێراق، مەملەكەتی شەڕ وشووم!

هەموومان لەوەتەی بیرمان دێت و چاومان كراوەتەوە ئەم وڵاتە جگە لە ئاشوب و خوێن و فرمێسك و قات و قڕی هیچی تری بەخۆیەوە نەبینیوە، بۆیە لە ئێستادا عێراقی بونمان نەك هەر لە دەرەوە مایەی نارەحەتیە، بەڵكو لێرەش بە بیستنی ناوی عێراق سەرتاپای لەشمان تووشی بێ‌ هێزی و بێ‌ تاقەتی دەبێ‌، ئاخر بۆ نا؟ئەوەی خۆمان بینیومانە و ئەوەش كە لە باب و باپیرانمان بیستومانە ئەم وڵاتە هەر جێگای ململانێ‌ و پاشقوڵ لە یەكگرتن و خیانەتكاری و یەكتر خواردن بووە.لەم وڵاتەدا كەس ناتوانێ‌ ئاسوودە بێ‌ و لە هەر سەردەم و ساتەوەختێكدا فلمێك دێتە ئاراوە و خەڵكی پێوە سەرقاڵ دەكرێ‌،لێرە شەو بە ئاسایی دەخەوین بەیانی كە خەبەرمان بویەوە شار شڵەژاوە،یان تەزویركراوە یان رۆژنامەنووس كوژراوە، یان مووچە نەماوە یان بەنزین نەماوە، یان بارەگا سوتاوە یان سنورگیراوە یان و یان و یان!!!
قەدەری خوا ئێمەی لەم وڵاتە دانا و، ئێرەی كرد بە خاك و وەتەنی ئێمە،هەر چەند خوا بەرەكەتی خۆی بەسەردا باراندوە بەڵام بە ئێمە چی؟ ئاخر وڵاتێك بەم هەموو خێروبێرەی سەرزەمین و ژێرزەمینەی،بەم ئاوە سازگار و شیرین و خاكە بە پیتەی، مایەی خۆشترین ژینە، كەچی دۆزەخێكە بۆ میللەت و جێگای قینە.
مێژوو پێمان دەڵێ‌ لەم وڵاتەدا هەرگیز دەنگی تەقە نەبڕاوە و،هەردەم كۆڵە پشت و راكردن و ئاواریی و دەربەدەری سیمای گەلانی عێراق بووە،مێژوو پێمان دەڵێ‌ هەركات كە شۆڕش كراوە و نیزام و دەسەڵاتێك رووخاوە، ئەوەی دوای ئەو نەك باشتر نەبووە بەڵكو زۆر خراپتر بووە،چونكە حاكمی دوای شۆڕش هیچ سوودێكی لە هەڵەكانی حاكمی پێش خۆی وەرنەگرتوە و، هەمان هەڵە و زوڵمی ئەوی دووبارە كردۆتەوە، بێگومان لەم وڵاتەدا هەردەم حاكم و مەحكوم تینووی خوێنی كەللە سەری یەكتربووین، چونكە حاكم بە چاوەی خائین و مەحكومیش بە چاوی زاڵم سەیری یەكتریان كردوە،لێرە هەر كەس هاتووە و دەسەڵاتی گرتۆتە دەست، بووە بە فیرعەون و خەڵكی داوەتە بەرقامچی،دەسەڵات هێزی خۆی لە ئیهانە كردن و ئەشكەنجەدانی خەڵك بینیوەتەوە،بۆیە ئەم وڵاتە سەیر نیە، بەڵكو زۆر لەسەیر سەیر ترە. ئەم وڵاتە لەوەتەی (100) ساڵی رابردوو كە بە زۆر درستكراوە تا ئەم ساتە وەختە،هەرگیز خاوەنی سیادە و بڕیاری خۆی نەبووە،بەڵكو هەردەم لە دەرەوە ئاڕاستەكراوە و بەكارهێنراوە،ئاخر كەس ناتوانێ‌ سەیر و سەمەرەكانی ئەم وڵاتە بژمێرێ‌ تا من بتوانم،. لەم وڵاتە هەر وتراوە (والله) نیە، (والله) نەما...(والله) راكەن، (والله) سوتا،(والله) بردیان بە خوا دزرا ،(والله) تەقەیە بە خوا كوژرا،ئاخر بۆ؟ ئاخر چی و لەپای چی، كەس نازانێ‌!!!
ئەوەی دیار و ئاشكرایە بەشێكی زۆری ئەم هەموو نەهامەتی و دەردەسەریە ئەوەیە كە نزیكەی 100 ساڵ لەمەو بەر كاتێك (ئینگلیز) كیانێكی سیاسی بە ناوی عێراق دادەتاشێ‌ 3توخمی تا سەر ئیسقان بەیەك نامۆ و بەیەك ناكۆك كۆدەكاتەوە و، 3 بەرمیل باروت دەخاتە پەنای یەكەوە و خۆشی شقاتەكە بە دەستەوە دەگرێ‌، تا هەر كات ویستیان یەكێكیان یان هەموویان بتەقینەوە، هەر ئەوەندە عەزیەت بكێشن و دەنكێ‌ شقاتەی بۆ هەڵدەن،ئیتر بارودۆخێك دێتە ئاراوە كە جگە لە خوا و پاشان خۆیان كەسی تر لێی تێنەگات.
بەداخەوە راستێكی تاڵ هەیە و ئەبێ‌ بوترێ‌،ئەویش ئەوەیە ئەم وڵاتە كە خۆی ئاوا مایەی شەڕ و شووم و نەگبەتیە،گەلە جیاوازەكانیشی هەر دەم كەوتونەتە وێزەی یەكتر، بەداخەوە ئێمەش وەكو كورد نەمانتوانیوە لەگەڵ یەكتر كۆك و تەبابین، نەمانتوانیوە نمونەیەكی جیاواز لەوانی تر پێشكەش بكەین،بۆیە دۆزەخەكەمان بووە بە دوو دۆزەخ،رۆژ بە رۆژیش كێشەكان گەورەتر و ئاڵوزتر ئەبن ،بۆیە پێناچی ئاسۆیەكی روون و گەش چاوەڕێی نەوەكانی داهاتووشمان بكات،بەڵكو پێشبینی ئەوە ئەكرێ‌، كە ئەم فلم گەلەی ئێمەش نەمان بینیبێ‌ لە داهاتوودا رۆڵەكانمان بیبینن و ،تاڵەیەكانی ئەو وڵاتە تاڵتربن و ناخۆشیەكانشی زیاتر بن...بۆ نا؟ئاخر لە مەملەكەتی شەڕ وشووم چاوەڕیی چی تر ئەكرێ‌؟!.