بۆچی پارتە ناڕازیەكان نەیانتوانی هاوپەیمانیەتی دروست بكەن ؟

  دوو شەممە, 09 تەمموز 2018 14:53

وەك لای هەموان ئاشكرایە ڕۆژی 30 سێبتێمبەری ئەمساڵ وادەی بەڕێوەچوونی هەڵبژاردنەكانی پەرلەمانی كوردستانە ، تەواوی خەڵكە ناڕازیەكە لە ڕۆشنبیرو نوسەر وئەكادیمی و خەڵكی ئاسایی و .... هتد لەلایەك و هەریەك لە پارتەكانی (گۆڕان ، یەكگرتوو ، هاوپەیمانی ، كۆمەڵ ، بزوتنەوە ، شیوعی) لە لایەكی دیەوە پێیان وابوو تاكە ڕێگە چارە و مەنفەزێك لەم ساتە وەختە دا بۆ ڕزگاربوون لەو دۆخەی خەڵكی هەرێمی تێكەوتوە و بۆ ڕێگەگرتن لە تەزویرو ساختەكاری لەهەڵبژاردنەكاندا و بۆ لەقكردنی پێگەی پارتی ویەكێتی لە دەسەڵات بریتیە لەوەی كە ئەم حیزبە ناڕازیانە هاوپەیمانیەتیەكی بە هێز بەرامبەر ئەم دووپارتە دروست بكەن و بەیەك لیست بەشداری هەڵبژاردنەكانی پەرلەمانی كوردستان بكەن .

هەرچەندە ئەم پارتانە لەهەوڵدا بوون بۆ دروست كردنی ئەم هاوپەیمانیەتیە ، بەڵام دواجار دوای چەندین كۆبونەوە نەیانتوانی بگەنە ئەنجامێكی دڵخۆشەكەر و هاوپەیمانیەتیان پێ دروست نەكرا .
پرسیار لێردا ئەوەیە ئەم پارتانە كە خۆیان پێیان وایە ئەوە ڕێگە چارەی گرنگ و كاریگەرەو داواكاری تەواوی خەڵكە ناڕازیەكەشە ئیدی بۆچی پێكیان نەهێنا؟ .
بەرلەوەی وەڵامی پرسیارەكە بدەمەوە دەمەوێت ئەوە بخەمە ڕوو كە دەبیت ئەم پارتە ناڕازیانە تەنها بەوەی كە چەند كۆبوونەوەیەكیان ئەنجامداوە بۆ دروستكردنی هاوپەیمانیەتی وا تێنەگەن كە ئەركی خۆیان بەجێ هێناوە لەبەرامبەر گەل و بەرپرسیاریەتیان لەسەر شان نەماوە ، بەڵكو بە پێچەوانەوە ئەوە ئەوانن بەرپرسیارن لەبەرامبەر هەر دەرهاویشتەیەكی نەرێنی كە لەئەنجامی پەرتەوازەیی ئەمانەوە دروست دەبێت .
دەبێت ئەوە بزانن كە چۆن یەكیەتی وپارتی بەرپرسیارن لەبەرامبەر گەندەڵی و بەهەدەردانی داهاتی ئەم ووڵاتە هەربەو چەشنەش پارتە ناراِزییەكان بەرپرسیاردەبن لەبەرامبەر گەل و نەتەوەكەیان بەوەی كە ڕێگەیەك هەبوو بۆ رزگاركردنی گەل لەدەستی زوڵم و زۆری دووپارتی دەسەڵات بەڵام بەداخەوە ئەمانیش ئەم ئومێدەی گەلیان كە تاكە ئومێد بوو لەئێستەدا خستە ژێر گڵ و هێندەی تر خەڵكیان بێ هیوا كرد .
ئیدی لێرە بەدواوە دەبێت ئەم پارتە ناڕازیانە دان بەوەیا بنێن كە یەكێك لە فاكتەرەسەرەكیەكانی مانەوەی دوو پارتی دەسەڵات لەسەر حوكم و بەردەوام بونیان لە چەوساندنەوەی خەلك ، نەبوونی بەیەكەوە بوون و یەك هەڵوێستی ئەم حیزبانەیە بەتایبەت بۆ هەڵبژاردنی پەرلەمانی كوردستان لە ڕۆژی 30 سێپتێمبەر.
دەكرێت نە گەیشتنی ئەم پارتانە بەڕێكەوتن بۆ پێكهێنانی هاوپەیمانیەتی لەكۆمەڵێك هۆكاردا كۆبكەینەوە كە لیرەدا ئاماژە بەهەندێكیان دەكەین :

1. نەبوونی متمانە لە نێوان ئەم حیزبانەدا.
هەرچەندە ئەم حیزبانە لە كۆبوونەوەكانیاندا وا پیشان ئەدەن كە متمانەیان بە یەكدی و پرۆژەو كاری یەكدی هەیە بەڵام لە ڕاستیا زۆربەیان متمانەی بەوی دی نیە و پێی وایە كە هەریەكێكیان ژێر بە ژێر لەگەڵ دووپارتی دەسەڵات كۆبوونەوەی نهێنی و وەعد وبەڵێن و بەشینەوەی كورسی وكولێرە هەیە ، هەربۆیە لێرە دووپارتی دەسەڵات لەم دەلاقەیەوە توانیویانە یاریەكی جوان بكەن و زیاتر پەرتەوازەیی بخەنە نێوان ئەم پارتە ناڕازیانەوە .
2. عینادی سیاسی و دەمارگیری وتەناوزل نەكردنی هەریەك لەو پارتانە بۆ ئەوی دی بەبیانوی ئەوەی ئەم لەو باشترە یاخود بە بیانوی ئەجێنداو باكگراوندی فیكری و ئایدۆلۆژی و سیاسی، ئەمەش وای كردووە هەریەكێكیان پرۆژە پێشكەش دەكات بۆ هەرپرسێكی سیاسی ونیشتمانی و نەتەوەیی مادام پرۆژەكە لەلایەن حزبی بەرامبەرەوەیە ئیدی فەشەلی پێ دەهێنن ، هەرچەندە دەشزانن كە لە بەرژەوەندی خەڵكە هەژارەكەیە .
3. نەبوونی فشارێكی توندی جەماوەری هەم لەلایەن خەڵكە ناڕزیەكە و ڕێكخراوەكانی كۆمەڵی مەدەنی و هەمیش لەلایەن ئەندامەكانی خوارەوەی ئەم حیزبانە ، كە ئەمەش وای كردووە ئەم حیزبانە حیساب بۆ رای جەماوەرو تەنانەت قەواعیدی خۆشیان نەكەن و بڕیارو هەڵویستەكانیان لەلایەن چەند كەسانێك لە سەرەوە یەكلایی بكرێتەوە.
4. دەستی دەركی ، ئەمەش یەكێكی دیكەیە لەو هۆكارانەی كەوای كردووە ئەم پارتانە پەرتەوازە ببن و نەتوانن خۆیان كۆبكەنەوە و ببنە هێزێكی بەهێز ، چونكە هەمیشە ووڵاتانی زلهێزو ئیقلیمی بە هۆی بەرژەوەندییەكانیان لەگەڵ دووپارتی دەسەڵات دەست وەردانیان هەبووە لە كاروبارەكانی هەرێم و هەرپرۆژەیەك ببێتە خاڵی مەترسی لەسەر بەرژەوەندیەكانی ئەوان ، هاتوون بە جۆرێك لە جۆرەكان شكستیان پێ هێناوە .
5. باڵباڵێن و پەرتەوازەیی نێوخۆیی هەندێك لەو حیزبانە.
هندێك لەو حیزبانە بەهۆی باڵباڵێن و نارێكی ڕیزەكانیان و نا یەك هەڵوێستی رێكخستنیان بە تایبەت سەرانی سەرەوەیان ناتوانن بڕیاری یەكلایی كەرەوە لەسەر پرسە هەنوكەیی و چارەنوس سازەكان بدەن یەكێك لەو پارتانەی كە توشی ئەم دەردە هاتووە بزوتنەوەی گۆڕانە ، هەرچی یەكیەتیەكۆنەكانن لەنێو ئەم بزوتنەوەیەدا هەمیشە لە پرسە هەنوكەیی و چارەنوس سازەكاندا رای جیاوازیان هەبووە لە گەنجەكانی نێو ئەم بزوتنەوەیە ، وەبە پێچەوانەشەوە ، دەكریت بڵێین لە پرسی دروست كردنی هاپەیمانیەتیەك بۆ پەرلەمانی كوردستان هەمان دووڕایی جیاواز بوونی هەیە لەنێوان ئەم حزبەدا .
6. دەكرێت یەكێكی تر لە هۆكارەكان ئەوە بێت كە هەنێك لەو حیزبانە وەك بزوتنەوەی گۆڕان بە جۆرێك لە جۆرەكان حەجمی راستەقینەی خۆی ون كردبێت بەهۆی ئەوشكستانەیەوە كە بە هۆی بەشداری كردنی لە كابینەی هەشتی حكومەتی هەرێم توشی هاتبوو دەیەوێت لە ڕێگەی ئەم هەڵبژاردنەوە لە ئێستادا حەجمی ڕاستەقینەی خۆی بزانێت .
یاخود حزبێكی وەك كۆمەڵی ئیسلامی كەهەمان سیاسەت و ڕیتمی كاركردنی بزوتنەوەی گۆڕانی پیادەدەكرد لەماوەی ڕابردوو - ئێستەشی لەگەڵدابێت- بە پێودانگ و لێكدانەوەی خۆی لە چەند ساڵی ڕابردوو كاری جددی كردوە بۆ ئەم هەڵبژاردنەو زیاتر كردنی ڕێژەی دەنگەكانی بۆیە ئەگەر لە ناوهاوپەیمانیەتیەك بەشداری بكات ئەوا ئەو هەوڵ و تێكۆشانەی بە هەدەر دەڕوات وبەرهەمەكەی ناچنێتەوە .
لەكۆتاییدا دەڵێم ئەو پارتانەی كە نەیانتوانی بەیەك لیست بەشداری هەڵبژاردنەكانی پەرلەمانی كوردستان بكەن ، پێویستە لەسەریان بیر لە رێگەچارەیەكی دی بكەنەوە، ئەویش ئەوەیە كەلە دوای دەرچوونی نەتیجەی هەڵبژاردن و دەركەوتنی دەنگەكانیان هاوپەیمانیەتیەكی بەهێز دروست بكەن و لە پەرلەماندا ببنە یەك كوتلەو چی دی ڕێگەنەدەن ئەم دووپارتە یاری بە موقەددەرات وچارەنوسی ئەم گەلە بكەن ، تاكو شەرمەزاری بەردەم نەتەوەو گەلە ستەم دیدەكەیان نەبن.