ڕاگەیاندنی كوردی یان ڕاگەیاندنی چەواشە.!

  چوار شەممە, 08 ئاب 2018 08:07

 

        
(ڕاگەیاندنی كوردی هێندەی چەواشەكاری دەكات، هێندە كار بۆ گەیاندنی حەقیقەت ناكات).


           ڕاگەیاندنی حیزبی پانتاییەكی فراوای ڕاگەیاندنی كوردی داگیر كردووە، ڕاگەیاندنی كوردی لە هەژماركردنی گەندەڵی نەیارانی حیزبەكەیدا هەریەكەیان دەبن بە (كۆچەر بیركار) و لە هەژمار و تێوەگلانی حیزبەكەی خۆیاندا هێندە كۆڵەوارن وەك منداڵی (ئەدیسۆن) وان، كەبەهۆی تەمبەڵیەوە لە قوتابخانە دەركرا، ئەمە یەكێك لەو هۆكارانەیە كە ڕاگەیاندنی كوردی ناشیرینكردووە.

نەك ڕاگەیاندنەكان تەنانەت كارەكتەریشیان هەن لەو بوارەدا ناونیشانی پسپۆڕیان پێدراوە، ئەو خەڵكانە بون بە ژمێریارێكی وریا و چوست و چالاك لەسەر گەندەڵی و بەهەدەردان و هەژماركردنی ورد و درشتی داهاتی نەیارەكانیان، بەڵام هەر ئەو كەسانە بۆ گەندەڵی و بەهەدەردان و ژمێریاری حیزبەكانی خۆیان لە كەڕەواڵەیەك زیاتر نین
ئێستە پێمان بڵێن ئەوانەی سەری زمان و بنی زمانیان ژماردنی گەندەڵی حیزبە نەیارەكانیانن، ئەی بۆ ژماردنی گەندەڵی حیزب و كەسایەتی و سەركردەكانی خۆتان بۆ بێدەنگن.؟ بۆ بۆ لە ژماردنی تەنكەرە نەوت و سەفتە دۆلار و ژمارەی موچەخۆری بندیوار و بودجەی (كاش)ی مانگانە و بیرە نەوتەكان و داهاتی ناوخۆ و گومرگەكان و كۆمپانیا حیزبیەكانتان و داگیركردنی موڵكی گشتی و بینای حكومیەكانی خۆتان بێدەنگن.!؟ خۆزگە نیوەی ئەوەی گەندەڵی حیزب و كەسایەتیە نەیارەكانی خۆتان ئاشكرا دەكرد، گەندەڵی و بەهەدەردانی حیزب و كەسایەتیەكانی خۆشتانتان ئاشكرا دەكرد.
هەرچەندە منیش و خەڵكیش ئەوە باش دەزانیین كە ناتوانن دەست بۆ كار و كارتێكی ئاوا ببەن، ئەگەر هەڵەی وا بكەن ئەوا یان وەدەرنانی ئەو كەسە دەبێت كە دەست بۆ ئەو كارە دەبات یان داخستی یەكجارەكی ئەو دەزگا ڕاگەیاندنە دەبێت، بۆیە ئەو دەزگایانەش بوون بە زوڕنا ژەنی حیزب دژ بەنەیارەكانیان و كوێر و كەڕەواڵەیەك لە سەر كارە نەخوازراوەكانی حیزبەكەیان، بۆیە ڕاگەیاندنی كوردی جێگەی متمانەی خەڵكی و شەقام نییە، هێندەی خەریكی چەواشەكارییە هێندە خەریكی ڕونكردنەوەی ڕاستیەكان نییە!