شەریفەكانی رۆما :

  چوار شەممە, 12 ئەیلول 2018 07:36

 


ئەمانە عێراقین و بەغدادین و هیچ پەیوەندییەكیان نیە بە رۆماوە ..


ساڵانی سییەكانی سەدەی رابووردوو ، شوێنیك نەبووە لە بەغدادا شانۆی تیا نمایش بكرێت. ...


شانۆكارێكی میصری بەناوبانگ هەبووە بە ناوی (جۆرج ابیچ ) ، شانۆگەرییەكی زۆر سەركەوتووی هەبوو ، بەناوی ( یۆلیۆس سیزەر ) ، كاست و تیمەكەی لە قاهیرەوە ئەهینێ بۆ بەغدا ، تەنها‌ ئەكتەرە سەرەكییەكان ئەهێنێ ، كۆمپارسەكان ناهێنێت هەتا تێچووی سەفەر و مانەوەیان زۆر نەكەوێت لەسەری..


لە ناوچەی مەیدانا گەورەترین چاخانە ئەگرێت بەكرێ بۆ نمایشكردنی شانۆگەری یۆلیۆس قەیصەر ..


بۆ ئەو كۆمپارسانەی كە دەورێكی لاوەكی ئەبینن ، كەسی دەستناكەوێت و هیچ كەسێك قایل نابێت ئەو دەورانە ببینێت ..


ئیتر جۆرجی دەرهێنەر، دەستێكی ئەكەوێتە ئەملا و دەستێكی ئەكەوێتـە ئەولا ، نازانێ هانا بۆ كێ بەرێت ..


چەند كەسێك نەسیحەتی جۆرج ئەكەن و ئەڵێن لەم ناوچەی مەیدانا ، پڕە لە یەغنیش و گدیش و ئەنواع سەرسەری ، هیچ شتێكیان بەلاوە عەیب نییە ، پێنج فلسیان بدەرێ هەموو دەورێكت بۆ ئەبینن..
ئەویش ئەچێت چەند كەسێك هەڵئەبژێرێت ، جلی سەرتاپا سپی ئەكاتە بەریان و پەراوەیان پێئەكات ، وەكو ئەوەی ئەشرافی رۆما بن.... ..


ئێوارەی یەكەمی نمایشكردنی شانۆگەری یۆلیۆس قەیصەر ، چاخانەكە پڕ بووە لە بینەران و جمەی دێت و جێی كەسی تر نابێتەوە ..


لە بەشێكی شانۆگەرییەكەدا ، حاجبی قەیصەر بەدەنگی بەرز ئەڵێت : ئێستاش با پیاو ماقوڵ و ریش سپی و ئەشرافەكانی رۆما بێن بۆ سڵاو كردن لە قەیصەری خاوەن شكۆ..
ئیتر یەكە یەكە دێنە سەر شانۆكە و ئەیانەوێت سڵاو لە قەیصەر بكەن .


خەڵكەكە ئەیكەن بە هاوار و فیكە و هەرا و پێكەنین و جنێو ، بەدەنگی بەرز هەریەكە لەلایەكەوە هاوار ئەكات ، چونكە هەموو ئەشرافەكانی‌ رۆما ئەناسنەوە ..
یەكێك هاوار ئەكات ئەڵێ : خۆ ئەوە عەببودی گیرفان بڕە ، یەكیكی تر ئەڵێ تەماشە كە خۆ ئەوە رەزووقی درۆزنە ، لەولا وە ئەڵین نانا سەیركەن خۆ ئەوە قەحتانی كۆتربازە‌‌ ، هەلەو یاب ، سەیركەن ئەوەش حەننای قوماربازە ..


كورە دابەزن ، دەی وەرنە خوارەوە ، خۆتان لێكردووین بە ئەشرافەكانی رۆما..

جــــا قسەی خۆمان بێت ، باكەس پێی نەزانێت :


لەهەموو وڵاتێكا مەیدان هەیە ، بۆیە ووریا بن ، بەمزوانە بەعزێ له ‌ئەشرافەكانی رۆما خۆیان نمایش ئەكەن ، نەخەڵەتابن بتانخەڵەتێنن ..


********************************************************
تاها سۆڵەیی
دارولمولكی بابان
11ی سێپتێمبەری 2018
#تاها_سۆڵەیی
#taha_solaee

تاها سۆڵەیی

تاها سۆڵەیی ، نووسەر و چاودێری سیاسی .. لەدایکبووی سلێمانی 1968.. ئەندازیاری راوێژکار لە کۆمپانیای لاڤارج هۆڵسیم