هەڵبژاردن لە نێوان (هەڵە بژاردن) و (چاكە ژماردن)دا!!

  چوار شەممە, 19 ئەیلول 2018 07:41

سروشت و بیركردنەوەی هەندێك لە مرۆڤەكان وایە كە زیاتر بەشوێن كەموكورتی و هەڵەكانی ئەوانی دیكەوەیە و زۆرتر سەرقاڵی (هەڵە بژاردن)ی ئەوانە، چاوی هەڵەكان زۆرتر دەبینێ‌ و زۆرجاریش گوێ‌ قوڵاخە بۆ بیستنی عەیب و عاری ئەوانیتر.

ئەم جۆرە تێڕوانین و بیركردنەوەیە تا ئەوكاتە ئاسایی و سروشتی و ڕەوایە كە مرۆڤ پەند وەرگرێ‌ لەوانیتر و خۆی نەبێتە شوێنپێ‌ هەڵگری ئەو هەڵەكارانە و ئەمیش هەمان هەڵە و كەموكورتییەكانی ئەوان دووبارە نەكاتەوە، یاخود نەبێتە دەستباری شەیتان و یارمەتیدەر و پشتیوانی هەڵەكار و تاوانبار و گەندەڵكاران.
بەڵام واقیع و ڕاستی ئەوەمان پێدەڵی كە ئێمە زیاتر لەوەی پێویستمان بە (هەڵە بژاردن)ی هەڵەكار و گەندەڵكار و ستەمكاران بێت، زۆر زۆر پێویست و ئاتاجی (چاكە ژماردن)ی چاكەخواز و ئیسڵاحخواز و ئەمین و پارێزكار و دەستپاك و ڕابردوو پاكەكانین، ئەبێ‌ چاكەی چاكەكاران و ئیسڵاحخوازان ببینین، چاكەكانی مێژووی چەند ساڵەیان بژمێرین، جوانی و ڕۆڵی كاریگەری ڕابردوویان بهێنینەوە پێش چاومان، بژمێرین ئەو چاكە و جوانییانەیان كە بەخشییانە ئەم خاك و نیشتیمان و خەڵكە... ئەو خێر و خۆشی و باشی و كارە چاكەخوازانەیان كە بوونە هۆی گوڕوتینی ژیانی زۆرێك لە خەڵكی بەشمەینەتی ئەم وڵاتە بیانژمێرین.. با چاكەكانیان بژمێرین و بزانین چییان كرد بۆ ئاوادانكردنەوەی شار و گوند و دێهاتمان؟! چییان كرد بۆ نازكێشانی نازدارانمان و بۆ بەهاناوەچوونی هەژار و لێقەوماو و نیخۆش و پەككەوتەكانمان؟! چییان كرد بۆ پەروەردەكردنی ڕاست و جوانی ڕۆڵە و كیژ و كوڕەكانمان؟! چییان كرد پاراستنی ڕۆڵەكانمان لەوەی دەستیان بچێتە خوێنی براكانیان؟! چییان كرد بۆ حورمەتگرتنی پیر و ڕدینَ سپییەكانمان؟! چییان گرت بۆ پاراستن و حورمەتگرتنی حەیا و حیشمەت و شكۆی خوشك و دایك و هاوسەرەكانمان؟! لەبیرمان بێت كە چییان كرد بۆ ئاوەدانكردنەوەی مزگەوت و قوتابخانە و ناوەندەكانی خوێندن و پێگەیاندنی نەوەیەكی زانستخوازی پەروەردەكراو و خاوەن بڕوانامەی بەرز و ڕەوشت و ئاكاری بەزرتر.
با چاكە ژماردنی چاكەكاران بكەینە پیشەمان و چاومان لەسەر چاكەكارانی پەیامدار و ئیسڵاحخواز بێت، ئەوانەی كە ئەمین و دەستپاك و مێژوو پاكن، ئەوانەی كە ڕەفتاری شەرمئاوەر و گوفتاری قێزەونیان لێ‌ ناوەشێتەوە، ئەوانەی كە خەمهەڵگری خاك و خەڵك و بەندەی سەر ِراستی خوا و سەرقاڵی كاری خواپەسەندانەن... ئەوانەی كە مرۆڤن و دەكرێ‌ و ئاساییە وەكو تاكە كەس هەندێ‌ وردە هەڵە و نەپێكان و كەم تفاق بن لە هەندێ‌ بواردا، بەڵام ئەوان پڕن لە چاكی و جوانی و دوورن لە دزی و خیانەت و ناپاكی و درۆ و چەواشەكاری... با چاكەكانیان بژمێرین و بە ژماردن و باسكردنی چاكەكانیان هانیان بدەین لەسەر بەردەوامی لە چاكەكار بوونیان.. با پشتیوانیان بین بۆ ئەوەی خێر و چاكەی زیاتر ببەخشنە ئەم خاك و خەڵكەی شایستەی ئەوەن چاكەیان لەگەڵ بكرێ‌ و چاكەكاران پێشڕەو و خزمەتكاریان بن، بۆ ئەوەی (بەرەو ئیسڵاح)ی كۆمەڵایەتی و سیاسی و فەرهەنگی و پەروەردەیی هەنگاو بنێین و ئاسۆمان باشتر و ڕوونتر بێ‌.. پاشەڕۆژمان جوانتر و بە ڕەونەقتر بێ‌.
بۆیە بەندە بڕیاری موتەوازیعانەم وایە كە خەریكی (چاكە ژماردن)ی ئیسڵاحخوازان بم، زیاتر لەوەی خەریكی (هەڵە بژاردن)ی گەندەڵكار و خیانەتكار و ستەمكاران.

مودریك عەلی عارف

لەدایكبووی (1978) لە گوندی (خەرپانی) ناوچەی هەورامان، پارێزگای هەڵەبجە، *لەگەڵ خوێندنی قوتابخانەدا چووەتە حوجرە و زانستە شەرعییەكانی خوێندووە، *بەكالۆریۆس لە (اصول الدین و فیكری ئیسلامی) *لە ساڵی (2005)ەوە وەك پیشەی مامۆستایەتی دامەزراوە.
* ئەندامی (ناوەندی مەعریفەت بۆ فیكر و مەعنەوییەت)ەو دەستەی نووسەرانی گۆڤاری (هەژان) *ئەندامی كارای (كۆمەڵەی نووسەرانی ئیسلامی كوردستان) *خاوەنی ئەزموونێكی چەند ساڵە لە بواری كاری ڕاگەیاندندا و كاری پەیامنێری بۆ چەند ڕۆژنامە و گۆڤارێك كردووە و چەند ساڵێك (مُحَرِّر)ی بەرنامەكان و بەڕێوەبەری (دەنگی یەكگرتوو ـ ڕادیۆی هەڵەبجە)، شارەزایە لە هەردوو زمانی (فارسی و عەرەبی)دا، خاوەنی زیاتر لە (15) كتێب و نامیلكەی وەرگێران و نووسین، كە زۆرینەیان لە بواری عیرفان و مەعنەوییەتدان، چەندین بابەتی لە ڕۆژنامە و گۆڤارەكاندا بڵاوكراوەتەوە و نزیكەی (15) ساڵە لە بوارەكانی ڕۆشنبیری و كۆمەڵایەتی و ئایینی و عیرفانی و ئەدەبیدا سەرقاڵی نووسین و وەرگێڕانە.