(یەكگرتوو) خێوە یان خێر؟

  پێنج شەممە, 20 ئەیلول 2018 12:41

لە ئێستادا هەرێمی كوردستان بە دۆخێكی زۆر هەستیاردا گوزەردەكات و، سەرجەم حیزب و لایەنە سیاسیەكان سەرسەختانە سەرقاڵی بانگەشەی هەڵبژاردنن و ،هەر لایەنێكیش بە بۆچوونی خۆی بانگەشە بۆ لیستەكەی خۆی دەكات ، ئاشكرایە لەم وڵاتەدا هەرگیز پرۆسەی هەڵبژاردن بێ‌ كەم وكۆڕی نەبووە، بەڵام بەهەر حاڵ بوونی هەڵبژادن ئومێد بەخشە و هەرگیز لەگەڵ نەبوونی بەراورد ناكرێ‌،بەدڵنیاییەوە خەڵكێكی زۆر هەیە كە سەربەخۆن و پەیوەندیان بەهیچ هێزیكی سیاسیەوە نیە،لەوانیە زۆرێك لەم كەسانە، بیر لەوە بكەنەوە ئاخۆ كێ‌ شایستەی ئەوەیە دەنگ و متانەی خۆیانی پێببەخشن؟،پێم وایە هەر كەس كەمێك بە ووردی لەمەسەلەكە بڕوانێ‌، ئەوە زۆر بە ئاسانی دەزانێ‌ كە شایستە ترین هێزی سیاسی بۆ متمانە پێ‌ بەخشین و دەنگدان (لیستی 119)ی (بەرە و ئیصلاحە) بۆ؟

لەبەر ئەوەی یەكگرتوو خاوەنی كۆمەڵێك تایبەتمەندیە كە هیچ هێزێكی تر ئەم خەسڵەت و سیفەتانەی تیا نیە ،بۆ نمونە یەكگرتوو تاكە هێزی مەدەنی حەقیقی هەرێمی كوردستانە،كە نە لە ئێستا و نە لەرابردوودا خاوەنی پاشخانی سەربازی نیە،یەكگرتوو هێزیكە بە ئاسایی لە دایك بووە و پەرچەكردار و كاردانەوە و ئینشیقاقكردن نەبووە لە هێزێكی تر، یەكگرتوو بە واتای وشە هێزێكی میانەرەوە و دوورە لە رەق و كینە و پاشقوڵگرتن لەم و ئەو،یەكگرتوو خاوەنی بەرفراوانترین جەمارەی رۆشنبیر و كەڵە پیاوی ئەكادیمی و زانستیە،یەكگرتوو ئەندامانی بە جوانترین شێوە پەروەردەكردوە و مەگەر بە زوڵم و هۆكاری سیاسی،ئەگەرنا هەرگیز هیچ ئەندامێكی لەسەر تاوان و جینایەت دەستگیر نەكراوە،لە لایەكی ترەوە ئەگەر لە رابردوودا و لە قۆناغی رزگاری نیشتیمانی چەك هەڵگرتن بۆ هەندێك لایەن بۆ ئێستایان شەرەفێكی مەزن بێ‌،ئەوە لە دوای راپەڕین بێ‌ بەری بوونی یەكگرتوو لەشەڕی ناو خۆ و دوورو نزیك بەشداری نەكردنی یەكگرتوو لەم شەڕە نەگریسە، شەرەفێكە بۆ یەكگرتوو كە هیچی كەمتر نیە لە شەرەفی بەشدایكردنی خەباتی چەكداری لە رابردوودا،یەكگرتوو قوتابخانەیەكی مەزنە و پیاوی مەزن و نیشتیمان پەروەر و كەسی عەدالەتخوازی بەرهەم هێناوە،یەكگرتوو كە تا ئێستا دەسەڵاتی فیعلی لە پرۆسەی سیاسی كوردستاندا نەبووە، بەڵام بەم حاڵەشەوە هەرگیز درێغی نەكردوە لە خزمەتكردنی خەڵكی كوردستان،چ بە پڕۆژە سیاسیەكانی و بەرزكردنەوەی داواكانی هاوڵاتیان بۆ دەسەڵات،چ لە رێگای كارە خێرخوازیەكانی، ئەوەتا ئێستا بەرادەیەك كاری خێرخوازی بووە بە سومبڵ بۆ یەكگرتوو، تا ئەو رادەیەی كە خەڵك هەموو بارەگایەكی یەكگرتوو بە رێكخراوێكی خێرخوازی دەزانێ‌ نەك بارەگایەكی حیزبی وشك، بۆیە بە درێژایی ساڵ بۆ پێداویستیەكانیان خەڵك روو لە هەموو بارەگایەكی حیزبی و ئیعلامی یەكگرتوو دەكەن،دەی ئەمە چی دەگەیەنێ‌؟ ئەمە ئەوە دەگەێنێ‌ كە خەڵكی كوردستان بە هەموو چین و توێژەكانیانەوە گەیشتونەتە ئەو قەناعەتەی كە یەكگرتوو ئەوەندەی لە خەمی خزمەتی خەڵكی كوردستانە ئەوەندە لە خەمی كاری حیزبی خۆیدانیە و، بەڵكو حیزبیش تەنها وەك ئامێزێك بەكاردێنێ‌ بۆ برەودان بەكارە ئیصلاحی و خێرخوازی و مرۆییەكانی،یەكگرتوو هێزێكە ئێستا و رابردووی روون و ئاشكرایە و، هیچ كەیس و فایلێكی شاراوەی نیە و ،ئاشكرا و پەنهانی هەر یەكە،یەكگرتوو بەكردار سەلماندویەتی كە هێزیكی دیموكراتخوازە و بڕوای بە دەستاو دەستكردنی دەسەڵات هەیە و ،تا سەرئێسقان دژە لەگەڵ دەسەڵاتە فیرعەونی و خۆسەپێنەكان،یەكگرتوو بەدەر لە بیر و بۆچوون و ئایدالۆژیا، قەناعەتی بە حورمەتی خوێنی ئینسان هەیە و رێزیش لە رای جیاوازی بەرامبە دەگرێ‌، یەكگرتوو هەردەم لە سەنگەری خەڵكانی مەزڵومدا بووە و، بەردەوام بەیاننامەی لە سەر هەموو ناحەقییەك دەركروە،بەدەر لەوەی ئەوە لەبەر چاو بگرێ‌ كە لایەن و كەسە مەزڵومەكە ئیسلامیە یا عەلمانی،یەكگرتوو بڕوای بە پێكەوە ژیان هەیەو، قەناعەتی بە دابەشكردنی كۆمەڵگا نیە لەسەر بنەمای بۆچوونی سیاسی و تێگەیشتن لە دین،یەكگرتوو هەردەم هەوێنی برایەتی بووە نەك ئامرازێك بۆ فیتنە و شەڕانگێزیِ،یەكگرتوو هیچ هێزیكی سیاسی بە دووژمنی خۆی نازانێ‌، بەڵكو پێی وایە لەگەڵ هێزەكانی تر ركابەرە نەك دوژمن،هەموو ئەوانە لە سەدا سەد حەقیقەتن و، لەسەر ئەرزی واقیعدا رەنگیانداوەتەوە لە ناو ریزەكانی یەكگرتوو، بە دڵنیایەوە هەموو ئەمانە شایەتیەكن بۆ مێژوو،كە یەكگرتوو لە هەموكاتێكدا مایەی خێرە و خێری پێە،نەك وەك پێناسەی هەندێ‌ لایەن و بەناو رۆشنبیر كە یەكگرتوو وەك خێو وێنا ئەكەن، ئەمانەی كە باسكران حەقیقەتی یەكگرتوون نەك بانگەشە و دروشمی بریقەدار بۆ هەڵبژاردن.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.