خەباتی پەرلەمانی،بناغەی چاکسازیی و گۆڕانکارییە 

  شەممە, 22 ئەیلول 2018 11:05

دەنگدەری هۆشیارو خەمخۆر،کە دەیەوێ بەمیکانیزمی دیموکراسی وبێ شەڕو ئاژاوە، ڕەوشی سیاسی ،ئابوری، ئیداری..هتد. لە هەرێمدا باشتر بێ وچاکسازی بکرێت و دادپەروەریی بەرقەراربێت، پێویستە لەدەنگداندا بیری لای ئەوەبێت،کەهاوسەنگییەک لەناو پەرلەماندا لەنێو هێزەکاندا بێتە دی،بۆئەوەی هێزە ئیسڵاحخوازو میانەڕەوەکان ، بتوانن ژمارەیەکی زیاتر کورسی بەدەس بێنن و لەڕێگەی خەباتی پەرلەمانیەوە بتوانن گۆڕانکاری باش لەخزمەتی ژیان و گوزەرانی هاووڵاتیاندا بەدی بێنن.

کەوابوو نابێ دەنگدەر بەهیچ پاساوێک، نائومێد بێ لە هەڵبژاردن و ئەنجامەکانی، وەک ئەوەی بڵێ ئەو لایەنانە خاوەنی هێزو چەک و پارەن و هەر ئەوان بڕیار دەدەن .

نەخێر بڕیار لێرە بەدواوە لای پەرلەمانەو پەرلەمانیش شەرعیەت لە دەنگی هاووڵاتی دەنگدەرەوە وەردەگرێت . کەوابوو بڕیارلای دەنگدەرەو چاکسازیی و گۆڕانکارییش لێرەوە دەس پێدەکات..

هەموو دەزانین ،کاتێ کورسیەکانی پەرلەمان فیفتی بەفیفتی بوو لەنێوان دوو حیزبدا،پەرلەمان و یاساو بڕیارەکانی بەتەوافوق و خوێندنەوەی بەرژەوەندیەکانی هەردولا دەردەچوو،دواتر کە هەندێک گۆڕانکاری بەدیهات، پەرلەمان جووڵەی تێکەوت،بەڵام بەدڵنیاییەوە ئەگەر هاوسەنگیەکە زیاتر بێ و هەموو دەنگو ڕەنگەکان،بەتایبەت ئیسڵاخوازو مەدەنیەکان ، لەناوپەرلەماندا دیارو بەهێزبن ، ئەوە دەبێ چاکسازی لەهەموو بوارو سێکتەرەکاندا بکرێت و هەرێمەکەمان ببوژێتەوەو گەندەڵی و ناعەدالەتی سنوری بۆ دابنرێ .

حامد محەمەد عەلی

حامد محمدعلی لەدایكبووی 1960 خانەقین دەرچووی زانكۆی بەغدا ـ كۆلیژی ئەدەبیات ـ بەشی ڕاگەیاندن.. ماستەر لە ڕاگەیاندن و ڕۆژنامەگەریی لە زانكۆی سانت كلیمێنتس ـ ئۆنلاین ..ئەنامی دەستەی دامەزرێنەرو سكرتێری پێشووی سەندیكای ڕۆژنامەنوسان . لەساڵی 1985 وە لە بەغدا دەستی بەنووسین و بڵوكردنەوە كردووە بە عەرەبی و كوردی.. سەرنوسەری ڕۆژنامەی یەكگرتوو لە 1999ـ 2005 . بەشدارێكی كارا بووە لەداڕشتنی پڕۆژە یاساكانی سەندیكای ڕۆژنامەنووسان و ڕۆژنامەگەریی لە هەرێمی كوردستان .. بەشداریی لەدوو كۆنگرەی ڕاگەیاندنی ئێراقی كردووە لە بەغدا 2005 و لە پاریس 2007 .هەروەها بەشداری لە دووكۆنگرەی فیدراسێونی نێودەوڵەتی ڕۆژنامەنووسان كردووە لە ڕوسیاو لە ئەسپانیا لە 2007 و 2010..چەند نامیلكەیەكی چاپكراوی هەیە لەبواری جیا جیا ..