كە هەڵبژاردن دێتەوە خزمەت دەبوژێتەوە ، هەر ئەوەندە دەنگ درا،مانگا مرد و دۆ بڕا!!!

هەڵبژاردن یەكێكە لە پایە سەرەكیەكانی دیموكراسی و بگرە رۆح و جەوهەری دیموكراسی هەڵبژاردنە و، بەدیلی هەڵبژاردنیش تەنیا دیكتاتۆریەت و تاكڕەوییە،دیارە لەم وڵاتەی ئێمە وەك هەموو شتەكانی تر هەڵبژاردن نەك لە سیاقی راستەقینەی خۆی دەرهێنراوە، بەڵكو زۆریش شێوێنراوە و كۆمەڵێك لەمپەری بە میكانیزمێكی زۆر تایبەت بۆ داتاشراوە، كە لەراستیدا لە ناوەڕۆك و مانا حەقیقیەكەی نیمچە خاڵی دەكەنەوە.
بەردەوام لە سەربەندی هەلمَەتەكانی هەڵبژاردن دەسەڵات جاریكی تر وشیاردەبێتەوە بە قودرەتی قادیر خەڵكی شارو دێیان بیر دێتەوە و ئیتر خوا هەڵناگرێ‌ لەماوەی بانگەشەی هەڵبژاردندا دەست و دڵیان دەكرێتەوە و بەزەییا بە حاڵی وڵاتدا دێتەوە،ئەوەتا بەچاوی خۆم بینیم هەر لە لەگەڵ سپێدەی یەكەم رۆژی بانگەشەی هەڵبژاردن دەستكرا بە پڕكردنەوەی چاڵی شەقامەكان كێشانی هێلی نێوان سایدەكان و نۆژەنكردنەوەی شۆستەكان و دروستكردنی فلكەی تازە لە شەقامە قەرەباڵغەكان.
باشە ئەگەر ئەمە كارێكی پلان بۆ داڕێژراو نەبێ‌ خێرە دەسەڵات ماوەی 4 ساڵ زۆربەی شەقامەكان فەرامۆش دەكات و لە كاتی بانگەشەكانیشدا شەو رۆژ دەخاتە سەریەك بۆ خزمەتی هاوڵاتیان؟!
لە هەمووشی سەیرتر ئەوەیە زۆرترین تەركیز دەخرێتە سەر شەقام و رێگاوبانەكان بۆ؟ ئاخر بە حوكمی ئەوەی كە رۆژانە كەم كەس هەیە بەپیادە یان بە ئۆتۆمبێل جارێك یان چەند جارێك شەقامەكانی بەرچاو نەكەوێ‌.ئەوانیش زۆر وەستایانە و لێزانانە كارێك دەكەن كە كەمترین كات و كولفەی پێویست بێ‌ و هەموو كەسێكیش بیبینێ‌،ئەمە جگە لەوەی لە كاتی بانگەشەكاندا ناوی دەیان و سەدان پڕۆژە بڵاو دەكرێتەوە و ،حیزب هەیە ماڵ بە ماڵ دەگەڕێ‌ و ناوی كرێچی و خەڵكی كەم دەرامەت دەنوسێ‌ و، حیزب هەیە دەڵی لە فڵان شوێن فۆڕمی دامەزراندن دابەش دەكرێ‌ و چەندین شتی تر،ئینجا هەر بە قودرەتی قادیر لە ماوەی بانگەشەدا زمان شیرین و دەم بەخەندە و دەست لەسەر سنگ لە خزمەتی هاوڵاتیاندا دەبن،بۆیە وای لێهاتەوە خەڵك خۆزگە دەخوازن لە چوار ساڵەكە 3 ساڵ و11 مانگ بانگەشە بوایە و یەك مانگیش حوكمڕانی.
بۆنا؟ئاخر لە كاتی بانگەشەدا هاوڵاتی هەست بە بوونی خۆی دەكات و تارادەیەكی باش ریز لە كەرامەت و مرۆڤ بوونی دەگیرێ‌، بۆیە وەك مراویە ناحەزەكە سەری سوڕدەمێنێ‌ و دەڵی ئەوە مننم؟!
بەڵام ئەی دوایی چی؟ دوایی هەر باس ناكرێ‌ و هەر ئەوەندە بنكەكانی دانگدان داخران و دەنگدان كۆتایی هات، ئیتر كورد وتەنی( مانگا مرد و دۆ بڕا !!!)، بۆ؟ چونكە لەم وڵاتەی كە دەسەڵاتی كوردی دروستی كردوە خزمەتكردن و خۆشگوزەرانی و باقی ئیمتیازەكانی تر، پەیوەستە بەوەی تا چەند حیزبی دەسەڵاتت قبوڵە و تا چەند بە زوڕنای ئەو هەڵدەپەڕی،ئەگەر لەو كەسانە بیت كە بەردەوام بە ساز و كەمانی ئەوان سەما بكەی ئەوە ئەو خێرو بەرەكەتە بەردەوام دەبێ‌ و كانیاو ئاسا نابڕێ‌،خوانە خواسە ئەگەریش بڵێ‌ نا من دەنگ و رەنگێكی ترم یان هەر ئەسڵەن هیچ دەنگ و رەنگێك نیم، ئەوە دەڵێ‌ دەی بڕۆ لە كاتی هەڵبژاردندا خزمەتكراوی و ئیتر كە تۆ سوودی دەنگێكت بۆمن نەبووبێ‌ چاوەڕیی نازم و نیعمەتیشم لێمەكە ،چونكە ئەم وڵاتە وڵاتێكی ئاسایی نیە و هەموو شتێك سەر بەسەر و داش بەداشە،وڵاتی چیم بۆدەكەی تا چیت بۆ بكەم، لەم وڵاتە رێك پێت دەڵێن وەرە بۆ لام بفڕە بە باڵ من و تۆ دەبین بە هەڤاڵ!!!
لەراسیتدا ئەم كلتورە كلتورێكی زۆر ناشیرین و ناحەزە، لە وڵاتانێك كە دەسەڵات لەسەر بنەمای هاوڵاتی بوون مامەڵە لەگەڵ خەڵكدا دەكرێت شتی لەم شێوەیە بوونی نیە و، دەسەڵات خزمەتكاری تاك بەتاكی هەموو هاوڵاتیانی خۆیەتی و، زۆر جار بەتەنیان لەسەر یەك كەس پەیوەندی دوو وڵات ئالۆز دەبێ‌.
بەڵام لێرە جگە لە بەرژەوەندی حیزبی و شەخسی كێشە لەگەڵ هیچ لایەن و وڵاتێك دروست نابێ‌،بەكورتی هەرچی ببێ‌ گرینگ ئەوەیە زیانی بۆ پەزەكانی ئەوان نەبێ‌ ،چونكە ئێرە وڵاتی سەرقاڵ بوونە بە قاسە و كاسەو كۆمپانیا و، مەنەفێست و تەندەر و تیجارەت،بۆیە دەرەفەتی خزمەتكردن و لەبیری خەڵكدا بوون كارێكی ئاسان نییە و داوایەكی ئاسایی نیە،دوعا بكەن كە لەداهاتودا ئەم هەڵبژاردنانە لەكاتی خۆیاندا بكرێن و هەر هیچ نەبێ‌ 4 ساڵ جارێك لە بەرەكەتی خزمەتی هەڵبژاردن بێ‌ بەش نەبین هەمووتان بڵێََن ئامین.