سۆنامی ئۆپۆزسیۆن و نمونەكەی حەزرەتی موسا

دوا بەدوای دەركەوتنی ئەنجامە سەرەتاییەكانی هەڵبژاردنەكەی 30ی ئەیلول،قەبارەی حزبەكان گۆڕانكاری زۆر زۆری بەسەرداهات و، ئەوەی رویدا مایەی سەرسوڕمان بوو.

سەرەتا ئەوەبڵێن كە زیاد كردنی بەرچاوی دەنگەكانی دەسەڵات لەم چەند مانایە،هیچ مانایەكی تری نیە:-
1-واتای ئەوەیە كە خەڵك زۆر رازییە و هیچ كێشەیەكی نیە لەگەڵ ئەم دەسەڵاتە، ئەمەش وەك ئەوە وایە بڵێن ماست رەشە و بەرد لە لۆكە نەرم ترە.
2-یان ئەندازیارانی دەسەڵات زۆر سەركەتوو بوون لە پلانی ساردكرنەوەی خەڵك و داهێنانی تازە لە عیلمی تەزویر و تەبدیل.
3-یان لاوازی و پەرتەوازەیی و شەڕە میدیای حزبە ئۆپۆزسیۆنەكان بوو.
پێم وایە دووهەم و سێهەم هۆكار بەشێكی سەرەكی سۆنامی ئەم دابەزینەی كورسیەكانی ئۆپۆزسیۆن بوو.
ئاخر سێ‌ ساڵە لایەنە ئۆپۆزسیۆنەكان بە ئاستی جیاواز، تەنیا ئیش و كاریان سفر كردن و شكاندنی یەكتر و، ناشیرنكردن و هەتك كردنی سومعەی سیاسی ئەوی تر بوو، بەئاشكرا و لەسەر شاشە و لە میدیاكان چیان بە یەكتر نەكرد؟؟؟
كام قسەیە مابوو نەوترابێ‌؟؟؟ئاخر ئەوان لە بری ئەوەی خەریكی كەم كردنەوەی كورسیەكانی دەسەڵات بن، خەریكی كورسیەكان یەكتر بوون!!!بۆ ؟
چونكە باش ئەیانزانی ئەوان بەم حاڵەوە ناتوانن كورسی دەسەڵات بەرن،بەڵێ‌ راستە ئۆپۆزسیۆن هیچ ئیمتیازاتێكی نیە بیدە بە خەڵك،بەڵكو هەموو سەرمایەكەی سومعەی خۆیەتی، كە خوا هەڵناگری درێغیان نەكرد لە سووكردنی سومعەی یەكتر،چەكەكەی تری ئۆپۆزسیۆن متمانەی خەڵك بوو، لەشیان ساغ بێ‌ بە چەلەحانێی كەناڵەكان ئەویشیان ئیبادە كرد،دەی ئەمە حاڵت بێ‌ چۆن بەنیازی كورسی دەسەڵات بەری؟!ئاخر خۆ سەد ساڵ نیە بیرمان چووبێ‌،هەر دوێَنی بوو تا ئاستی تەخوین، ئۆپۆزسیۆن یەكتریان تۆمەتبەر ئەكرد!!!
بە كورتی ئەو شەڕەی كە ئەبوو لەگەڵ دەسەڵات بكرێ‌، ئەوان مەردانە لەگەڵَ یەكتر كردیان و، دواجار یارییەكە بەسەر خۆیان و خەڵكدا شكایەوە!!!راستی ئەوان نەیانتوانی بەرەیەكی بە هێز دروست بكەن،نەیانتوانی خیتابێكی یەكگرتوو دروست بكەن،نەیانتوانی خۆیان لە شكاندنی یەكتر بپارێزن،لەبەر ململانێی ناوخۆیان نەیانتوانی ململانێی دەسەڵات بكەن،نەیانتوانی تەنیا جارێك دەستی دەسەڵات بگرن و بڵێن نا،نەخێر نەیانتوانی هیچ بكەن...
كاتی خۆی لەگەڵ دروست بوونی ئۆپۆزسیۆن لە ساڵی 2009 بابەتێكم نووسی لەسەر ئۆپۆزسیون بەناوی (ئۆپۆزسیۆن و ئومێدی خەڵك)ئاماژەم بۆ ئەوە كردبوو كە زۆر گرنگە ئۆپۆزسیۆن وەعدی و بەڵێنی گەورە بەخەڵك نەدات، چونكە پوكانەوە و بێ‌ ئومێدكرنی خەڵك لە لایەن ئۆپۆزسیۆنەوە زۆر لە زڵمی دەسەڵات خراپترە، ئاخر دڵ شكاندنی پیرە پیاوێك لە لایەن رۆڵەكەیەوە بۆیە تاوانێكی هێندە گەورەیە، چونكە لەناوبردنی ئومێدی كەسێكە كە بەدڵ و بەگیان تیكۆشاوە تا مناڵێك گەورە بكات،راستی رەنج بەخسار بوون ئازارێكی زۆر بە سۆیە.
راست یان هەڵبەستراو چیرۆكێكی پەند ئامێز هەیە بەناوی حەرزەرتی موساوە بڵاوكراوەتەوە،ئەڵێن لەسەردەمی حەرزەتی موسا ماڵێك زۆر هەژار بوون، ژن و مێرد و كوڕێك بوون، داوایان لە حەزرەتی موساكرد خوا دوعایان قبوڵ بكات،حەزرەت فەرمووی هەر یەكێكتان دوعایەك بكات قبوڵ ئەبێ‌، ژنەكە وتی خوایە زۆر جوانم بكەی، دوعاكەی گیرا بوو، رەنگ و روخساری گۆڕا،ئیتر ژنەكە یاخی بوو بە مێردەكەی وت ئیتر من ژنی تۆ نابم و شوو ئەكەمەوە بەكەسێكی خانەدان،شووی كردەوە كابر ماڵی وێرانبوو، كابرا دوعاكەی خۆی كردو وتی خوایە ئەم ژنەم وەك جاران ناشیرین بكەیتەوە بەڵكو بگەڕێتەوە،كوڕەكەش وتی خوا دایك و باوكم ئاشت كەیتەوە و هیچمان ناوێ‌!!!ئیتر سوودیان لە دەرفەتەكە وەرنەگرت و، سەریان لە هیچەوە دەرچوو!!!
ئاخر ئۆپۆزسیۆنش وایكرد، دەستە و دوعابوون خوایە كورسیەكانی فڵان ئیبادەكەی، دەنگەكانیان بەر رەشە با كەوێ‌ و لوتیان بشكێ‌،لە كۆتایدا بەرەنجامی ئەم هەموو ناكۆكی و تانەو لەیەك خوێندنە ئەوەبوو سۆنامی هەڵی كرد و، لەناوە راستی دەریا كەشتیە چارۆكەدارەكەیان كەوتە بەر رەحمەتی زریان و، بە تێك شكاوی لە قەرغ دەریا بە خنكان و برینداربوونی سەرنشینەكانی لەرەنگەری گرتەوە!!!
ئەمە زللەی میهرەبانی عەدالەتی خوا بوو،ئەگە بەخۆدا چوونەوەی جددی نەكەن،جاریكی تر پێوست بە سۆنامی ناكات،بەڵكو هەر بارانێكی بەخوڕ ببارێ‌ كەشتیە تێكشكاوەكەیان هەلاهەلا ئەكات و ئەبن بە خۆراكی نەهەنگە گەرەكان.