مافی خۆمە لەسەر یەكگرتووەكەم بنوسم

  شەممە, 13 تشرینی یەکەم 2018 08:18

دواى ئەو بارودۆخەی لە دوای هەڵبژاردنەكانی پەرلەمانی كوردستان لە 30/9 هاتە پێش و تیایدا ژمارەی دەنگ و كورسییەكانی یەكگرتوو كەمی كرد، هەرلایەك و بەبۆچوونی جیاواز لەسەر ئەو كەمكردن و دابەزینە ئەنوسن، دۆست لە دڵسۆزی و خەمخۆری و نەیاریش لە شادی دڵی خۆیدا، هەرلایەك بەویستی دڵی خۆی دەنوسێت، یەكگرتوو بۆچی وای لێهات؟ هۆكارەكانی چی بوون؟ خەتای كێ بوو؟ ئەبێ یەكگرتوو چی بكات؟ ئایا دەتوانێ ئاماژەكانی ئەو حاڵەتە دیاری بكات؟ كێ سودمەند و كی زیاندمەندە لەو بارودۆخەو .... زۆری تریش، ئەگەر ئەوە بۆ هەموو دۆست و نەیار و دوور و نزیك و، قەڵەم بەدەست و قسەزان و چاودێرێك ئاساییە بێت و بیانەوێ بە راست و چەپدا لەسەر یەكگرتوو بنوسن، زۆر ووترا و زۆریش نوسرا، دوای هەموو ئەوانە ئێمەش مافی خۆمانە لەسەر یەكگرتووەكەمان بنوسین..

یەكگرتوویەك كە لەگەڵ چاوكرانەوەمدا لەناویدا ژیاوم، پەروەردەی كردووم و بۆی ژیاوم، مافی خۆمە لە خەمیدا بم و بیری لێ بكەمەوە، یەكگرتوویەك ئەوەندە جێی تێڕامان بێت، هەمووان لەبیریدا بن و هەركەس لای خۆیەوە بڵێ ئەبێ وا بكات و گرنگە ئەو هەنگاوە بنێت، ئێمەش مافی خۆمانە بە دۆستەكان بڵێین سوپاس بۆ دڵسۆزی و بەدەمەوەهاتنتان و، بۆ نەیارانیش بە نەرمی بڵێین ئێمە باشتر یەكگرتووەكەمان دەناسین و دەزانین بۆچی و چۆن كەوتووین، بۆیەش دەزانین چۆن هەستینەوە..

ئێمە كەوتووین، بەڵام پشتمان نەشكاوە، خلیسكاوین بەڵام قاچمان ساغە و پێیەكانمان لە رۆیشتن نەكەوتوون، یەكگرتوو نەخۆشێك نییە كە بەدیار مەرگییەوە دانیشتبین، تەنها برینێك لە جەستەیدا دروست بووە كە ساڕێژكردنی ئاسانە و خۆمان پزیشكی خۆمان باش دەناسین..

یەكگرتوو پڕیەتی لە پیاوی دانا و، بیرمەندی ژیر و، سەركردەی حەكیم و، كادیری لیهاتوو و، گەنجی بەسەلیقە و بەتوانا و، داپیرەو باپیرەی دەست بەدەستنوێژ و دەم بەدوعا و، دەیان هەزار خوشك و برای خەمخۆر و دڵسۆز و ماندوونەناس و بەخشندەی ماڵ و گیان..
یەكگرتوو پڕیەتی لە بیركردنەوەی ئیسلامخوازانە، هەستی نیشتیمان پەروەرانە، هزری برایەتی و كۆششی دادپەروەرانە..
یەكگرتوو چاوێكی لە زاخۆ و ئەوی تری لە گەرمیانەوە ئەڕوانێ، هەنگاوی هەڵەبجەو هەورامانی لە خزمەتی سۆران و بادینانیدایە، خەمی كەركوك و هەولێری دەست لەملانی سلێمانی و دهۆكیەتی.. یەكگرتوو هەر ئەوەیە كە پێشتر ناسیوتانەو و ناسیومانە و دەیناسین و لەپێناوی هەستانەوەیدا بەگوڕین..
یەكگرتوو وەك دارەبەردارەكەی كاك ئەحمەدی موفتیزادەیە، كە بەردیان تێگرت، بە بەری رەنجی هەموو كونج و كەلەبەرێكی سیاسەت و ئابوری و پەروەردەیی و كۆمەڵایەتی ئەم كوردستانەی تەنی.. یەكگرتوو خاوەنی ئەو قوتابخانە مەزنەیە كە هەموو زانكۆكان ئاواتی وەرگرتنی دەرچووانی قوتابخانەکەى ئەخوازن و، سەرمەشقی كاروانچییانی پێ دەسپێرن..
یەكگرتوو وەك ئەو دارە بەهێزەیە، كە ئەگەر لە بنەوەش ببڕێتەوە، ئەوەندە لە ناخی زەویدا جێگیرە، سەدان خەڵفی تازەو چرۆی جوان سەرهەڵدەدەنەوە، یەكگرتوو لە كانیاوی پێشینانی رابردووپاكی ئاوی خورادووەتەوە، بۆیە ئەگەر ئازاری بزاوت و جووڵەشی تووش بێ، بەڵام هەرگیز شێرپەنجەی پەككەوتن و بێ ئومێد بوون رێی پێ ناگرێ، ئەوەیە یەكگرتوو بۆ ئێمەو دۆستان و دڵسۆزانمان، ئەوەش پەیامێك بۆ ئەوانەی چاوەڕێی پەككەوتنی ئەم حیزب و كۆمەڵە خێرخوازەن..
یەكگرتوو زانی چ بەردێك لەبەرپێی دانراوەو، چی بۆ خلیسكانی راخراوە؟ ئەوەش تێگەیشتووە كە بۆچی نەیتوانی بیگوزەرێنێت و، گوڕی بازدانی ئەو لەمپەرەی نەبوو؟ كەواتە ئێستا ئەیەوێ هەستێتەوەو گوڕی ژیانەوە بەبەر خۆی بكاتەوە، چاوەڕێ بن، كاتێ شوێنكەوتەی رابەرەكەی ئوحود و رێنماییەكانی حودەیبییە بین، ئەگەر قوربانیشمان دابێت، بەڵام دڵنیاین كە نەڕوخاوین و ناشڕوخێین و، هیوابڕاو نەبووین و ناشبین و، ئەبێ چاویشمان لە فەتح و نەصرەكەی هەمان شوێنكەوتەی ئەو رابەرە گەورەیە بێت..
ئەوە ئێمەو، ئەوە هەڵگرانی پەیامی دروستی یەكگرتوو و، ئەوە بەخۆداچوونەوەو گەرمبوونەوە، ئەوەش سبەینێ و نوێبوونەوەو یەكگرتوویەكی نوێ، چاوەڕێین پشت بە خوای گەورە..

فەهمی حەمە تۆفیق

فهمی حمە تۆفیق عارف...
بەرواری لەدایكبوون: ( 11 / 4 / 1976 )
شوێنی لەدایكبوون:...هەڵەبجە - عەبابەیلێ..
بڕوانامە:..بەكالۆریۆس / جوگرافیا (زانكۆی صلاح الدین) 2001 ـــ ماستەر/ جوگرافیا (سانت كلیمێنتس) 2010
ئیش و پۆستی ئێستا:.مامۆستا (ئا.ئەزمڕی كوڕان)، ل.ئەنجومەنی باڵای مامۆستایانی یەكگرتوو، كارگێڕی مەكتەبی پیشەییەكان، بەڕێوەبەری دەنگی یەكگرتوو / رادیۆی سلێمانی...
خوێندنەوەو رێكخستنی دوو كتێبی مەرحومی د.ئەكرەم عەنەبی بۆ چاپ ئەوانیش:. (1- لە هەڵەبجە بووم، 2- ئینجیلی بەرنابا)،
كتێبێك ئامادەیە بۆ چاپ (لەنێوان مامۆستا و قوتابیدا).