ئال سعود، لەدیكتاتۆریەوە بۆ تیرۆر

ئال سعود بنەماڵەی حوكمڕان لە سعودیە،زیاتر لە 40 ساڵە خێروبێر و سامانی وڵاتیان بۆ ململانێی دەرەوەی سنوری خۆیان خستۆتەگەڕ،لە جەنگی 8 ساڵەی شەڕی عێراق ئێران،بە دەیان ملیار دۆلاریان بەخشی بە (سەدام حسێن)، دواتر دەستیان كرد بە هاوكاری (علی عبداللە صالح)ی سەرۆكی پێشووی یەمەن،لە ئێستاشدا (ترامپ)بە مانگا شیردەرەكە وەسفیان دەكات و دەیان دۆشێ‌.
ئاشكرایە ئال سعود بنەماڵەیەكی خوێنمژ و دیكتاتۆرن، سامانی بێژمار و پلەی پاشایەتی عاقڵی نەكردون و، بە هەمان عەقڵیەتی خێڵەكی 100 ساڵ لەمەوبەر حكوم دەكەن.
ئال سعود وەك بنەماڵەیەكی فاسید باشیان تیا نەبووە،بەڵام تا ئێستا دەسەڵاتداری هاوشێوەی محەمەد بن سەلمان، كە گەنجێكی هەرزەی سیاسی و كاڵ فامە، حكومداریان نەبووە.
بن سەلمان زۆر لەخۆبایی و بوغرایە، تەنیا نمونەیەك هەبێ‌ لێی نزیك بێ‌ بۆ لێكچوون، (كیم جۆن ئۆنگ)ی سەرۆكی كۆریای باكورە،هاوشێوەی(كیم جۆن) بن سەلمان تووشی غروری سیاسیی بووە و بە هەڵوێستە و كرچ و كاڵ و كارە بێ‌ ماناكانی بەناو بانگە.
دواكاری قێزەون كە بن سەلمانی نەوەی ئال سعود ئەنجامیدا، تیرۆركردنی رۆژنامەنووسە (جەمال خاشقچی) بوو لە بارەگای قونسوڵیەی سعودیە لە توركیا.
خاشقچی پێشتر پۆستی باڵای بووە لە سعودیە، تەنانەت پلەی راوێژكاری وەرگرتوە،ساڵانێك بەڕێوەبەری كەناڵی (خەبەر)ی سعودی بوو، بەڵام لە ساڵی (2017)وە جۆرێ‌ لە گۆڕانگاری بەسەرداهات و رەخنەی تووندی لە دەسەڵاتدارانی سعودیە دەگرت،خاشقچی ستوونێكی لە رۆژنامەی (واشتۆن پۆست) هەبوو، هەروها لە چەندین رۆژنامەی تری بەناوبانگی جیهانی نوسینی هەبوو.
ئەوەی ئال سعود كردیان بەرامبەر بە خاشقچی، لە مێژووی هاوچەرخدا،هەرگیز تەنیا بۆ جارێكیش نەبووە و روینەداوە،ئاخر لوتكەی حەیا چوونە، كەسێك بە رۆژی رووناك لە بارەگای قونسوڵیە كە گوزارشت لە سلكی دبلۆماسی ئەو وڵاتە دەكات تیرۆر بكرێت.
بێ‌ گومان هەموو وڵاتانی رۆژهەڵاتی ناوەڕاست، هەوڵیانداوە لە دەرەوەی سنورەكانی خۆیان خەڵكانی ناڕازای و ئۆپۆزسیۆن تیرۆر بكەن،زۆر جاریش كراوە و پلانە گڵاوەكانیان سەری گرتوە،بەڵام هەرگیز نەبووە كەسێك لە نێو باڵاخانەی دبلۆماسی وڵاتەكەی تیرۆر بكرێ و، تەرمەكەی لەت و پەت بكرێ‌.!!!
ئەم كارە وەحشی گەری و كاڵفامیەی بن سەلمانی میراتگری دەسەڵاتی ئال سعود،لە تەواوی دنیا هەرای ناوەتەوەو بووە بە مایەی شۆك بۆ هەموو جیهان!!!
ئاخر لە جەنگی سوریا كە تا ئێستا بەردەوامە،ئەسەدی دیكتاتۆر زیاتر لە نیو ملیۆن كەسی شەهید كردوە،بەڵام ئاوا بەزەقی ئابڕوچونێكی هاوشێوی بن سەلمانی ئەنجام نەداوە!
ئەوەی بن سەلمان كردی پەڵەیەكی رەشە بە نێوچاوانی ئال سعود و تازە بوو بە مێژوو،بۆیە تا 100 ساڵی تریش لەبیر ناكرێ‌ و ناسڕێتەوە.
خاشقچی پێی وابوو بن سەلمان كەسێكی هەرزەیە و شایەنی ئەوەی نیە شازادەبێ‌،ئەو پێی وابوو چۆن وەڵاتی(چین) بە شوعیەتەوە گرتویەتی و تاوەكو واز لە شوعیەت نەهێنێ‌ بەرەوپێش ناچێ‌، سعودیەش تا واز لە سەلەفیەت نەهێنێ‌ هەرگیز پێش ناكەوێ‌.
بە هەموو یاساێك ئەوەی بەرامبەر خاشقچی كرا دەچێتە خانەی تیرۆری دەوڵەت كە ترسناكترین جۆری تیرۆرە،چونكە دەوڵەت پێچەوانەی گروپە تیرۆرستیەكان هەموو ئیمكانیەت و كەرستەیەكی لەبەر دەستە ،جگە لەوەش تەواوی وڵاتانی دنیا خاوەن سیادەن و بە یاسا كیان و بوونیان پارێزراوە و بە ئاسانی لێیان نادرێت.
سەیر ئەوەیە هەموو ئەوانەی دەمیان زۆر گەرمە لەسەر مەسەلەی تیرۆر و، بە هەموو شێوەیەك تیرۆر بە دینەوە گرێ‌ دەدەن،ئێستا یان بێدەنگن یان هەڵوێستی شەرمنانەیە هەیە و دەنگیان دلێر نیە. بۆ؟
هەر بەراست ئەگەر جەللادێك خاوەن دەڵەت و سیادە بوو، لە چوارچێوەی یاسا بە دەوڵەت ناسرابوو هەرچی بكات لەسەری هەژمار ناكرێ‌؟دەی دواجار مرۆڤ هەر مرۆڤە،باشە ئەگەر ترس و تۆقاندن و رەشەكوژی گروپێكی تیرۆرست ئەنجامی بدات یات دەوڵەتێكی تیرۆرست جیاوای چیە؟بۆ بە گروپەكە بوترێ‌ تیرۆرست، بەڵام بە دەوڵەتەكە نا؟ هەر لەبەر ئەوەی خاوەن بەرژەوەندیە و و زلهێزەكان مانگا ئاسا شیرەكەی ئەخۆن بۆیە نابێ‌ بە تیرۆرست؟!
نا ئێستا بەهەموو حەقێك سعودیە وڵاتێكی تیرۆرستە،پیرۆزە لە هەموو ئەوانەی بە بانگەشی سەلفیەتی سعودیە خەڵەتاون،ئەوانەی بە نزا و گریانە درۆینەكەی (سودەیس) ی دەرباری ئال سعود و هاوشێوەكانی گریاون،ئاخر دەسەڵاتێك بەرۆژی روناك خەڵك تیرۆر بكات،یەكەم دۆستی زایۆنی بێ‌،برا گەورەی ئیماراتی ماسۆنی بێ‌،خۆشەویستی ترامپ بێ‌، چ خێرێك بەم وڵاتەوە هەیە ،دیندارێك بن سەلمانی بانگەشی بۆ بكات و برەوی پێدات،ناوی هەر شتێك بێ‌ ئاساییە،بەڵام نابێ‌ دین بێ‌.