نامەیەكی كورت و كرمانجی

 


             زۆر لە كۆنەوە ووتراوە جەنگ بە تفاقی خۆی دەكرێت ، بیریشم دێت و وەبیری هەموانی دێنمەوە كە لە قۆناغی سەرەتاییدا چیرۆكێكمان دەخوێند كە باوكێك دەیەوێت وانەی یەكێتی و بە یەكەوە بوون بە كوڕەكانی بڵێ و هەر یەكەیان دارێكی بچوكی دەداتێ و داوای لێ دەكات كە بیشكێنێ ئەویش بە ئاسانی دارەكە دەشكێنێ ، پاشان دارەكان هەموو كۆ دەكاتەوە وداوایان لێ دەكات ئەمجارە باقە دارەكە بشكێنن هیچ كام لە كوڕەكان بۆیان ناشكێ ، و تا ئەو حاڵەش هەندێ لە كوڕەكان باش لە تاقی كردنەوە كە تێ ناگەن و پرسیاری حیكمەتی ئەو كارە دەكەن ، باوكیشیان دەڵێ ڕۆڵەكانم ( هێز لە یەكبون و پێكەوە بوندایە ) .


پاشان بە ڕاشكاوی پێتان بڵێم یەكێك لە هۆكارەكانی بەردەوام بوونی گەندەڵی پەرتەوازە بوونی لایەنەكانی دەرەوەی دوو حیزبی دەسەڵاتە كە هەریەكەیان لە ئاوازێك خوێندویانە ، یان لایەنیك ویستویەتی سیاسەتی خۆی هەژموون بكات بە سەر ئەوانی تردا ، ئەمە لە كاتێكدا هەر هەموویان بانگەشەی وەك كورد ئەڵێ بۆ ( بانە ) چوونیان كردوە ، واتە هەر هەموویان بانگەشەی ئیصلاح و چاك سازییان كردوە و هەر لایەنە پاكێج پێشكەش بە حكومەت و شەقامی كوردی كردوە و دەكات ، ئەمە كارێكی چاكە و پێویستە هەموو حیزبێكی سیاسی روئیاو بینشی خۆی هەبێت بۆ حوكم ڕانی و بەڕێوە بردنی ووڵات ، بەڵام دەبێت ئەو ڕاستیە بزانیین كە چاك سازیی دەبێت یان زۆر لە حكومەت بكەیت و هێزی پەڕلەمانی بەكار بهێنی بۆ جێ بەجێ كردنی چاك سازیی و ئەگەر نەیكرد متمانەی لێ وەر بگریتەوە ، یان دەبێت خۆت بەڕێكاری خۆی شان بەیتە بەر چاك سازی و لەناو حكومەتدا چاك سازیی بكەیت .


بۆیە ئەم نامەیە زیاتر بۆ لایەنەكانی ( گۆڕان و یەكگرتوو كۆمەڵ و نەوەی نوێ ) یە خۆتان و جەماوەرەكەشتان مەخەڵەتێنن و نە بە تەنها دەتوانن موعارەزەی ناو پەڕلەمان بكەن ، ونەبەتەنهاش لە ناو حكومەت دەتوانن بەردێك بجوڵێنن ، هەمووی تاقی كراوەتەوە ، تەنها جارێكیش وەرن هەموو لایەكتان یان موعارەزەی ئەم حكومەتە كە پێك دێت بكەن یان هەموو بچن پێكەوە شان بەنە بەر باری بەر پرسیاری و بیسەلمێنن كە دەتوانن چاك سازیی بكەن.


كورد واتەنی كاكی خۆم ئێوە پێكەوە زیاد لە (30) كورسین دەتوانن زۆر شت بكەن ئەگەر هەمووشتیش نەتوانن ، كاری پەڕلەمانی بە زۆرینەو كەمینە دەچێت بەڕێوە وەك مەعلومە ، بۆیە پێویستە بچنە ئەو دیو مەسەلە شەخصی و حیزبی و ئایدۆڵۆجی ...هتد هەمووتان چاو ببڕنە بەرژەوەندی خەڵك هەمووتان لە سەر ئەو خاڵە كۆ ببنەوە ، دەبێ ئەو ڕاستیە بزانن تا چوار ساڵی تر بەرژەوەندی خەڵك لە ناو پەڕلەمان ئیمزا دەكرێت و دەنگی لە سەر دەدرێت ، دەبێت جەماوەریشتان بەم شێوەیە ئارااستە بكەن و یارمەتی دەرتان بن نەك بەرنامەتان لێ تێك بدەن ، ئێوە بە تەنها بچنە ناو حكومەت یان ئۆ پۆزسیۆن هیچتان لە بەر ناڕوات ، ئەوەش لاتان ڕۆشن بێت هەردوو حیزبی دەسەڵات موستەحیل بە خەرج دەدەن تا ئەم بەرەی چاك سازیی جەماوەرییە دروست نەبێت ، بەرەیەك ڕا بگەیەنن ، لە ئاستی تەنسیق و لێك تێ گەشتندا مەوەستنەوە ، بەرەیەكی مەحكەم ئیدارەیەكی جەماعی بۆ دیاری بكرێت ، ئەمەش تاقی بكەنەوە بزانن ئەتوانێ خزمەت بە خەڵكی بكات یان نا .
22/10/2018