كێ‌ قبوڵی دەكات خەتاكار بێ‌؟!

بۆ ئەوانەی كە پریشكێك لە (ئیمانی عەمیق) و (دڵی سەلیم)یان بەنسیب بووە

بەو پەڕی قەناعەتەوە دەڵێم: شكست و دۆڕان و كەمی كورسی و دەنگێك كە ئاشتمان بكاتەوە لەگەڵ خوای میهرەبان و نزیكمان بخاتەوە لێی، زۆر باشتر و بەنرخترە لە هەزاران سەركەوتن و بردنەوە و زیادبوونی كورسی و دەنگێك كە خوامان لێ‌ بڕەنجێنێ‌ و دوورمان بخاتەوە لێی.
من و چەندانی وەك من باش لە یادمانە كە لە ساتەوەختی ئاوارەیی و لەنێو خێوەت و لە مزگەوتە پڕ لە تەقواكەی (دارالإیمان)ی ئۆردوگای (سونقور)دا، بە پریشكێك لە ئیمانی موخلیسانەی مامۆستا (مەلا ئەمینی زەمەقی)و دۆست و شاگردەكانی هاتینە ناو بازنەی پڕ لە ئەمانی برایانەوە، هەر بە سلوكی سەلیم و ڕەفتاری حەلیمانە و زمانی شیرین و نەرم و مۆژیاری حەكیمانەی ئەم ئازیزە ڕێگەی دینداری و بانگەوازمان گرتە بەر.
من و هاوڕێ‌ و هاوكاروان و دۆستەكانم بەدوای هەنگاوە نەرمەكانی ئەواندا بە پێ‌ پەیژەكانی (مدارج السالكین)دا ئێوەمان كردە قودوە و پێشەنگی خۆمان و لە ڕێی نامیلكە چكۆلەكەی مامۆستا (بورهانی ئەمینی)ییەوە (پێشەوا)مان ناسی و لەگەڵ چەند هاوڕێیەكمدا و لە خزمەت مامۆستا (عەزیز غەفور)و پاش نوێژی بەیانی و بەنهێنی و لەنهۆمی سەرەوەی مزگەوتە پڕ لە ئیمانەكەی (سونقور)دا گوێمان لە كاسێتەكانی (بەندایەتی و قیتال و بانگەواز و بەرپرسیارێتی) شەهیدی هەمیشە زیندوو مامۆستا (ناسری سوبحانی) دەگرت، هەر لەوێش (اصول عشرین) و (تعالیم)مان خوێند، وردە وردە بە (قگار الدعوە)ی پەروەرشیاری بە ئەزموون (ئەحمەد ڕاشید)دا كەوتینە ڕێ‌ و (مسار)مان هەڵبژارد تا (مصیر)مان ڕوون و پرشنگدار بێت.
دواتر هێدی هێدی بە وانەكانی (المنطلق) هەموو كۆسپ و (عوائق)ـەكانمان بەجێ‌ هێشت و (ێ‌فات علی الطریق)ـەكانمان یەك یەك چارەسەر كرد و تێپەڕاند و (مناجاە علی گریق الدعوە)كەی مەشهور و (مأپورات)ـەكەی بەننا بوویە ویردی سەر زاری و قووەتی دڵمان، بۆ ئەوەی لەگەڵ كاروانەكەی (بەننا و سەیید و تەلمەسانی و مەشهور و زەینەب غەزالی)و برایاندا ڕێگە ببڕین بۆ گەیشتن بە (الرقائق) و ناسكی و زەریفییەكانی ژیانی دینداری و لەززەتەكانی دونیا و قیامەتمان.
كەسەكانمان! دەزانین ئێوە زۆر لە ئێمە لەپێشترن و زۆرتریش ماندوو بوون و شەونخونی زیاتریشتان كێشاوە و (سابیقون)ی خۆشەویست و ڕێزلێگیراوی ئەم كاروانەن، بەڵام دەبێ‌ بزانین چۆن دڵتان دێت (استیعاب)ی تێگەیشتن و سلوك و بۆچوون و ڕەفتار و دڵەخورپە و خەم و خەون و چاوەڕوانییەكانمان نەكەن، مەخابن ئێوەش و ئێمەش بەشێك لە (ابجدیات التصور الحركی للعمل الإسلامی)مان بیر بچێتەوە و بماندەنە دەست (ذئاب) و (ذنوب) و (أذناب)ی شەیاتینەكانی (جن و انس)؟!
پێشەنگەكانمان! خۆشتان باشتر لە ئێمە دەزانن كە لەززەت و چێژی مەجلیسێكی (قیام اللیل)ییەك و خوێندنی پەیمان و ویردی (رابطە)ی ناو ئوسرەیەك و وانە نهێنییەكانی (ماذا یعنی) و (لماذا خلق الإنسان) و (وجوب الدعوە) و ئەوانی دیكەش، لەززەت و چێژی زیاتر لە سەدان گەشت و سەیرانی ناو باخ و ڤێللاكانی ئێستایان هەبوو، بیرتانە كە وانەیەكی ناو ماڵ و مزگەوتەكان و خێوەتێكی ئۆردوگاكان لە سەدان كۆبوونەوە و (وۆرك شۆپ) و خول و سیمیناری ئێستای بارەگا و ئۆتێل و ڕێكخراو و هاوینە هەوارەكان بەتینتر و بەچێژتر بوون؟! دەزانن و لەپێش چاوتانە كە وانە و ئەڵقەیەكی ناو ماڵە ئەرقەمییەكانی جاران و مزگەوتە قوباییەكان، ئیعتیبار و خۆشەویستی و پێگەی ئێوەی زیاتر لە پۆست و پلە و پەرلەمانتاری و وەزیری بوو؟!
ئازیزەكانمان! هەموومان باش دەزانین كە فەخر و شانازی نابەجێمان كرد و تووشی غرور و لەخۆبایی بوونێكی هیچ و پوچ بووین و خۆمان لێگۆڕا، نازیمان بە بارەگا و ڕێكخراو دەنگ و پۆست و پلە و پایە و قات و ڕیبات و كۆمپانیا و سامان و (دال)ەكانی پێش ناوەكانماندا، بۆیە خواش -بە لوتفی خۆی- مەدەد و توفیقاتەكانی جارانی خۆی لێ‌ گرتینەوە و زیاتر لەوەش (زللەی میهرەبانی) لێداین و ڕایچڵەكاندین، خوا بكات زوو بەئاگا بێیینەوە و بە وتەی مامۆستای ئەمیندارمان (موراجەعە بكەین بۆ موعالەجە) و تووشی (زللەی خەشم و توڕەیی) خوا نەبین.
ئازیزە پێشەنگە حورمەت لێگیراوەكانمان! ئەگەر دەمانەوێ‌ -كە پێویستە بمانەوێ‌- خوا تەوفیقات و فیوزات و مەدەدی خۆیمان دووبارە پێ‌ ببەخشێتەوە و ئیلهاممان بكات بۆ كار و بڕیار و هەنگاوی باش و سەواب، با هەموومان -بەبێ‌ ئیستیسنا- لە كەلی خۆبەباشتر زانین و ئەوانیتر بە خەتابار زانین بێینە خوارەوە، هەموومان (تقصیر) و خەتامان هەیە و هەڵەمان كردووە و موەفەق نەبووین بەتایبەت لەم چەند ساڵەی كۆتاییدا، بە هەمووشمانەوە كەشتییەكەمان كون كرد و خراپ و عەیبدارمان كرد، بەڵام هێشتا نغرۆ نەبووین و نەفەوتاوین و دەرفەتمان لەپێشە و لە سەرەتای دەریاكەداین و دەتوانین لەكەنارێكدا لەنگەر بگرین و چاكی بكەینەوە، هەروەها خۆشمان چاك بكەینەوە و ڕوئیا و بۆچوون و نییەت و كارەكانمان ڕاست بكەینەوە، كە هەندێكیمان خراپاند و كەوتینە سەر لارە ڕێ‌ و بۆچوونی چەوت، كاتی ئەوەمان لەبەردەستدا نییە وەك پشكۆیەكی ئاگر خەتا و كەموكورتی و هەڵەكان هەڵدەین بۆ یەكتر و خۆمان تەبرییە بكەین و ئەستۆپاكی بۆ خۆمان بكەین.
خۆشەویستەكانمان! ئێمە هەموومان پێكەوە جوانین و جوانیمان بەخشییە (یەكگرتوو)، یەكگرتوو و پەیام و ڕیسالە جاویدانییە میانەڕەوەكەشمان جوانی و شیرینی و ڕەونەقی بەخشییە هەموومان، خوانەخواستە ئەگەر لار بیر بكەینەوە و نییەتەكانمان ساغ نەبن و لار بڕۆین، هەم خۆمان ناشیرین دەكەین و هەم پێگە و سومعەی كاروان و پەیام و دین و دینداریش لای ئەوانیتر دەشێوێنین و ناشیرینی دەكەین، كە كەسمان ئەوەمان نەویستووە و نامانەوێ‌... ئاشكراشە كە -شوكر بۆ خوا- باشمان كێڵاوە، تۆوی باشیشمان چاندووە و بەرهەمی باشیشمان هێنایە بەرهەم، بەڵام هێشتا لە سەرەتای پێگەیشتن و گەیینی بەرهەمەكەماندا بووین كە خراپ هەڵپەی ڕنینەوە و چنینەوەمان كرد، بۆیە زەرەرماندا و شێلامان و بەداخەوە زۆرێكیمان خەسار و زایە كرد، با ئەوەی كە ماوە نەفەوتێ‌ و زایەی نەكەین و ڕەونەق بدەینەوە بە بێستانەكەمان و خزمەتی بكەین، بە بژار و ئاودان و خۆراك بەخشین و گەرمی و تین و تاوی ئیمان بیبوژێنینەوە، كە لیاقەت و قابیلییەتی ئەوەمان تێدایە و شوكر ئاماژەكانی هەستانەوەش دڵخۆشكەر و جێی ئومێدن، مادام دەرك بە هەڵە و برینەكە دەكەین و ئێشمان پێگەشتووە.
كەسەكانمان! دەزانین ئەم قسانە بۆ ئێمەی شاگردەكانی ئێوە وتنیان قورسە و بۆ ئێوەی پێشەنگ و مامۆستا و براگەورەكانی ئێمەش بیستنیان ئێجگار قورستر و ڕەنگە بە ئێشتر و دڵئازاردەر بن، بەڵام دەبێ‌ بیانڵێین و ئێوەش شایستەیە كە گوێبیستیان بن، با حورمەتی یەكتر باشتر و زیاتر بگرین و كەسێتی یەكتر بپارێزین و گەورە و بچوكی و لەپێشی و هەندێك لە ئیعتیبارە مەعنەوی و دەعەوییەكانمان بیر نەچێتەوە، ماناكانی بەیعەت و سەر و خواری و ڕاوێژ و بڕیاری جەماعی هەروا بێ‌ ناوەڕۆك نەكرێن، با ڕازی نەبین بە ناوی دڵسۆزی یان بە مەرامی نابەجێ‌ كەسانێك لە پەنای وەسف و سەنا و پیاهەڵدانی خۆماندا بەر ببنە گیان و كەسێتی و پێگەی برا و خوشكێكی هاوكاروان و تەنانەت هاوپۆستی دیكەمان و كەسایەتی بشكێنن و سوكایەتی و بێ‌ ڕێزی پێ‌ بكەن و تەنانەت تۆمەتی بدەنە پاڵ و ئێمەش لەبەر وەسف و سەناكەی خۆمان بێدەنگ بین لە شكاندنی برا و كەسەكانمان، چونكە خوانەكردە گەر وابین وەك ئەوەیە خۆمان ئەو جەریمەیەمان كردبێ‌.
پێشەنگەكانمان! ئاشكرایە كە ئێش و ئازارێك داویەتی لە گیانمان.. گیانی هەموومان.. لە جەستەی یەكگرتووەكەمان و لە ڕۆحی شەكەتی بانگەوازە میانەڕەوە بێناز و تەنیاكەمان.. تەنیاییمان بەڵگەنەویستە و ئازار و كۆسپەكانی ڕێگەشمان فراوان و تاقەتپڕوكێن، ئەم ئازارە سوێی بردووە بە دڵی هەمووماندا و دڵمانی بە ژان خستووە، نەك بۆ خۆمان بە تەنیا.. بۆ كاروان و بانگەوازەكەمان.. بۆ خاكمان.. بۆ گەل و نەتەوەكەمان.. بۆ مەحرومان و مەزڵومان و هەژاران و نەداران.. بۆ بێ‌ كەسان و بێ‌ دەرەتان و بێ‌ پەناكان.. لەو لاشەوە پلان و پیلانی گەورە و ژەهراوی و مەترسیداری دژ و نەیارەكان با بوەستن، بۆیە نابێ‌ و زۆر نەشیاوە كە ئەم ئێش و ئازارە سەختە نەبێتە ژانی بەئاگا هاتنەوە و ڕاچەنین و چاوكرانەوە و دڵزیندوویەتی بۆمان، پێویستە ئەم ئێش و ئازارە نییەتەكانمان ساغتر و دڵەكانمان پاكتر و كار و تێڕوانینەكانمان ڕاستر بكاتەوە و پلانەكانمان تۆكمەتر و مەنهەجیتر، ئەركە لەسەرمان ستراتیژ و پلان و ڕوئیای ڕوون داڕێژین بۆ داهاتوومان و بە نەفەس و نەسەقێكی تازەوە بێینەوە مەیدان، پێویستە بڕیاری دروست و بوێرانەمان پێ‌ بدات، جورئەتی تەحەمولكردنی مەسئولییەتمان زیاتر بكات و ڕانەكەین لەژێر باری مەسئولییەتی شكست و دۆڕان و پاشەكشە، پێویستمان بە بڕیاری (سزا و پاداشت)ـە و دەبێ‌ هەمووشمان (سزا)ی جەماعەمان وەك (پاداشت) قبوڵ بێ‌، بڕیاری تەجمید و تەعلیق و كەنارخستن، بڕیاری گواستنەوە و لابردن و لێسەندنەوەی پۆست و ئیمتیازات، تەنانەت بڕیاری دەركردن بۆ هەركەسێك پابەندی بڕیاری مەركەزی نەبێ‌ و بە (پێم وایە و پێم وانیە) پاكانە بۆ خۆی بكات و پاساو بۆ هەڵە و كەموكورتییەكانی بهێنێتەوە و هەڵەكە هەڵدات بۆ ئەوانیتر.
بچینە حزووری خوای گەورە و ملكەچانە داوای مەدەد و تەوفیقات و ئیلهامی لێبكەین بۆ كار و كاروان و بانگەوازەكەمان، بۆ باشتر ڕاپەڕاندنی ئەركەكەمان، بۆ جوانتر نیشاندانی پەیام و ئەرك و بانگەواز و نەهجە میانەڕەوەكەمان، بۆ خەمهەڵگرتنی گەل و نیشتیمانەكەمان، بۆ ڕووبەڕووبوونەوەی گەندەڵ و دز و خیانەتكار و دۆڕاوەكانی ئەخلاق و سیاسەت و فەرمانڕەوایی و كێبەركێی ئەخلاقیانە.
خوای گەورە لە هەڵە و كەمتەرخەمی و نەپێكان و لارە ڕێ‌ چوونەكانمان خۆش بێت و بمانخاتەوە سەر مەسیر و مەساری ڕاست و دروست و ئەوەی كە خۆی پێی قبوڵە ڕازی بێت لێمان و دڵنەواییمان بكات كە هێشتا پشتی لێ‌ نەكردووین و پێمان بفەرمووێ‌: [مَا ۆدَّعَكَ رَبُّكَ ۆمَا قَڵی.] و دواتر دڵخۆشمان بكات بە مزگێنی: [ۆڵسَوْفَ یُعْگِیكَ رَبُّكَ فَتَرْچَی.].
* تێبینی: خۆزگە دەمتوانی ئەم چەند دێڕە بخەمە خزمەتی هەموو سەركردەیەكی (یەكگرتوو) و ئەوانەی كە ئەرك و بەرپرسیارێتییەكیان هەیە، بەتایبەت بەشداربووانی كۆبوونەوە گشتییەكەی كە بڕیارە لەم ڕۆژانەدا ساز بكرێ‌.