خەمی میللەت لە دیدی هێزە براوەكاندا دەبینن؟

ئەوەی وەك نەریتی لێهاتووەو كەسیش وەك غەمی خۆی بۆی ناڕوانێ، بریتییە لە بێخەمی هێزە دەسەڵاتدار و براوەكان بەرامبەر كێشەكانی خەڵك و بەدەمەوە چوونی خێرای خواستەكانی جەماوەر و هاوڵاتیانی هەرێمی كوردستان، ئەمە لە هەر قۆناغێكدا بەجۆرێك دوپاتكراوەتەوە، تا ئێستاش كە پێ دەنێینە قۆناغێكی نوێ، ئەویش خولی پێنجەمی پەرلەمانی كوردستان و پێكهێنانی كابینەی نوێی حكومەتی هەرێمە، ئەمیش بووەتە ئەڵقەیەكی تر لە زنجیرە بێباكییەكانی دەسەڵاتدارانی ئەم هەرێمە بەرامبەر ئەو بەرپرسیارێتییەی لە ئەستۆیاندایە، ئەویش پەلەكردنە لە پێكهێنان و دامەزراندن و رێكخستنەوەی ئەوەی پێویستە بۆ (وەك خۆیان دەڵێن) كۆتاییهێنان بەو قەیرانانەی ساڵانێكە یەخەی میللەتی گرتووە.

مانگ و نیوێكە هەڵبژاردنی پەرلەمان ئەنجامدراوەو براوەكانی هەڵبژاردن حەساونەتەوە لە ئاهەنگی سەركەوتنەكانیان، كەچی هێشتا هەنگاوەكانی كاركردن بۆ دوای ئەو قۆناغە نابینرێن، ئەمەش ئەوەندەی لە بێباكی حیزب و كەسایەتی و ئایدیا دیاریكراوەكانەوە سەرچاوە دەگرێت، ئەوەندە گرفت و لەمپەری بەردەمی تێدا نابینرێت و، هەر بەرپرسەو بەجۆرێك باس لە دابەشكردنەوەی كورسییە باڵاكان و بەشداری لایەنە بەشداربووەكان دەكاتەوە..

بۆ ئەوەی كاتێك وادەی یاسایی پەرلەمانی كۆتایی هات بۆشایی یاسایی دروست نەبێ، كۆبوونەوەی یەكەمی پەرلەمانی نوێ ئەنجامدرا، ئەگەرچی ئەویش هەر دواكەوتبوو، بەڵام دواتر بەكراوەیی هێڵرایەوە، گوایە لەبەرئەوەی لایەنەكان نەگەیشتوونەتە رێكەوتن، بەڵام دروستتر ئەوەیە بپرسین ئایا هەر لە بنەڕەتدا ئەو لایەنە دەسەڵاتدار و براوانە كۆبوونەتەوە بۆ ئەوەی بگەنە ڕێكەوتن، یان سەرقاڵبوونیان بە كاری حیزبی و بەرژەوەندی خۆیانەوە نەیهێشتووە بیر لە رێكەوتن و خستنەسەركاری دامەزراوە یاسایی و نیشتیمانییەكان بكەنەوە؟ زیاتر لە بیست رۆژە بە فەرمی ئەنجامەكان لەلایەن كۆمسیۆنی هەڵبژاردنەكان و پاشان ئەنجومەنی دادوەرییەوە قبوڵكراون، كەچی جیاواز لە هەر نەریت و شێوازێكی پێكهێنانی كابینەی حكومەت لە هەرێم و ووڵاتانی دونیا، كەسێك دیار نییە كوتلەی براوە رابسپێرێ بۆ پێكهێنانی حكومەت، كەسێكیش نییە بپرسێت بۆ كۆنابنەوەو بۆ دەست بە گفتوگۆكان ناكەن؟ ئەمە ئەگەر بێباكی و بێ منەتی نەبێت بەرامبەر خەڵك و لایەنە سیاسیەكان و دەزگاو دامەزراوەكان، چی ترە؟ لەكاتێكدا دەبووایە هەر زوو كوتلەی یەكەم بكەوتایەتە گفتوگۆ و تا ئێستا حكومەت و تەواوی پۆستە وزاری و سیادییەكان یەكلایی كرابانەوە، ئەوانە نەكراون و بەرپرسێكیش نییە لەسەروو ئەم دەسەڵاتانەوە رایان بچڵەكێنێت، پەرلەمانیش لەخۆیدا هەر لە سەرەتاوە گیرۆدەی دەردەكە بووەو فریای خۆی نەكەوتووە چ جای ئەوەی باس لە حكومەت بكات..

ئەگەر ئەمە سەرەتای ئەم قۆناغە نوێیە بێت، ئەبێ چاوەڕێی چی بكرێت بۆ چاكسازی و گۆڕانكاری و ئیرادەی باشكردنی گوزەران و حاڵی خەڵك و، ئیدارەدانێكی دروست بۆ حوكمڕانی و بەڕێوەبردنی دامودەزگا گرنگەكانی هەرێم..

ئەگەر خەمی میللەت لە دیدی ئەم بەرپرس و حیزبە باڵادەستانەی هەرێمدا بووایە، هەرگیز ئەوەندە بێخەم و بێدەنگ نەدەبوون بۆ چاكسازی و، ئەوەی بەڵێنیانداوە بیكەن بۆ خزمەتی گەل و نیشتیمان، ئەگەر ئەم هێزە براوانە مەبەستیان بووایە هەنگاوی جددی و ئەرێنی بە ئاراستەی خزمەتی گەل و دەرهێنانی هاوڵاتیان لە قوڕاوی قەیرانە جۆراوجۆرەكان بنێن، بێگومان كەمێ بەرپرسانە و دڵسۆزانە كاریان دەكرد و، جەماوەریان لە چاوەڕوانیدا نەدەهێشتەوە..

كورد ووتەنی (ئەوە عەرز و ئەوە گەز)، فەرموون ئەسپی خۆتان تاوبدەن و، شتێك مەهیڵنەوە نەیارەكانتان و پارتە ئۆپۆزسیۆنەكان قسەی لەسەر بكەن، ئەوكات بێباباكانە بەرامبەریان بدوێن و، چیتر بەڵێنی سوواو مەدەن بەگوێی خەڵكی بەشمەینەتی كوردستاندا، بەڵام كێ بڕوا دەكات بەو ئاوە ئەو تینوێتییە بشكێت، ئەوە داهاتووش زیاترمان بۆ روون دەكاتەوە..