كورد لەبەغدا داوای پلە و پۆست ئەكات یان ماف؟؟!!..
حكومەتی تەكنۆكرات بریتیە لەو حكومەتەی كە لە كەسانی پسپۆڕ و شارەزا پێكدێت
ئەم جۆرە حكومەتە لە دوای ساڵی 1932 لە ئەمریكا سەری هەڵداو كە لە پێش جەنگی جیهانی دووەمدا بوو ، لەو كاتەدا كۆمەڵە قەیرانێك روویانكردە ئەمریكا كە تاكە چارەسەر بۆ ئەو قەیرانانە بەو جۆرە حكومەتە روبەڕووی بوونەوە، جۆری ئەم حكومەتە لە وڵاتێكدا سەركەوتن بەدەستدەهێنێت كە خاوەن دەستور و دامەزراوە نیشتمانیە چەسپاوەكان و سەروەری یاسا بێت.
سەیر لەوەدایە جەماوەری ئێراقی بەتەواوی پێكهاتە ئیتنی‌و مەزهەبیەكانییەوە لەمشتومری پێكهێنانی حكومەتدا غیابی هەیەو زۆر بەنالۆژیكی مامەڵە لەگەڵ واقیعی بارودخۆخەكەدا دەكەن. بەدرێژایی مێژووی هاوچەرخی مرۆڤایەتی و مێژووی هەڵبژاردنەكان لەدوای جەنگی جیهانی دووەمدا میللەتێك شك نابرێت لەپاش ئەوەی كەدەنگیان دابێت ئیتر لەئاستی ئەنجامدا قورەمابوبن‌و نەیانپەرژابێتە سەر پرسەكانی دوای هەڵبژاردن. كەس نازانێت میللەتێكی خاوەن حەزاری‌و بەهێز لە فەلسەفەی ژیاری مرۆڤایەتیدا بۆ هێندە كەنەفتە لەبەرامبەر نەخشی روداوەكانی ئایندەدا. ئەم خەوتنە لەئاستی واقیعی سیاسەتدا بۆ ئێراقییەكانی گرتووەتەوە. ئەم مێشك داشۆرینە لەئاستی سەردەمدا چ نەخشەو مەكرێكی نێودەوڵتی لەپشتەوەیە؟ هەمو پێوەرە ئیكیۆنۆمیكی‌و سیاسییەكان دەزانن كە ئێراق لەچ خەزێنەیەكی زێرو نەوت‌و داهاتدایە . بەپێی نوێترین زانیاری سەنتەری توێژینەوەی ستراتیژی ئەهرامی میسری ئەوە سەلماوە كە لایەنە سیاسیەكان گەمە بەعەقڵی ئێراقییەكان‌و قوتی خەڵك دەكەن‌و بەبەرنامە نایانەوێ حكومەت دابمەزرێت. ئەوان لەبەرژەوەندیاندایە حكومەت غیابی هەبێت‌و چەتری لێپرسینەوە لەو دنیا جەنجاڵەی گەندەڵی دزی‌و راوو رووتدا نەبینن. هەموو سیاسییەكان بە كوردو شیعەو سونییەوە لەبەهێزترین رێكەوتنی ستراتیژیدا دەژین بۆ رووتانەوەی ئەو داهاتە زەبەلاحەی كە سروشتییەن لەخاكی ئێراقدا هەڵتۆقیوە.ئەگینا بون و نەبونی كورد لە بەغدا هیچ لەمەسەلەكەناگۆرێت، ئەوان خاس دەزانن چەند تۆكمەن لەگەڵ یەكتریدا . هەر بەگوێرەی توێژینەوەكان ئەوە سەلماوە كە ئاڵۆزی رەوشی ئێراق‌و نەبوونی حكومەت هیچ پەیوەندی بە پێكهاتەی ئیتنی‌و مەزهەبیەوە نییە. بەڵكو هۆكارێكی ئابووری لەپشت روداوەكانەوەیە. هۆكارێك كە بەرژەوەندی دروستنەبوونی حكومەتەكە لە نەبوونی لێپرسینەوەو چاوساغی حكومەتدایە . بەڵام گرفتەكە لەوەدایە كە ئەمرۆ میللەت چاوەرێی هیچ ئەنجامێك ناكات‌و بچوكترین دەنگی نارەزایی لەمەر ئەو رەوشەدا بوونی نییە.
سەبارەت بە هەڵوێستی كورد ئەوەتا دەبینین كە كورد بە گشتی هەڵوێستیان چەند لاوازەو جۆری پلانەكەشیان چەند سادەو ناستراتیجیە بۆ مامەڵە كردن لەگەڵ حكومەتی بەغدا، چونكە هەموو مەرجەكانیان هەر باسە لە پۆست و پارەو لە دەرەوەی ئەوە پێشنیارێكی تریان نییە، لەكاتێكدا كە حكومەتی عێراقیش هەست بە ئەم هەڵوێستە لاوازەیان دەكات، زیاتر هەوڵی پەراوێزخستنیان دەدات، بەتایبەتیش لەم كاتەدا كە گوتارێكی كوردی هەیە لەلایەن سەرۆكی هەرێمەوە رابەرایەتی دەكرێت و باس لەسەربەخۆیی و جیابوونەوەو ئەنجامدانی ریفۆرم دەكەن لە هەرێمی كوردستانداو ئەم گوتارەش هەندێك وڵاتی دراوسێ و عەرەبی عێراقی بەگشتی نیگەران كردووە
