پەروەردەو فێركردن وەك كاڵایەكی بازرگانی

  دوو شەممە, 10 کانونی یەکەم 2018 07:26

لەكاتێكدا كەهەرێمی كوردستان بەبێ سیادەو دەستورو ئاسایشی نەتەوەیی چۆتە ناو كایەی بەجیهانی بوەنەوە، ئەو كاتە ناتوانێـت مامەڵەیەكی ئیجابی لەگەڵ دۆخە نوێیەكەدا بكات، چونكە دەچێتە نێو شەپۆلێكەوە كە نازانێت ئاراستەی بەرەو كوێیەو بەرەو چ كەنارێكی دەبات، لەنێو كایەی بەجیهانی بوندا هەموو رەهەندەكانی ژیان ئاراستەیەكی ئابوری وەردەگرن، لەبواری پەروەردەشدا بەرەو ئەوە دەچێت كە ئاراستەی بەكاڵابوون وەربگرێت. چونكە لەم كایەدا هەموو شتەكان بەرەو تایبەت بوون دەڕۆن، ئەوەش وا لەحكومەتەكان دەكات كە وردە وردە هاوكاریەكانیان بۆ كەرتەكانی خزمەتگوزاری كەم بكەنەوە، لەنێو ئەوانیشدا كەرتی پەروەدەو فێركردن، كەئەمەش دەبێتە هۆی ئەوەی رێگە خۆش بكات كە پەروەردەو فێركردن بەرەو بەتایبەت كردن بڕوات و دواجاریش دەبێتە ناوەندێكی بازرگانی و ئەمیش وەك هەر كاڵاو شمەكێكی تر لەبازاردا مامەڵەی پێوە دەكرێت.

ئەوەی ئێستا لەكوردستاندا هەستی پێ دەكەین گۆڕانی پەروەردەو فێركردنە لەپەیامێكی مرۆیی باڵاوە بەرەو كاڵایەكی بازرگانی، كە دواجار لەبازاڕێكی تایبەتدا كڕین و فرۆشتنی پێوە دەكرێت و ئەویش دەكەوێتە ژێر یاسای خواست و خستنە روو، ئەو كەسانەی كەتوانای ئابوریان باشە دەتوانن باشترین بڕوانامە بەدەست بهێنن و لەباشترین زانكۆدا بخوێنن و پلەكانی ماستەر و دكتۆراش بەدەست بهێنن، بەڵام ئەگەر قوتابیەك لەرووی ئاستی گوزەرانەوە باش نەبێت ناتوانێت ئەم چانسەی هەبێت.
لەم فەزا نوێیەدا ئامانجی گەورەی پەروەردە و فێكردن دەگۆرَێت بۆ قازانج، بۆ ئەم مەبەستەش وەك هەر كاڵایەكی تر لەبازاڕی تایبەتی خۆیدا ریكلامی بۆ دەكرێت .
لەكوردستاندا سەرەڕای ئەوەی كە وەزارەتی پەروەردە هەیەو زیاتر لە 180 هەزار ماۆستا هەیە كە موچەكەیان لەسەر حكومەتەو هەموو قوتابخانەكان سەربەحكومەتن و بەڕێوەبەرایەتی گشتی سەرپەرشتیاری هەیە ،بەڵام رۆژ بە رۆژ خوێندنی حكومی بەرەو لاوازی دەچێت و ئاستی فێركردنی قوتابیان نزم دەبێتەوە و خێزانەكان و قوتابیانیش متمانەیان بەخوێندنی حكومی لاوازی دەبێت، لە بەرامبەردا خوێندنی ئەهلی بە تایبەتیش لە بنەرەتی و ئامادەیی نمونەی پێشكەوتنن لە بواری زانستی و گەشەپێدان و پێگەیاندنی قوتابی لە هەموو بوارەكاندا ،لێرەدا پرسیارەكە ئەوەیە كە ئایا بۆ دەبێت قوتابخانەیەك كە بازرگانێك دەیبات بە ڕێوە ئاستی بەرزتربێت لە قوتابخانەیەك كە حكومەتێكی لە پشتە؟ ئەمە سەرەڕای ئەوەش كە ساڵانە دەیان هەزار قوتابی لەزانكۆ و پەیمانگاكانی حكومەت وەرناگیرێن. لەبەرامبەر ئەمەدا هەست دەكرێت رۆژ بەرۆژ زانكۆ و پەیمانگا ئەهلیەكان و وانەی تایبەت روو لەزیاد بون دەكات ، ئەمەش وای كردوە كە كەرتی پەروەردەو فێركردن ئاراستەیەكی بازرگانی وەربگرێت و لەئێستاشدا كۆمەڵێك بازرگان و بەرپرس خۆیان خزاندۆتە نێو ئەم كەرتەوەو دەیانەوێت وەك پیاوانی كار لە ئەم بوارەدا وەبەرهێنان بكەن و قازانجێكی باش و خێرا بەدەست بخەن. واتە دەیانەوێت وەك كاڵایەكی بازرگانی مامەڵەی پێوە بكەن، لێرەدا بەرهەمەكە پەروەردە و فێركردنەو كڕیارەكانیش قوتابیانن ، لەەم فەزا نوێیەدا ئەخلاق و مامەڵەیەكی نوێ سەر هەڵدەدات كەبریتیە لە بەرژەوەندی و دەستكەوتی تایبەتی و زاڵ بوونی بەرژەوەندی خود بەسەر گشتیدا .لەم رێگەیەشەوە ئەو ئامانجە گەورانەی كەپەروەردەو فێركردن هەیەتی بۆ كۆی گشتی كۆمەڵگا، لەدیدو مامەڵەی بەرپرسانی پەروەردە و مامۆستایان و یەكە كارگێریەكاندا بەرەو لاوازی دەڕوات، لەلایەكی تریشەوە بەرپرسە باڵاكان لە وەزارەتی پەروەردە و خوێندنی باڵا هەوڵی دەست تێكەڵ كردن دەدەن لەگەڵ ئەو گرپە بازرگانەدا و دەیانەوێت ئەوانیش سوودمەندبن لە ئەو قازانجە.
لێرەوە خوێندنی حكومی زیاتر بەرەو لاوازی دەبرێت و خوێندنی ئەهلی و وانەی تایبەت روو لەزیاد بوون دەكات. بەهۆی ئەو بارودۆخەش كە ئێستا لەكوردستاندا هەیەو گەندەڵی بۆتە دیاردەیەكی بەرچاوی دامەزراوەكانی حكومەت، كەبەشێكی زۆریشی وەزارەتی پەروەردەو خوێندنی باڵای گرتۆتەوە، لەم رێگەیەوە هەست دەكرێت پردێكی پەیوەندی دروست بووە لەنێوان بەرپرسە حیزبیەكان و حكومەت و وەزارەتە پەیوەندیدارەكان، كە هەمویان لەچوارچێوەی تۆڕێكدا ئەم رەوشە زیاتر پەرەپێدەدەن، كەئەمش هۆكارێكی گرنگە بۆ ئەوەی كەپلانێكی شلگیرانە نەبێت بۆ چاكسازی پەروەردە و فێركردن و خوێندنی باڵاو رۆژ بەرۆژ ئەم كەرتە روو لەلاوازی بكات، چونكە ئەوەی ئێستا هەست دەكرێت لەكوردستاندا وەزارەتی پەروەردەو خوێندنی باڵا نەخۆیان خاوەنی پلانێكی ستراتیژین بۆ گەشەپێدانی كەرتەكانیان، نەحكومەتیش لەسەر ئاستی ئەنجومەنی وەزیران ئەو گرنگیەیان پێ دەدات كە شایەنیان بێت لەرووی هاوكاری ماددی و پلانی گەشەپێدان و پشتیوانی كردنیان بۆ سەرلەنوێ بنیاتنانەوەی هەرێمی كوردستان و زاڵ بوون بەسەر ئەو دۆخە ناهەموارەی كە ئێستاهەیە لەناوەندەكانی خوێندندا.
لەلایەكی ترەوە دەتوانین هەست بە گەشەكردنی ئەم دیاردەیە بكەین، لەرووی زۆر بوونی وانەی تایبەتی مامۆستاكان، چونكە بەشێك لەمامۆستایانیش ئەم هەلەیان قۆستۆتەوە و خراپی و لاوازی ئاستی خوێندن لەقوتابخانە حكومیەكاندا بۆتە هۆی ئەوەی كە زیاتر بازاڕی ئەمان گەرم بكات و قوتابی بەناچاری روویان تێ بكات. ئەمەش وای كردوە هەندێك لەو مامۆستایانە لەم رێگەیەوە ببنە خاوەنی سەرمایەیەكی باش و بەشێوەی مامەڵەیەكی بازرگانانە هەڵسوكەوت لەگەڵ خوێندن و پرۆسەی پەروەدەدا بكەن، لەروویەكی تریشەوە زۆربوونی زانكۆ ئەهلیەكان و فراوانبوونی بواری خوێندن تیایاندا، بۆتە مایەی ئەوەی كە كێبڕكێیەكی باش لەگەڵ خوێندنی حكومەتدا بكەن و دەرگایەكی باش بەروویاندا بكرێتەوە بۆ ئەوەی كەقوتابیان روویان تێ بكەن.
لەبەرئەوە ئەركی سەرەكی لیژنەی پەروەردە و فێركردنە لەپەرلەمانی ئەم خولەدا كەبەوردی چاودێری ئەو دۆخەی پەروەردە و فێركردن بكات لەهەرێمی كوردستان و لەرێگەی كۆكردنەوەی داتاو نوسینی توێژینەوەی ورد زانیاری لەسەر ئەم دیاردەیە كۆبكاتەوە و دواجار بیكاتە پرۆژە یاسایەك ، هەتا سنورێك بۆ ئەم دیاردەیە دابندرێت و لەهۆكارەكانی لاواز بوونی پەروەردەو فێركردن و خوێندنی باڵای كوردستان بكۆڵێتەوە و لەرێگەی بانگهێشت كردنی هەردوو وەزیری پەروەردە و فێركردن و خوێندنی باڵاوە بگاتە راستیەكان و ئەمەش بكاتە فشارێك لەسەر ئەنجومەنی وەزیران بۆ چاككردنی رەوشەكە.