دووڕوویی میدیایی، میدیاكاری ئافرەت بەنموونە

  چوار شەممە, 02 کانونی دووەم 2019 07:08

لای هەموو لایەكمان ئاشكرایە نیوەی كۆمەڵگەی كوردی بگرە زیاتریش لەرەگەزی ئافرەتن، ئەمەش وا دەخوازێت ئافرەتان شان بەشانی پیاوان رۆڵی ئەرێنیان لەنێو كۆمەڵگە هەبێت و رۆڵیان لە پیاوان كەمتر نەبێت لەبەرەو پێش بردنی كۆمەڵگەدا.
ئافرەتان رۆڵیان وەك ئافرەت، خوشك، ژن، كابان، دایك، مامۆستا، پزیشك، ئەندازیار، پارێزەر، قوتابی، سەركردەو ... هتد بگێرن و لەنێو كۆمەڵگەدا وەك ئافرەت و ژن سەیر بكرێت نەك وەك رەگەزی مێ و مێینە ؟! بەڵام مەخابن زۆرجار چ لە نێو كۆمەڵگەدا، چ لەنێو خودی ئافرەتانەوە، ئافرەت وەك رەگەزی مێ سەیر دەكرێ یان بەكاردەهێنرێت، هەر ئەمەشە هۆكاری بەدبەختی و دژواری ژیانی زۆربەی ئافرەتانی كۆمەڵگەی كوردیە.
كارەساتەكە لەو كاتەیە كە خودی ئافرەت ئەو رۆڵە بگێرێت و ببێتە ئەڵقەیەك لە ئەڵقەكانی سوكایەتی كردن و لەكەداركردنی كەرامەت و هەیبەت و لێوەشاوەیی ئافرەت، بۆیە بەندە لە دوو خاڵی سەرەكی ئەو راستیە دەخەمەروو، بۆ ئەم مەبەستە ئافرەت و میدیای كوردی بە نموونە دەهێنمەوە.
یەكەم: زۆر جار لە كەناڵە كوردییەكان، هەندێك لە میدیاكارو چاڵاكوانی مەدەنی و رۆشنبیرو بگرە خودی سیاسەتی كەناڵ و ... هتد، لەلایەك رەخنە لە سیستەمی سیاسی و دەسەڵاتی توركیا دەگرن بەوەی كە دیكتاتۆرو ستەمكارو خوێنمژە دەرهەق بە كورد، كەچی لەلایەكی دیكەوە پاڵپشتی ئابوری و دارایی هەمان سیستەم دەكەن، ئێستا ئەگەر رۆژانە لە فرۆكەخانەی هەولێری نێودەوڵەتی وردبیەوە دەیان بگرە سەدان كەس لەو جۆرە كەسانە سەردانی توركیا دەكەن بو بەسەربردنی پشووی سەری ساڵ و بەفیڕۆدانی دەیان دەفتەر دۆلار بوژانەوەی ئابوری ئەو وڵاتە، كە بەبۆچوونی خۆیان خوێنمژو دیكتاتۆرە، لەلایەكی دیكەوە ئەوانەی هەر كە دەمیان بكرێتەوە رەخنە لە سیستەمی ئەو وڵاتە دەگرن كەچی دەیان و سەدان دەفتەر دۆلار دەبەخشنە ئەو سیستەمە بە كڕینی درامای توركی و دۆبلاژكردنیان بۆ سەر زمانی كوردی ! ئەگەر توركیا بە تۆپ و فڕۆكە هاوڵاتی كورد قڕ بكات ئەوا ئەو میدیا كارو ئەو كەناڵانە بە پارەی كورد دەیان و سەدان تاكی كورد لە رێگەی دراما توركیەكانەوە بەزیندوویی قڕ دەكەن و لاڤیش بەسەرمان لێدەدن كە كورد پەروەرن و نیشتمان دۆستن !
دووەم: میدیاكاری ئافرەت و رێكخراوی بەناو بەرگری لەمافی ئافرەت و هەڵمەتی (16) رۆژەی بەرەنگاربوونەوەی توندو تیژی دژ بە ئافرەتان سەری زمان و بنی زمانیان مافی ئافرەت و خەندەق لێدان و هێرشكردنە سەر پیاوان و بگرە تۆمەت خستنە سەر دابو نەریت و كۆمەڵگەو ئاین و ... هتد كە بەبۆچوونی خۆیان هۆكاری سەرەكی نەهامەتی و بەدبەختی ئافرەتان بوینە، بەناوی ئازادی و مافی ئافرەتان دەیان میدیاكاری فاشل و شوراو لە دابو نەریتی رەسەنی كوردایەتی، رۆژانە لەشەقام و ئامرازەكانی میدیاوە دەیان سوكایەتی بە كەرامەتی ئافرەتان دەكرێ، نەك پیاو بیكات بەڵكو خودی ئافرەت دەیكات ! ئافرەت دەكوژرێت و لەسەر شەقام فڕێدراوە ! ئافرەت بەناوی لەدەستدانی ئەقڵی فڕێدراوە ! دەیان ئافرەت بەندكراون بەتاوانی جۆراوجۆر! دایك بەخێوناكرێ و دەربەدەر دەكرێ ! ئافرەت دەسوتێنرێت ! ئافرەت ئەتك دەكرێ ! ئافرەت و... هتد، كەچی جەنابی ئافرەتی میدیاكارو كەناڵەكەی هەم و خەمی ئەوەیە چۆن كوڕو كچێك یەكتریان خۆش بوێ ؟ چۆن كچەكە بە كوڕەكە بڵێ تۆم خۆش دەوێت ؟ چۆن كچەكە تەلەفۆن بۆ دایكی بكات موژدەی دووگیانی پێبدات ؟
لەو كاتەی ئافرەت دەسوتێنرێت ! ئەو ئاهەنگی شاجوانی بۆ دەكات !
لەو كاتەی ئافرەت لەسەر شەقامەكان فڕێدەدرێت !
ئەو لە هۆڵ و مۆڵەكان سەماو هەڵبەڕكێ‌ بەخۆیی و ئافرەتانی دیكەوە دەكات.
لەو كاتەی هانی كچ و ئافرەتان دەدرێت بۆ هەبوونی بەناو كەپڵ و خۆشەویستی !
كچان و ئافرەتان ماڵ و حاڵیان تێكدەچێت و شیرازەیی خێزانیان پەرتەوازەو وێران دەبێت.
لەو كاتەی بە بیست هەزارو سی هەزار هانی ئافرەت دەدرێت گۆرانی بە سەر لاشەو جەستەی خۆی و بەناو دۆستەكەی بڵێت !
دایكان و ئافرەتان بەدیار كۆرپەلەو جەرگەكەی بە ساردو سەرماو بێ گەرمكردنەوە لای لایەو گۆرانی بە چاو فرمێسكەو بۆ دەڵێت !
ئەوانەو دەیان نموونەی دیكە هەن و جەنابی میدیاكارو بەناو بەرگریكار لە ئافرەتان تۆمەت دەخاتە پاڵ پیاوو كۆمەڵگەو ئایین و دابوو نەریت و ... هتد.
سەرباری هەموو ئەوانەی سەرەوە، چەندین رێكخراوەی تایبەت بە ئافرەتان گردبوونەوەو نارەزایی دەردەبڕن كە تاوانبار پیاوە ؟
كەسیان جورئەتی ئەوەیان نیە داوا بكەن ئەو كەناڵ و ئەو میدیاكارانەی كە هۆكاری سەرەكی ئەو قەیرانن دادگایی بكرێن و دابخرێن و مۆڵەتی كاركردنیان لێوەربگیرێتەوە.
هەروەها پێویستە لەسەر كەناڵ و میدیاكاری دیكەوە كەمپی تایبەت گردبوونەوە بەو جۆرە كەناڵ و ئەو جۆرە میدیاكارانە ئەنجام بدەن، رێگە نەدرێت بەو شێوەییە سوكایەتی بە خێزان و كچ و ئافرەتان بكرێت ئەو جۆرە بەرنامەو ئەو جۆرە میدیاكانە كە بووینە تێكدانی ئاسایشی كۆمەڵایەتی و هەڵوشانەوەی یەكەو پێكاتەی خێزانی كوردی.
دامەزراوە ئەكادیمییەكانی تایبەت بە بەشەكانی راگەیاندن لە زانكۆو پەیمانگاكان بینە سەر خەت و كاری جدی بۆ ئەو مەبەستە بكەن.
بە هەموو لایەك هەیبەت و كەرامەتی خێزان و ئافرەتان بگەڕێنیەوە شوێن و پێگەی خۆی و ئافرەت وەك ئافرەت سەیر بكرێت نەك وەك رەگەزی مێینەو بكرێتە هۆكاریك بۆ ئابرو بردنی و لەناوبردنی.