تیرۆر، گەورەتر لە كوشتن!!

زۆرن ئەو كار و كردە و گوفتارانەی كە ڕیتم و شێوازی ئاسایی ژیانی مرۆڤەكان دەشێوێنن و تێكی دەدەن و دەبنە مایەی ئاڵۆزی و پشێوی دروستكردن و شەڕ و ئاژاوە و دواجاریش كوشتن و خوێنڕشتن، ئەو كردە و گوفتارە خراپ و نەشیاوانەی كە دەبنە مایەی نائارامی و تێكچوونی كۆمەڵگە و خێزان و ناخ و دەروونی تاكەكان، هەندێك لەو كردەوە خراپ و تێكدەرانانە هێندە خراپ و دزێون كە لە یەك كاتدا پەل دەهاون بۆ سەرجەم كایەكانی ژیان و دەبنە مایەی نائارامی و ترس و دڵەڕاوكێ‌ بۆ تاك و خێزان و كۆمەڵگە و تەنانەت دەوڵەتەكانیش، تیرۆر و توندڕەوی و تۆقاندن لە زەقترین و دیارترینی ئەو كردە خراپانەی مرۆڤە كە دەبێتە فاكتەری پشێوی و ئاڵۆزی و شێواندنی ئارامی و ئاسودەیی ژیانی مرۆڤەكان بەگشتی.

ئاشكرایە كە تیرۆر و توندڕەوی لە خراپترین و دزێوترین دێوەزمەكانی مێژووی مرۆڤایەتیە بەگشتی و مێژووی هاوچەرخ و سەدەی بیست و یەك بەدواوە بەتایبەتی و لە دیارترینی ئەو پرس و بابەتانەیە كە گەرمترین مشتومڕ و قسەی لەسەر دەكرێ‌، تیرۆر و توندڕەوی ئەو دێوەزمەیەیە كە هەندێك بەكاری دەهێنن و هەندێكی دیكەش لە دژیان بەكار دەهێنرێ‌ و بڕێكی دیكەش كردوویانەتە پاساو بۆ لەناوبردن و بەرتەسك كردنەوەی ئازادی و كار و خەبات و چالاكی ئەوانیتر، هەندێكیش كردوویانەتە قامچی و چەكوشێكی ستەمكارانە و ناعادیلانە بۆ لێدان و ئەزیەتدان و لەناوبردنی نەیار و ڕكەبەرەكانیان و سڕینەوەی ئەوانیتر و نەهێشتن و لەناوبردنی دەنگ و ڕەنگە جیاوازەكان و ڕەنگڕێژكردنی ژیان بە یەك ڕەنگ و بە سپی زانینی خود و بە ڕەش زانینی ئەوانیتر.
حەسرەتی گەورە و خەمە قوڵەكەش بۆ ئێمە لەوەدایە كە بەداخەوە تیرۆر و توندڕەوی كراوەتە بەرگێك بۆ موسڵمانان بەگشتی و ڕەوتە ئیسلامییەكان و تەوژمی ئیسلامی بەتایبەتی، كراوەتە ڕەنگ و بەرگێكی ڕەش و ناقۆڵا بۆ ناشیرینكردن و شێواندنی ئایین بەگشتی و وێنەی ئیسلام و موسڵمانان و تەوژمی ئیسلامی بەتایبەتی، مەخابن لەمەشدا هەندێك لە خودی موسڵمانان و ڕەوت و تەوژمە ئیسلامییەكەی ناو گۆڕەپانەكە بەشێك لەو تاوان و خەتایەیان دەكەوێتە ئەستۆ لەم وێنا شێواوە و ناوزڕاندن و تۆمەتباركردنەدا، چونكە هەندێك لەوان بوونەتە پاساو و زەمینەسازكار بۆ ئەو بۆچوونە نادروست و ناڕەوایە و ئەنجامدانی كردەی تیرۆریستی و توندڕەوانە، هەندێكیشیان بەكردەیی تێوەگلاون لە بیروبۆچوونی توندڕەوانە و پەڕگیرانە و كردەوەی تیرۆریستی و كەوتوونەتە ناو بازنەی ڕەشی تیرۆری جیهانی و تیرۆرەوە بەگشتی.
ئەڵبەتە دەبێ‌ ڕاستگۆبین لەگەڵ خۆماندا كە نكولی لەوەش ناكرێ‌ و حاشا هەڵنەگرە كە بەشێك لە تیرۆریستان هەڵگری بیروباوەڕی ئایینی ئیسلامن و ئیسلامین و پشت بەستوون بە تەفسیری هەڵە و ناسازگار بۆ كۆمەڵێك دەق و ئایەت و فەرموودە، هەروەها پەیڕەوی كۆمەڵێك فەتوا و ڕاوبۆچوونی هەندێك لە زانایانی پێشین و هاوچەرخ دەكەن كە هاندەرن بۆ ئەو بابەتە، یاخود لەژێر كاریگەری عاتیفە و سۆز و حەماسەتی دیندارانەدا و بێ‌ مەبەست بوونەتە جێبەجێكاری پلان و پیلانی دوژمنان و نەیارانی ئیسلام و هەندێك لە دەزگا سیخوڕییەكانی وڵاتان، كە بەمەش بوونەتە بارێكی قورس و گران و زۆر خراپ بەسەر شانی موسڵمانان و خودی ئایینی ئیسلامەوە و نموونەیەكی زۆر خراپ و ناشیرین و شێواویان لە دین و دینداری پێشكەش كردووە.
بەڵام لەگەڵ ئەوەشدا دەبێ‌ ئەو ڕاستییە حاشاهەڵنەگرەشمان لەپێش چاو بێت كە بەشێكی فراوانتر و گەورەتری تیرۆریستان و ئەوانەی كە كردەوەی تیرۆریستی و توندڕەوانە ئەنجام دەدەن و ڕەواجپێدەری فیكری توندڕەوی و كاری تیرۆریستانەن -بە ناو و ناونیشانی جیاوازی ڕووكەشكراوە- ئەوانی دیكە و غەیری موسڵمانانن، ئەوانەن كە دەبنە ڕێخۆشكەر و زەمینەی ڕەخساندنی بیر و هزری توندڕەوی و كردەی تیرۆریستی دەڕەخسێنن، كە بەشێكی ئێجگار زۆری لە ئەستۆی دەسەڵاتدارانی ئەو ژینگەیەدایە كە تیرۆر و تیرۆریستانی تێدا لەدایك دەبن، ئەوانەن كە هەڵگری بانگەشەی (ڕووبەڕووبوونەوەی تیرۆری جیهانی)ن و چەندین دەزگا و ڕێكخراویان بە ناوی (دژە تیرۆر)ەوە دروست كردووە، هەروەها كردوونیانەتە ئۆرگانێك بۆ سڕینەوە و لەناوبردنی ئەوانیتر و بەرتەسككردنەوەی ئازادی بیروباوەڕ و ئایین و مەزهەب و ڕێچكە جیاوازەكان و بە دوژمنكردنی هەموو ئەوانەی كە هاوڕا نین لەگەڵیاندا و لەگەڵ بەرژەوەندییەكانی ئەواندا یەك ناگرنەوە.
یەكێك لە گەورەترین گرفت و ئاریشەكانی بەردەم ڕێگری كردن و ڕووبەڕووبوونەوەی تیرۆر و ئەو تیرۆر و تیرۆریستانەش كە كراونەتە ماڵ بەسەر ئیسلام و موسڵمانانەوە ئەوەیە كە: بەداخەوە تا ئێستاش بەشێكی بەرچاو لە تەوژمی ئیسلامی بەگشتی و لایەنە ئیسلامییەكان و زانا و كەسایەتییە ئیسلامییە كاریگەر و بەناوبانگەكان بەتایبەتی، ئازا و بوێر نەبوون و نین لە بە تیرۆر ناساندنی بیر و بۆچوون و كردەی تیرۆریستانەی ئەو ئیسلامییانەی كە هەڵگری بیروبۆچوونی توندڕەوانە و پەڕگیرانە بوون و كردەوەی تیرۆریستییانە و دڕندانەیان ئەنجامداوە، كە دژ بووە لەگەڵ قورئان و ڕۆحی دین و ئیسلام و تەنانەت بەها ئینسانی و ئەخلاقییەكانیشدا، نەشیانتوانیوە یان نەیانویستووە كە بە ڕوونی ناویان ببەن و ئازا و دەنگ دلێریش نەبوون لەوەی كە لە كۆڵی موسڵمانان و ئیسلامیان بكەنەوە و نەهێڵن ببنە بار و موڵك بەسەریانەوە، بەمەش باجێكی گەورە و درێژخایانیان داوە و دەدەن، چونكە هێشتا نەیانتوانیوە ئەوان لە وێنە گشتییەكەی ئیسلام و موسڵمانان جیا بكەنەوە.
ئەڵبەتە ئێمە بڕوامان وایە كە تیرۆر و توندڕەوی گەورەتر و فراوانتر لەوەیە كە تەنیا لە كردەی كوشتن و لەناوبردنی فیزیكی جەستەی ئەوانیتردا كورت بكرێتەوە، تیرۆر تەنیا تیرۆری جەستەیی و فیزیكی نییە، بەڵكو زۆر فراوانتر و گەورەتر لەوەیە، ئەمڕۆ زۆر بەئاشكرا تیرۆری فیكری و بیروباوەڕ دەبینین، تیرۆری كەسێتی مرۆڤەكان بەگشتی و كەسێتییە دیار و تایبەتەكان دەبینین، تیرۆری ئایینی دەبینین كە ئایینی ئەوانیتر تیرۆر دەكرێ‌ و ناشیرین دەكرێ‌ و دەیان گومانی خراپ و پرسیاری شێواوی لەسەر دروست دەكرێ‌، تیرۆری ئەخلاقی و كۆمەڵایەتی دەبینین، كە دەست دەبرێ‌ بۆ ژیانی تایبەتی و خێزانی كەسەكان و ناو زڕاندنیان و لەكەداركردنی سومعە و ئابڕوویان و تۆمەت بۆ دروستكردنیان بە شێوازی زۆر ناڕەوا، تەنانەت تیرۆری پێگەی زانستی و بڕوانامە دەبینین و هتد..، كە هەموو ئەم جۆرە تیرۆرانە پێویستیان بە لەسەر وەستان و قسە لەسەركردن و ڕووبەڕووبوونەوەی جددی و شێلگیرانەی هەموو لایەك هەیە.
ئەمڕۆكە نەك تەنیا تیرۆری تاكەكەسی و لایەن بەڵكو تیرۆری گەلان دەبینین، هەوڵی سڕینەوە و لەناوبردن و قەڵاچۆكردنی گەلان دەدرێ‌ بە پاساوی ناڕەوای جۆراوجۆرەوە، ئایا تیرۆری شوناس و ناسنامەی گەلێك سەخت نییە، ئیدی ناسنامەی نیشتیمانی بێت یان نەتەوەیی؟ كاتێك دەسەڵاتێكی ستەمكار و دیكتاتۆر دەیەوێ‌ شوناس و ناسنامەی گەلێك بسڕێتەوە بە ڕێگە نەدان بە بەكارهێنانی زمانی دایك و پابەندبوون و بایەخدان بە كلتوور و فەرهەنگی میللی و نەتەوەیی خۆیەوە، ئەوە تیرۆر نییە؟! ئەوە تیرۆر نییە كە لە وڵاتێكی زۆرینە موسڵماندا ڕێگە بە ئازادییە مەزهەبی و ئایینییەكانی گەلێك نەدرێت؟! ئایا ئەوە برینێكی سەخت و بەسوێ‌ نییە كاتێك تیرۆری ئایینی زۆرینەی گەلێكی موسڵمان لە لایەن دەسەڵاتداری خودی نیشتیمانەكەیەوە دەكرێت، كاتێك كە زیاتر لە (95%)ی ئەو نیشتیمانە پێكدەهێنێ‌ و لە بەرامبەرەوە بایەخی زۆر و زیاتر لە پێویست بە ئایین و مەزهەبگەلێكی زۆر كەمینەی دیكە دەدرێت كە كەمتر لە (5%)ی ئەو گەل و نیشتیمانە پێك دەهێنن، ئایا ئەمە تیرۆرێكی زۆر زەق و بێ‌ ویژدانانە نییە؟!
ماوەتەوە لە كۆتاییدا ئەوە بڵێین كە: تیرۆر هەر تیرۆرە و توندڕەوی و پەڕگیریش هەر ناڕەوان، ئیدی هەركەس و لایەنێك پێی هەستێ‌ و بەرامبەر هەر كەس و لایەنێك بێت كردەیەكی نائینسانی و نائەخلاقییە و دژ و پێچەوانەیە لەگەڵ ڕۆحی هەموو ئایینە ئاسمانییەكان بەگشتی و قورئانی پیرۆز و ئایینی ئیسلام بەتایبەتی، هەروەك هیچ كارێك نابێتە پاساو بۆ ڕەوایەتی بەخشین و ئەنجامدانی تیرۆر و كاری توندڕەوانە بەرامبەر ئەوانیتر، تیرۆر و توندڕەوی هیچ ئایین و گەل و مەزهەب و ڕێچكەیەك ناناسێ‌ و حورمەتی هیچ لایەكیان ناگرێ‌ و موڵك و ماڵیش نییە بەسەر هیچ ئایین و گەل و مەزهەب و ڕێچكەیەوە، تیرۆر و توندڕەوی كارێكی زۆر نادروستی مرۆڤە هەلپەرست و بەرژەوەندخواز و لادەر و دەروون نەخۆش و عەقڵ شێواوەكانە، ئەركی هەموو لایەكە زۆر شێلگیرانە و بە بوێری و دلێرانە ئیدانەی تیرۆر و توندڕەوی و ئەو جۆرە بۆچوون و كردە تیرۆریستییانە بكەن، تەنانەت ئەگەر كەسانی موسڵمانی سەر لێشێواو و فریودراویش ئەنجامی بدەن، یان كەسانی گەرمكراو بە حەماسەتی دینی و تەفسیری هەڵەی دین و دەقە دینییەكانیش بن، موسڵمانان و تەوژمی ئیسلامی و سەركردە و كەسایەتییە كاریگەرەكان و زانایان و ڕۆشنبیرانی ئیسلامی لە هەموو كەس زیاتر دەبێ‌ بوێرتر و دەنگ زوڵاڵتر بن لە ئیدانەكردن و سەركۆنەكردنی بیر و كردەی توندڕەوانە و تیرۆریستانەدا، بۆ ئەوەی لە ئاست بەرپرسیارێتییە دینی و ئەخلاقی و ئینسانییەكەیاندا بن.
إنها‌و الدردشە
اكتب رسالە...