رۆژهەڵات،لە نێوان سیاسەت و ئەخلاقدا


سیاسەت وشەیەكە رۆژانە سەدان جار لە میدیا جۆراو جۆرەكان ئەبیسترێ‌،سیاسەت یەكێكە لە گرنگترین كایەكانی ژیان تەنانەت ژیان بێ‌ سیاسەت بەڕێوەناچێ‌.چونكە هیچ كۆمەڵگایەك بێ‌ ئیدارەدان و ئاڕاستەكردن بەڕێوەناچێ‌.
سیاسەت ئەگەر وەك خۆی بەرجەستە بكرێت ئەوە نەك كارێكی خراپ نییە بەڵگو پیرۆزە،بەڵام بەداخەوە لای ئێمە بەهۆی پڕاكتیزەكردنی لە لایەن كۆمەڵێك دەسەڵاتداری مافیای فاشیی و فاشیل، دەمێكە كار گەیشتۆتە ئەوەی حەزبكەین وشەی (مەرگ) ببیستین نەك وشەی سیاسەت.
چونكە تا خوا حەزئەكات سیاسەت قێزەونكراوە و كراوە بە هەگبەی هەموو فەزاحەت و پیسییەك،لە كاتێكدا زۆر بەكورتی سیاسەت واتا(ئیدارەدان و بەڕێوەبردن و رێكخستی كاروباری دەوڵەت)
دیارە كایەی سیاسەت وەك هەموو كایەكانی تر كۆمەڵێَك پرانسیپی تایبەت بەخۆی هەیە،یەكێك لەمانەش بریتیە لە ئەخلاقی سیاسی، ئێمە ناچینە نێو جەدەلی ئەوەی ئایا لە سیاسەتدا ئەخلاق هەیە یان نا؟
ئەوانەی دەڵێن نییە، ئەوە تێڕوانینی دیكتاتۆر و حاكمە شمولیەكانە بۆ سیاسەت،ئەگەر نا یەكێك لە پایەكانی سیاسەت ئەخلاقە،بەدڵنیاییەوە سیاسەت بەبێ‌ ئەخلاق زۆر لە بومەلەرزە و چەكی ئەتۆمی ترسناكترە.
ئاخر بە داماڵینی سیاسەت لە ئەخلاق و، ژێر پێخستنی بەهاكانی دنیا ئەبێ‌ بە جەنگەڵ، ئەو كات دەسەڵاتداران لە مرۆڤەوە ئەگۆڕێن بۆ بوونەوەرێكی قێزەون و دڕندە كە هیچ پێناسەیەكیان نییە.
لەوانەیە راستر وابێ‌ كە بڵێن بەواتای وشە ئەگۆڕین بۆ شەیتانێكی حەقیقی،بەداخەوە لە ناوچەكەدا نموونەی ئەم جۆرە شەیتانانە زۆرن، ئەوەتا ئەوەی لە عێراق و سوریا و فەڵەستین و میسر و سعودیە و ئیمارات و ئیسرائیل و یەمەن و لیبیا و وڵاتی تری ناچەكە روودەدات، نموونەیەكە لە سیاسەتكردنی نا مرۆڤانە و دوور لە هەموو بەهایەكی ئەخلاقی.
لە زیندانەكانی وڵاتانی رۆژهەڵاتی ناوەراست كەرامەتی مرۆڤ هیچ جۆرە ئەرزشێكی نیە و، رۆژانەش رێكخراوەكانی مافی مرۆڤ ئاماژە بە دەستدرێژی سێكسی بە كۆمەڵ و ئەشكەنجەو، لێدانی مرێنەر ئەكەن لە نێو زیندانەكان،زۆر جار گاڵتەجارییەكان دوای مردنی زیندانیەكانیش لە ژێر ئەشكەنجەی جەللادەكانی دەسەڵات،هەر تەواو نابێ‌ و، داوا لە كەس و كاریان ئەكەن كە ئیمزا لەسەر وەفات نامەیەكە بكەن، كە تیایدا نوسراوە ناوبراو خۆی كوشتوە!!!
لە وڵاتانی خۆرهەڵاتی ناوەڕاست نەبوونی خزمەتگوزارییەكان بەگشتی ئازارێكی بەردەوامی هاوڵاتیانە،ئێستا گریە و ، هاوار و قیژەی خەڵكی ستەم لێكرا و گەیشتۆتە كەهكەشانی ئاسمان، بەڵام حاكمە خۆفرۆش و بەكرێگیراوەكان دەنگیان نابیستن، بۆیە ئەوەی روودەدات جگە لە بێ‌ ئەخلاقی لە هیچ پێناسەیەكی تر جێگای نابێتەوە.
بە دڵنیاییەوە هەر كەس بەدەر لە بیروڕای سیاسی و جۆری بیركردنەوە و مەسەلەی ئایدیالۆژی، ئەوەی ئەم هەموو قەسابخانە و زوڵمەی بەلاوە ئاسایی بێ‌ و ویژدانی نەجوڵێ‌،ئەگەر لە ماڵەكەی خۆشیدا دانیشتبێ‌، ئەوە نامرۆڤ و ستەمكارە و،خاوەنی ویژدانێكی مردوە و ئەخلاقی تیا نەماوە و، بووە بە دەست و پێوەندی جەللادو مرۆڤ كوژە وەحشیەكانی سەردەم.