کۆمەڵگە بە پۆپۆلیزم و حەماس و سۆز دادەڕمێت

حەزم لە نوسینی سیاسی نیە، چونكە لەبری سیاسەت سەنتەری، فەرهەنگ سەنتەریم پێ لە پێشترە، بەڵام هەر لە ڕووی فەرهەنگیشەوە دەتوانین قسە لە سیاسەت و دیاردە و ڕەفتارە سیاسییەكان بكەین. بەكورتی ئەو شێوازو ڕەفتارە سیاسییەی هەم ئۆپۆزیسیۆن و هەمیش دەسەڵات، لە كوردستان، پەیڕەوی دەكەن، بەگڕدانی حەماس و وروژاندنی لایەنی عاتیفی، كارێكی مەترسیدارە، زەقترینی مەترسییەكانی بریتییە كاڵبوونەوەی مۆركی ئینسانیبوونی تاك و لێكترازانی كۆمەڵگە، ئەوەش هەر ئەوەیە كە ئێستا پێی دەوترێت پۆپۆلیزم، كەرەستەی ئەم پۆپۆلیزمەش میدیا بووە، بۆیە چەند ساڵی ڕابردوو تائیستەش، ناخۆشترین شوێن بۆ كەسی بیركەرەوە ، فەیسبوك و میدیابووە بەگشتی..

 

 

لە ڕوانگەی مرۆڤی خاوەن فەرهەنگەوە سیاسەت ئەو كاتە دەست پێ دەكات كە ئەقڵ زاڵ دەبێت، بەڵام پەرچەكرداری ئاسایی لە توڕەبوون و تەشهیر و جنێودان، سەرەڕای ئەوەی دوورە لە ئەخلاقیات و بەهای ئایینی و مرۆیی باڵا، ڕەفتارێكی سیاسیش نیە، لە زاڵكردنی حەماس و سۆزدا هەرچەند مرۆڤ وەك جەستە چالاك دەبێ، بەڵام بەشە ئینسانییەكە بە بەزیوی دەمێنێتەوە، هەروەها بە ئاسانی چەواشەكاری و خەڵەتاندن ڕوو دەدات، زەقترین ئاستی ئەم چەواشەكارییەش لە ڕێگەی میدیاوە ڕوو دەدات، وەك ئەوەی ڕوویدا و ‌ئێستاش بەردەوامە، كۆمەڵێك كەسی قسەزل دەبنە پاڵەوان و كاری سەرەكیشیان دەبێتە قسە...

 

سەبارەت بەو وردە دەمەتەقێ ناشیرینەی كە لە نێوان هەندێ لە كادیر و جەماوەری حیزبە ئیسلامییەكاندا هەیە، پێویستە لەمەسەلە گرنگترەكان بڕوانن، تا خەڵكی مەشبوه و نیاز خراپیش ڕۆڵی خۆی لەو نێوەندەدا نەگێڕێت، كێشەكانی ئیسلامیبوون و كوردبوون لەوە قوڵترن، دانیشین بە دیار جنێوی سەركردەیەكەوە و بمانەوێ لە كاتی گونجاودا جنێوێكی وەك خۆی پێ بدەینەوە، جنێو كارێكی نا ئەخلاقییە، كاری نا ئەخلاقیش بە نا ئەخلاقییانە وەڵام نادرێتەوە، لەبەر ئەوەی ئەگەر وا بكەین ئەوا پێكەوە هەموومان درێژە دەدەین بە فەزایەكی نا ئەخلاقی. لە بری ئەوە باشتر وایە كادیری حیزبە ئیسلامییەكان بیر لە بابەتە گرنگترەكان بكەنەوە، ئەو بابەتانەی بوون و شوناسی ئەوانی پێوە بەستراوە، ئایا ئەوان بیریان لەوە كڕدۆتەوە كە تەرحی جددی لە ئاستی جیهاندا ئەوەیە كە ئیسلام وەك ئاین لە چواڕچێوەی ئەم هەلومەرجەی ئێستای مرۆڤایەتی و لە داهاتوودا ناتوانێ درێژە بە ژیانی خۆی بدات؟ دیوی تەشریعی ئیسلام قابیلی دیفاع لێكردن نیە؟ هتد...

پێویستە هەموو پێكەوە ئیسلامیی و نا ئیسلامی وەك تاكەكانی ئەم كۆمەڵگەیە هاوكار و دەستبار بین بۆ فەراهم كردنی فەزایەكی ئەقڵانی نەك حەماسی، سیاسییەكان بۆ مەرامەكانیان زۆرترین سوود لە حەماس و پۆپۆلیزم وەردەگرن، بەڵام كۆمەڵگە بە پۆپۆلیزم و بەهێزكردنی فتیلەی سۆز و حەماس دادەڕمێت..

حەیف نیە بۆ مرۆڤێكی ئاقڵ هەڵدێرێكی گەورەی لە پێش بێت و ئەمیش دانەخرانی یەكێك لە قۆپچەكانی كراسەكەی بكاتە بیانوو و سەر بەرز نەكاتەوەو گوێ بە هاواری دڵسۆزانیش نەدات كە لەتەنیشتیەوە ئاگاداری دەكەنەوە؟؟ ئەگەر ئەوەی لە شەڕی ناوخۆوە تا ئێستا بەردەوامە، لە گەرمكرنی بازاڕی جنێو و تەشهیر و سوكایەتی، هەروا بڕوات، كۆمەڵگەی ئێمە هیچ ئیمكاناتێكی پێ نامێنێت و لە هەموو فەرهەنگێك خاڵی دەبێتەوە، ئەوەش تەنها لە بەرژەوەندی دەەسەڵاتێكی ملهوڕی ستەمكاردایە..