خه‌ونى سیاسیه‌ تازه‌كان و، سرِینه‌وى ئه‌وانى تر!

له‌نێو هه‌موو كۆمه‌ڵگا و نه‌ته‌وه‌یه‌ك،گه‌نج وه‌ك سه‌رمایه‌ى مرۆیی، وه‌ك ده‌ستى كار، ،وه‌ك ئومێدى ئاینده‌ سه‌یر ئه‌كرێت.چونكه‌ هه‌ردوو قۆناغى مناڵى و به‌ساڵاچوون دوو قۆناغى سست و لاوازن.

له‌هه‌رێمى كوردستانیش وه‌ك هه‌ر جێگایه‌كى ترى ئه‌م دنیایه‌، گه‌نجى خاوه‌ن به‌هره‌ و زیره‌ك و به‌توانا هه‌یه‌.
یه‌كێك له‌م گه‌نجانه‌ له‌ ساڵى (2011) ده‌زگایه‌كى راگه‌یاندنى جیاوازى دامه‌زراند و، له‌ماوه‌یه‌كى زۆر كه‌مدا خه‌ڵكێكى زۆرى له‌خۆى كۆكرده‌وه‌.دواتر جار جار به‌ بۆنه‌ى جیا جیا ده‌رئه‌كه‌وت و قسه‌ى ئه‌كرت،دواتر و به‌دیاریكراوى پاش ده‌ستنیشانكردنى كاتى ریفراندۆم، بۆ یه‌كه‌م جار وه‌ك سیاسیه‌ك له‌گه‌ڵ كه‌ناڵه‌كه‌ى خۆیدا دیدارێكى سازكرد و باسى سیاسه‌تى كرد.
ئیتر له‌م رۆژه‌ به‌دواوه‌ وه‌ك سیاسى ده‌ركه‌وت و، له‌ یه‌كه‌م هه‌نگاویشدا جوڵانه‌وه‌ى (نه‌خێر)ى دروستكرد، له‌ كۆتا هه‌نگاویش (نه‌وه‌ى نوآ)ى دروستكرد و وه‌ك حزبێكى سیاسى به‌شدارى هه‌ڵبژاردنه‌كانى كرد.
له‌ راستیا دروست بوونى حزبى تازه‌ شتێكى سه‌یر و نامۆ نییه‌ و، بگره‌ كارێكى زۆر ئاساییه‌،به‌ڵام ئه‌وه‌ى ئاسایی نییه‌ ئه‌وه‌یه‌ به‌دیدێكى واقیعى سه‌یرى واقیعى سیاسى وڵاته‌كه‌ى خۆت نه‌كه‌ى!
بآ گۆمان ئاشكرایه‌ كه‌ حكومه‌تى هه‌رێم ئه‌وه‌نه‌ى وه‌ك (دیفاكتۆ) پێناسه‌ ئه‌كرآ، نیو ئه‌وه‌نه‌ش وه‌ك كیانێكى خاوه‌ن ده‌ستور و دامه‌زراوه‌ سه‌یر ناكرآ.
هه‌ر كه‌س هه‌تا ئه‌م خاڵه‌ گرنگه‌ تێنه‌گه‌،ئه‌گه‌ر (چه‌رچڵ و بنجامین)یش بێت هیچى بۆ ناكرآ، ئه‌وه‌ى كه‌ ده‌سه‌ڵات گه‌نده‌ڵ و ناخزمه‌تگوزار و ناته‌ندروسته‌، لاى هه‌موو كه‌س ئاشكرایه‌ و برِاوه‌ته‌وه‌ و پێویستى به‌ هیچ به‌ڵگه‌یه‌ك نییه‌.به‌ڵام حزبێك بێت و به‌حساب خه‌ریكى چاكردنه‌وه‌ى وڵات بێت، به‌ڵام بآ جیاوازى هه‌موو ئه‌واى تر ره‌ت بكاته‌وه‌ وبه‌ مه‌نتیقى رادیكاڵى خه‌باتى سیاسى بكات و كه‌سى قبوڵ نه‌بآ،دۆستایه‌تى كه‌س نه‌كات،حه‌ز به‌ مه‌رحه‌باى كه‌س نه‌كات،بزانآ یان نه‌زانآ ئه‌وه‌ هه‌ر هه‌مان ئه‌و بۆچونه‌یه‌ كه‌ وڵاتى وێرانكردوه‌ و، جووت حزبه‌كه‌ى ده‌سه‌ڵات له‌سه‌رده‌مى شاخ به‌ هه‌مان شێوه‌ بیریان ئه‌كرده‌وه‌ بۆیه‌ وڵاتیان به‌م رۆژگاره‌ ره‌شه‌ گه‌یاند.
ئاخر ناكرآ و مه‌نتیق نییه‌ تۆ په‌لامارى شاخى (پیره‌مه‌گرون) بده‌ى،به‌ڵام بڵێت هه‌مووتان دوركه‌ونه‌وه‌ و پێویستم به‌كه‌س نییه‌!!!
هه‌رگیز نه‌كراوه‌ و قه‌تیش ناكرآ،ئاخر سوپه‌رمان ته‌نیا خه‌یاڵه‌ و له‌ دنیاى واقیعدا بوونى نییه‌،له‌ رابردوودا براده‌رانى تریش وایانكرد، سیاسه‌تى ته‌عه‌نوت و ئینكارى كردنیان گرته‌به‌ر كاره‌كه‌شیان بآ به‌رهه‌م بوو.
راستى خه‌ونى شاسوار بوون زۆر خۆشه‌، ببیت به‌ شاسوار و میلله‌تێك له‌ نه‌هامه‌تى رزگار بكه‌ى و وه‌رچه‌خان بێنیته‌ كایه‌وه‌، خۆشه‌ به‌ زیندوویی له‌ مێژووودا بمێنیته‌وه‌،به‌ڵام له‌ واقعیدا كارێكى زۆر قورس و زه‌حمه‌ته‌ و پێویست به‌هه‌موو ئه‌وانى تره‌.
راسته‌ سه‌رۆكى (نه‌وه‌ى نوآ) گه‌نجێكى زیره‌كه‌،به‌توانایه‌،قسه‌كه‌رێكى سه‌ركه‌وتوه‌،به‌ڵام به‌ زمانى زبر و، سفركردنى ئه‌وانى تر رۆژگار ته‌نیاى ئه‌خات و، رۆژ به‌ رۆژیش له‌برى نزیك بوونه‌وه‌ له‌ ئامانجه‌ گه‌وره‌كه‌ى دوور ئه‌كه‌وێته‌وه‌.چونكه‌ ته‌نیا هاوشێوه‌كانى خۆى له‌گه‌ڵى ئه‌بن و ئه‌وانى تر لێى دور ئه‌كه‌ونه‌وه‌،ئاخر ئه‌و ئه‌وانى ترى قبوڵ نه‌بآ ئه‌وانى تریش ئه‌ویان قبوڵ نیه‌.
راستى بینینى دوو دبلۆماتكار نابآ وات لێبكات وابزانى كه‌ هه‌موو دنیا پشتگیریت ئه‌كات،خه‌ڵكى زۆر گه‌وره‌تر تیاچووه‌ و جگه‌ له‌ زه‌جه‌ ئیعلامیه‌كه‌ هیچى ترى به‌دوادا نه‌هاتووه‌.
ئاخر ئه‌وه‌ به‌رِێزه‌ هه‌رچه‌ند گرنگ بآ، به‌قه‌د(قازى )گرنگ نابآ كه‌ به‌به‌رچاوى دنیاوه‌ له‌سێداره‌ درا،به‌قه‌د (جۆن كنێدى و ئه‌نوه‌ر سادات و ره‌فیق حه‌ریرى)گرنگ نابآ كه‌ به‌به‌رچاوى دنیاوه‌ كوژران و تیرۆركران.
ئێمه‌ هه‌رگیر روداوى ناخۆش و خراپ بۆ كه‌س ناخوازین، به‌ڵام سیاسه‌ت به‌م فۆرِم و ئایدیایه‌ سه‌رى له‌ هیچه‌وه‌ ده‌رئه‌چى و هیچى لێ سه‌وز نابآ.
ئه‌گه‌ر زاڵ بونى عه‌قڵه‌یه‌تى شه‌رقى بوون و كورد بوون نه‌بوایه‌، كه‌ هه‌ردوو عه‌قڵیه‌ته‌كه‌ بریتین له‌ ته‌ركیز كردنه‌وه‌ له‌ خودى خۆت و، هیچى ترت به‌لاوه‌ گرنگ نیه‌،ئه‌وه‌ ئه‌و به‌رِێزه‌ ده‌رفه‌تێكى بۆ هاته‌ پێش نه‌ك سه‌رۆك حزب، به‌ڵكو ئه‌بوو به‌ پێشه‌نگ و خۆشه‌ویستى میلله‌تێك.
ئه‌گه‌ر ده‌سكارى سیاسه‌تى نه‌كردایه‌ و، دامه‌زراوه‌كه‌ى سه‌ربه‌خۆ بمایه‌ته‌وه‌،ئه‌وه‌ له‌ چه‌ند ساڵى داهاتوودا به‌ قه‌د دامه‌زراوه‌ ئیعلامیه‌ جیهانیه‌كان گرنگ ئه‌بوو،هه‌موو هێزه‌ نارِازییه‌كانى له‌خۆى كۆئه‌كرده‌وه‌، له‌سه‌رووى هێزه‌كانیشه‌وه‌ میلله‌تێكى نارِازى له‌خۆى كۆ ئه‌كرده‌وه‌ و هه‌موویان ئه‌بوون به‌ موڵكى ئه‌و،ئه‌ویش ئه‌وبوو به‌ موڵكى هه‌موویان .
ئه‌گه‌ر ته‌نیا مه‌به‌ستى خزمه‌ت و خۆشحاڵى خه‌ڵك بوایه‌،ئه‌وه‌ له‌ رێگاى ئیعلامه‌كه‌یه‌وه‌،هه‌م خۆشه‌ویستى خه‌ڵكى به‌ده‌ست ئه‌هێنا، هه‌م ئیعلامه‌كه‌ى كاریگه‌رى زۆر زیاترى ئه‌بوو له‌سه‌ر ده‌سه‌ڵات و ده‌سه‌ڵاتى ناچار به‌زۆر شت ئه‌كرد،به‌ڵام ئێستا بیه‌وآ یان نه‌وێت كه‌ناڵه‌كه‌ى وه‌ك هه‌ر یه‌ك له‌ كه‌ناڵه‌ حزبیه‌كانى تر سه‌یر ئه‌كرێت و، كاریگه‌رى جارانى نه‌ماوه‌ و سه‌ربه‌خۆیی خۆى له‌ده‌ست داوه‌.
به‌داخه‌وه‌ سه‌رۆكى (نه‌وه‌ى نوێ) نه‌یتوانى به‌گه‌وره‌یی بیر بكاته‌وه‌ و ببآ به‌موڵكى هه‌مووان، هه‌ر وه‌ك (بازانی)یش به‌هه‌ر هۆكارێك بووبێت، نه‌یتوانآ له‌ سه‌رۆكى حزبێكه‌وه‌ به‌ حه‌قیقه‌ت ببآ به‌ سه‌رۆكى گه‌لێك و سنورى حزب تێپه‌رِێنآ.
ماوه‌ته‌وه‌ بڵێن واى به‌حاڵى گۆشت كاتێك خوآ بۆگه‌ن ئه‌كات،ئاخر تۆ ئه‌گه‌ر نه‌توانى له‌گه‌ڵ هێزێكى مه‌ده‌نى ئۆپۆزسیۆن هه‌ڵكه‌ى، ئه‌ى چۆن له‌گه‌ڵ ئه‌وانى تر هه‌ڵ ئه‌كه‌ى؟
به‌ئاشكرا ئه‌ڵێن له‌گه‌ڵ كه‌س هه‌ڵناكه‌ین، ته‌نیا له‌گه‌ڵ ئه‌وانه‌ى له‌ ریزه‌كانى خۆمانن!،به‌داخه‌وه‌ دروستكردنى كۆمه‌ڵگا له‌نێو كۆمه‌ڵگا كارێكى كۆنه‌ و هه‌ره‌سى هێناوه‌،رۆژگارێك هه‌ندآ هێزى ئیسلامى رادیكاڵى كاریان بۆكرد، به‌ڵام سه‌ركه‌وتوو نه‌بوو چونكه‌ ناواقیعى بوو.
ده‌ره‌نجام هه‌ر كه‌س به‌م جۆر بیربكاته‌وه‌ ئه‌وه‌ ته‌نیا دوو رێگاى له‌پێشه‌،ماندووبوون و وازهێنان، یان به‌ خۆدا چوونه‌وه‌و سه‌لماندنى واقیع و هاتنه‌ده‌ره‌وه‌ له‌ دنیاى خه‌یاڵ.