ئەمە جۆرێكە لە گاڵتەكردن بە كەسێك كە شتێكی نەگونجاو بڵێت یان ئەنجامی بدات ، واتە ‌ئەو مردووەشت خاوەنی ڕێزبووە‌، جارێكی تر بەقوڕاچێت، كەس یادی بەخێری نەكات.


لەسایەی چاولێكەری و خۆنمایشكردن، وای لێهاتووە ئێمە بە ئەركی ئایینی و خزمایەتی و كۆمەڵایەتی شایستە ڕاناگەین، خاوەن پرسەش كەس بەحاڵی نەبێت.
‌ ئەو كەسەی ئازیزێكی لەدەستداوە ، دەبێت كە سەری چووە ، ماڵیشی هەروا... جارێك بۆ كۆچكردووەكەی و جارێكیش بۆ ئەو هەموو ئامادەكارییەی كە دەبێت بیكات.


بیستوومە كاتی خۆی بە كەسێكیان ووتووە ، (واجبەلحەج) بوویت ، بۆ ناچیت ؟ ووتبووی پارەی حەجەكەم هەیە ، گەڕانەوەكەی شك نابەم ، دەبێت هەتا دە رۆژ من هەرخزمەتی میوان بكەم ، دیاری بۆ عالەم بێنم ، ئێ دوای هیلاكی و خەرجیی سەفەر ، توانای ئەوەیانم نییە.
  الحكم لله ، توانای مردنەكەمان هەیە ،تاقەتی دوای مردنەكەمان نییە ، ڕاكەن فڵان مزگەوت بگرن ، ئابڕومان دەچێت ، ئەوێ نەبێت جێ نابێتەوە  .
مامۆستا فڵان نەبێت كەسی تر بانگ مەكەن.. ... گرانە ؟! پاره ‌چیە ؟ خۆ هەموو رۆژێ مردووت لێنامرێت.


‌ كەسی وا هەبووە ، بەر لەوەی تەرمەكە وەرگرێتەوە ، یەكسەر چووە بۆ لای مەلا فڵانی قورئان خوێن ، ئەویش وتویەتی : ببوەرە تازە وەعدم داوە ، ئەو سەردەمەش‌ تەعزیە دوو رۆژ بوو ، ئەویش وتبووی من تەرمەكە هەر لەساردخانەی توب عەدلی ناهێنمەوە ، سێ سبەی ئەسپەردەی دەكەین ، بۆ ئەوەی تۆ قورئانەكەمان بۆ بخوێنیت ..!


لەنەوەدەكاندا لە پرسەیەك بووم كە تەواو بووین لە مزگەوت ، چوینەوە بۆ لای ماڵەوە ، لەژوورەوە دانیشتبووین ، ئەوەنەم زانی پاقلاوه ‌وچای شیرینیان هێنا ! منیش ئەوە یەكەمجارم بوو، شتی وا ببینم ، بەهێواشی پرسیارم لەوەی تەنیشتم كرد : وتم ئەمە چییە ؟ وتی‌ ئەوە دەڵێن ئیتر بەدوای ئەم خەمەدا شیرینی دێت ئیشائەلڵا!..
ئەوە با سێ رۆژە و سەرقەبران ، چلە و ساڵیاد و خەتمە و مەولو خوێندنەوە ، قەبرهەڵبەستن و پەیاكردنی شیعری جوان بۆ قەبرەكەی ، با ستاند بای بێت...
مردوو ، چەندێكە نەخۆش بووە ، موحتاج بووە ، كەس لایەكی بەلادا نەكردۆتەوە ، كەچی پرسەكەی جمەی دێت ، جا ئەم خەڵكە خۆیان داوە لەتەل ، دەچن بۆ پرسە ، بە لەكزسی جام رەش وحیمایەوە ، جادە و كۆڵان خنكاوە ، ترافیك درووست دە‌كەن ، ئای قسە بە قەبرەكەشی دەوترێت ، كە ئەوەندە ئیزعاجییان بۆ ئەو عالەمە درووست كردوە ..


زۆرجار ئەوەنە پەلە دەكەن لە شاردنەوەی مردووەكەدا ، كەسە نزیكەكانی خۆی فریای مەراسیمی دفنەكەی ناكەون ، قەت لەدڵیان دەرناچێت... هەندێ شوێن وا بەناوبانگن كە مردووەكەیان تەواو ساردنەبووەتەوە ، فڕاندوویانه ..
وا باشترە‌ هەر لە سەرقەبرانەوە ، بەئامادەبووان بووترێت : ئیتر ئێوە‌ زەحمەت مەكێشن بۆ پرسەكە‌، بەمجۆرە ئەركێك كەمتر بۆ هەردوولا.


با سوود لە تەكنەلۆجیا و تۆڕی كۆمەڵایەتی وەربگیرێت بۆ پرسەكردن و دڵدانەوەی كەسوكاری كۆچكردوو ، كە مۆبایل هەیە ، ئیتر بۆ شارەوشار بچین بۆ پرسە؟
تاكەی خاوەن مردوو دڵی لەمشتیدا بێت‌ ، خوایە ئەم میوانانە بەسەلامەتی بگەڕێنەوە ، بەخوا رێى كەلار بەڵایە ...

كەسی واهەیە كە هەواڵی دەپرسیت ، دەڵێی قەڵای خەیبەری فەتحكردووە ، دەڵێت جا كاكە تەعزیە دەهێڵێت بەخوا ئەمڕۆ چوار پرسەم كردووە .
ئێ كە هاتوون بۆ پرسەكەت ، ئیتر ئەمە قەرزە و فایزیشی دەچێتە سەر ، هەر دەبێت ئەو قەرزە بدەیتەوە ...


كەسێك پێی وتم : من كەوكوژی چاودەگێڕم بزانم كێ نەهاتووە بۆ تەعزیەكەمان..
كاتی ئەوە هاتووە بەهاوكاری هەموو لایەك رێگربین لەوەی پرسە لە دڵنەوایی و هاوخەمییەوە سەربكێشێت بۆ ئەركی زۆر و داهێنانی مۆدێلی ناساز بەنەریتی كوردەواری.

دوای مزگەوت ، ئینجا بەزمی خێمە و كورسی پلاستیكی ناشیرین و كارەبای سەیار و موبەڕیدەی بێ ئاو و گرتنی فەرع و كۆڵان دەستپێدەكات..
ئادەی راكەن ئازوقە كێش كەن ، كوا گۆشتی حەیوان و مریشك‌ و سەو‌زه و زەڵاتە ؟..
كورە ژن نازانێ چێشتی زۆر لێنێت ، با فڵان مەتعەمچی بانگكەین ، كاكە خۆ هەموو رۆژێ مردوومان لێنامرێت .
كۆڵبەن ئیتر ، مردووتان مرێ ..باشە ..