پێشمەرگەیەكی دێرین بۆی گێڕامەوە

پێشمەرگەیەكی كۆنی حزبی سۆسیالیست بۆی گێرامەوە كە لە ساڵانی هەشتاكان - ئەوكات سۆسیالیست حزبێكی چەكداری كوردستانی بەهێز بووە – دەچنە سەردانی سەركردەیەكی یەكێتی نیشتمانی كوردستان و هەندێك گفتوگۆ دەكەن لەسەر وەزعی شۆڕش و پەیوەندی نێوان هێزە سیاسییە كوردستانییەكان و ناوچەی قەلەمڕەویان و ئەو پێشمەرگەیە ئەوكات كادیریش بووە دەڵێت كە حزبەكەیان خاوەنی هێز و چەكدار و پاڵپشتیكارە و ئەوانیش دەبێت لە فڵان كار و فڵان دابەشكاری پشكیان هەبێت و ئەگەر نا ....
ئەم سەركردەیەی یەكێتی نیشتمانی دەڵێت :
یەكەم من تەوازوعوم نواندووە كە لەگەڵ ئێوە دانیشتووم ئێوە كادیر و من سەركردەم با مەكتەب سیاسییەكانتان بێن بۆ ئەم كارە .
دووەم لە نێوان ئێمە و پارتی دیموكرات سۆران و بادینان دابەشكراوە ئەوان لە بادینان قەلەمڕەون و ئابوونەو و باج وەردەگرن و ئێمەش لە سۆران, بۆمان هەیە لەناوچەكانی یەكتر تەنها كاری رێكخستن و جارجارەش چالاكی چەكداری لە دژی رژێم بكەین, لەوە زیاتر رێگەپێدراو نییە ئێوە ش لە هەردوو ناوچەكەدا بۆتان هەیە رێكخستن بكەن و جارجارەش چالاكی چەكداری .
ئەوە پێشمەرگە و كادیرەی حزبی سۆسیالیست و سەركردەكەی یەكێتی نیشتمانی هێشا زیندوون و دەخوازم لەشساغ و تەمەن درێژبن.
ئەم گێرانەوە مێژووییەم بۆ ئەوەبوو كە خوینەری ئەم چەند دێرە بزانێت دابەشكاری و دوو دەڤەری لە هەرێمدا مێژووەكەی هی نەوەدەكانی سەدەی بیست نییە, بەڵكو رەگی مێژووی قوڵترە , بۆیە ئەوانەی ئێستا لە جەوهەردا بە كزۆڵی دەیانەوێت بەشداری كابینەی حكومەتی پارتی و یەكێتی بكەن و لە شاشەكان خۆیان كردووە بە سوپەرمانی چارەسەرییەكانی دوو دەڤەری دەبێ بزانن ئەوان لە بەشداریان لە كابینەیەك كە لەرووی پێكهێنەرە حزبییەكەی كۆپی كابینەكانی رابردووە , جەگە لە جوانكاری و بێدەنگبوویان هیچیتریان لێچاوەڕوان ناكرێ , ئەوان ناتوان ئێستا بۆیاخی دوو ئیدارەی كاڵبكەنەوە ئەگەر نەگەڕێنەوە بۆ ئەو مێژووە, ئەوان ناتوانن پچڕاوەكان بەیەكتر بگەیەننەوە بەبێ لكاندەوەی بەرژەوەندییە ئابوورییەكان و تێكەڵكردنەوەی كۆمپانیاكان , ئەوان دەتوانن كۆمپانیاكان تێكەڵ بكەنەوە؟ . ئەوان دەتوانن سنوورە ئابوورییەكان دەستكاری بكەنەوە ؟