چی دەبێ‌ ئەگەر بەم شێوەیە بكەین؟!

هەڵمەتی خستنەڕووی جوانییەكان
لە دونیایەكدا دەژین ژیانمان شێوێنراوە، بیركردنەوە و ڕوانینمان شێوێنراوە، بینیمان تەڵخ و تەمومژاوی كراوە، بیستنمان تەژی كراوە لە ژاوە ژاو و هەراو هوریای بێ‌ مانا.
لە مەملەكتێكدا دەژین سەردێڕی هەواڵەكانمان باس باسی كوشتن و بڕین و خۆسوتاندن و ڕفاندن و دزینی سەروەت و سامان و ئالوودەبوونی گەنج و لاوەكانمانە... باسی پێدانی سەرەتایی ترین مافی هاوڵاتی وەك موژدە و شاكار لە پێشەوەی هەواڵەكانەوە پەخش دەكرێ‌ و كەرامەت و شكۆی هاوڵاتی پێ‌ دەشكێنرێ‌.
پەروەردەیەكی سەقەت و فاشیلی واكراوین كە تەنیا ناشیرنی و خراپی و دیمەن و هەڵوێستە ناباشەكانی یەكتر دەبینین، چاومان لە ئاستی جوانییەكانی یەكتر كز و لاواز و هەنیچ جاریش نابینایە، گوێمان لە ئاستی بیستنی قسەی ڕاست و دروست و دڵخۆشكەر كز و كەڕە، بەمەش زمانمان بۆ وتنی ڕاستییەكان ئاسان هەڵناسوڕێ‌ و زۆر جاریش تر و لاڵە.
ئەم جۆرە ڕوانین و بیركردنەوە و مامەڵە و پەروەردە سەقەتە ڕەنگڕێژی بەشێكی زۆر لە ژیانمانی كردووە و بووەتە نەریت و بەشێك لە فەرهەنگی شێواومان، لە تەواوی جومگە و كایەكانی ژیانی ڕۆژانەی تاك و خێزان و حوكمڕانی دەسەڵاتدارانیشدا ڕەنگی داوەتەوە.
لێرەوە پێشنیارێك دەكەم بۆ هەموو خەمخۆر و پەرۆشانی ئەم گەل و نیشتیمانە، بۆ هەموو ئەوانەی حورمەت و شكۆی مرۆڤەكانیان لا گرنگە، بۆ ئەوانەی كە ئەخلاقی بوون و مرۆڤدۆستی لایان مەبدەئو ستراتیژە، بۆ ئەوانەی كە خەمی دین و ژین و ئایندەی مناڵ و نەوەكانی ئێستە و داهاتووی ئەم میللەتەی هەیە، بۆ كەناڵەكانی ڕاگەیاندن (بیستراو، بینراو، خوێنراو) و ڕێكخراو و ناوەندە ڕۆشنبیری و فەرهەنگی و ئایینییەكان، بەشداران و بەكارهێنەرانی تۆڕە كۆمەڵایەتییەكان، هەر خێزان و تاكێك كە هەستی بەرپرسیارێتی ئەخلاقی هەیە، پێشنیارەكەشم ئەمەیە كە:
(لەسەر ئاستی تاك و خێزان و دەزگا و ڕێكخراو و ئۆرگان و ناوەندە جیاوازەكان بە لایەنی كەمەوە بۆ ماوەی 3 تا 6 مانگ هەڵمەتێكی خستنەڕووی جوانی و چاكییەكان ئەنجام بدەین، بەوەی كە لە لایەكەوە تەنیا زووم و فۆكەسمان لەسەر جوانی و چاكی و خاڵە ئەرێنی و ئیجابییەنی یەكتر بێت و شتە باش و جوانەكان باس بكەین و بیانخەینە ڕوو و نیشانیان بدەین، هەر كارێكی جوان و چاكمان لە هەر كەس و شوێنێكی ئەم نیشتیمانەماندا بینی باسی بكەین و دەستخۆشی لێ‌ بكەین و بیخەینە ڕوو بۆ ئەوانیتر و خەڵكی بۆ هانبدەین، لە لایەكی دیكەشەوە هیچ هەواڵ و بابەتێك بڵاو نەكەینەوە كە باس لە خراپی و ناشیرینییەكانی ئەوانیتر بكات، یان لەگەڵ یەكتردا هیچ ناشیرینی و خاڵێكی نەرێنی یەكتر باس نەكەین)
بڕوام وایە ئەگەر ئەم كارە بكەین و ئەم هەڵمەتە جێبەجێ‌ بكەین، ئەوا كاریگەرییەكی تەواو باش و ئەرێنی دەبێ‌ لەسەر ژیانی تاك بەتاكمان و وێنایەكی جوانتر لە ژیان دەبینین و دەبیستین، كارێكی سەخت و دژوار نییە تەنیا بڕیارێكی یەكلاكەرەوە و تۆكمەی پێویستە، لەگەڵ هەناسە و هەستێكی مرۆڤدۆستانە و ئەخلاقییانە و نیشتیمانپەروەرانە.
هەر لێرەشەوە دەستخۆشی و سوپاسی فراوانم بۆ هەر كەس و خێزان و ئۆرگان و بەڕێزێك كە دەتوانێ‌ پشتیوانی ئەم هەڵمەت و پێشنیارە بێت و دەبێتە دەستباری كاری چاك و جوان.
* تێبینی: ئەڵبەتە ئەمە شمولی دەسەڵات ناكات، دەسەڵات ئەگەر چاكی و جوانی هەبوو ئەوە ئەركیەتی و ئەگەر خراپی و ناشیرینییەكیشی هەبوو -كە زۆر و لە ژمارە نەهاتووە- ئەوە بخرێتە ڕوو.
(20-2-2019) چوار شەممە